好多年前中環返工時，曾有機會到呢間有蛇竇之稱嘅樂香園，食物質素早已令我回味無窮，後黎面對舊業主瘋狂加租逼遷，樂香園舊年年中搬到中環中心附近繼續營業。今日有機會再黎到呢度開餐，同大家分享一下！如果未黎過嘅朋友，記住空肚黎呀~ 因為要試嘅野真係幾多，而且幾飽肚架～
![]()
|
| 滑蛋叉燒飯 + 凍奶茶 |
午飯時間到黎人頭湧湧，好彩等左唔係好耐就有位，因為目標早已鎖定，所以隨即快快手先叫個滑蛋叉燒飯，再加杯香滑凍奶茶....
![]()
|
| 滑蛋叉燒飯($25) |
水準依舊出色嘅頭號名物，肥瘦剛好嘅熱辣辣既叉燒，被滑溜到爆晒燈嘅蛋汁包住，再加埋蔥花，好好味！所以你見到成間茶記有好多人都叫呢個...
![]()
整多個近照睇下...我又流晒口水喇～～
![]()
|
| 滑蛋蝦仁飯($25) |
同樣都係食客至愛，呢度嘅蝦仁又大隻又爽口，味道上因為少左叉燒本身嘅肉味，所以整體上較為清淡，嫌淡的話檯面上有樽甜豉油可以幫到你....
![]()
呢張相本來唔打算放上黎，但我見到隻蝦仁好似瞓喺蛋汁上面浮下浮下咁，好鬼鍾意，所以專登post埋引下大家～哈哈！
![]()
|
| 雜批($6) |
除左兩個飯之外，呢度仲有幾個名物要介紹俾大家，首先就係呢個出面搵唔到有得賣，外型又有少少似皮蛋酥嘅雜批....
![]()
叫得「雜批」，餡料當然係非一般咁單調，入面有午餐肉，烚蛋同埋青豆，配搭上幾特別，外層批皮甜甜地，咬落亦夠鬆化，如果大家就啱時間食到新鮮出爐嘅就更Perfect~
![]()
|
| 雞批($6) |
呢度嘅雞批同樣受到唔少食客追捧，外型上其實同Pie & Tart果隻差唔多，但入口無咁油膩，餅皮較鬆化而且牛油味十足，加上無乜洋蔥，口感更正！中意食雞批嘅朋友真係要試下～
![]()
|
| 菠蘿包($3) |
最後一提就係呢度嘅菠蘿包...大家心諗應該會話:「吓?無咩特別咋喎！」外型上真係完全唔起眼，但第一啖咬落去就會明白我點解要介紹俾大家...因為呢個真係食落去有菠蘿味嘅菠蘿包，上面椰蓉餡果度混入菠蘿茸，所以食落去有啲似鳳梨酥嘅味道，正因為如此，大家黎試的話千祈唔好俾多兩蚊加牛油呀～真係會有浪費嘅感覺....
![]()
如果大家以前無去過威靈頓街蛇竇舊店，或者只會覺得新店只係6一間普通茶記。係唔係懷舊都好，呢度食物同服務質素其實都好值得大家黎試下，不過留意一下時間，午飯黃金時間就迴避一下喇！
樂香園咖啡室
中環機利文新街8-12號地下 (舊址: 中環威靈頓街15號C地下)
============================================
感謝 kent1012 提供以上資料
kent1012http://www.kentxfood.com/
============================================
