紅磡食肆小店林立，分分鐘真係卧虎藏龍，好似今次介紹呢間上海飽餃店，外面睇絕不起眼，或者大家路過亦唔會留意到佢嘅存在，但原來佢地嘅飽點係咁精彩，絕對可以媲美好多高級中菜點心...
![]()
|
| 卧虎藏龍的上海飽餃店 |
小店屬家庭式經營，師傅喺廚房不停努力搓粉團，而出面只有兩張小木檯，裝修雖然簡陋，卻感覺得到簡樸風味...
![]()
|
| 鍋貼($10/4件) |
好耐無食過咁好食嘅鍋貼，新鮮滾熱辣，底部煎得夠脆但唔會太燶太硬，肉同菜比例剛剛好，咬落去肉汁豐富，香噴噴...正！
![]()
|
| 小籠包($12/4件) |
即叫即蒸，皮薄唔易穿，肉香唔太油，肉汁封存得好好，掂！絕對好食過果間自恃小籠包出名嘅鼎泰豐多多聲...
![]()
|
| 凍豆漿($7) |
杯裝$5枝裝$7，唔駛諗梗係要枝裝抵得多，豆漿唔係自家出品，不過豆味香又夠凍，味道唔錯！
![]()
|
| 剛搓好嘅菜肉飽 |
見到阿姐排好一盤盤剛搓好嘅菜肉飽，真係好鬼靚好吸引，影完張相就跟手要左一個...
![]()
|
| 菜肉飽($4.5) |
同樣係即叫即蒸，一口咬落去真係覺得入面暖笠笠好正，肉夠香菜味極濃。其實個包本身亦蒸得好軟熟，肉汁慢慢滲入包入面，愈食愈好味～正！
![]()
|
| 生煎飽 |
老闆睇到我不停咁影相，專登拎一個生煎飽出黎請我食，佢誠意推介話好好味！果然係掂！其實我本身好少食生煎飽，但呢度嘅又真係令我幾回味，大家有機會要試試...
![]()
|
| 飽點選擇都幾多 |
呢度飽點選擇都幾多，要一次過試晒真係無乜可能，後尾先知原來可以一碟叫四款唔同，有少少後悔添！不過唔緊要，咁好味就下次一定再黎。
![]()
|
| 價廉物美，點都要試下！ |
紅磡區雖然唔少食店都好出名，好似三河屋，時新，聯記等等都係人氣極盛，但味道始終俾我不外如是，甚至不知所謂嘅感覺。不過呢間上海飽餃店就真係令我留下深刻印象(當然我唔係俾個免費生煎飽收買），絕對價廉物美，黎到呢區就點都要試下！
上海飽餃店紅磡明安街6號地下(巴士站旁)
============================================
感謝 kent1012 提供以上資料
kent1012http://www.kentxfood.com/
============================================
