閒時在尖沙咀搵個地方食個early lunch，來到K11商場底層角落，見到有一間以賣上海點心拉麵為主嘅食店。諗諗下我又好耐無食過上海拉麵，所以一於入去試一試...
![]()
|
| 霞飛 |
霞飛呢個名聽落幾詩意，其實名字係出自三十年代上海法國租界嘅一條道路，果陣中外人士雲集其中，同上海集大成嘅大都會特色不謀而合。呢間食店宗旨都係貫徹呢個精神，希望將大江南北地道食品帶俾顧客，但做唔做到就要睇下大家嘅意見喇～
![]()
|
| 開放式廚房 |
食店採用開放式廚房設計，師傅製作點心同拉麵嘅過程都一目了然，不過侍應笑容欠奉同埋效果較慢，會令人扣去唔少印象分... 不過當佢地見到我拿出相機同抄下筆記後，招呼明顯親切醒目好多...哈哈！
![]()
|
| 招牌擔擔麵($40) |
麵條做得幼滑彈牙，醬汁湯底花生醬味濃，辛辣程度可以自行決定。麵上豬肉碎粒炒香後好惹味，一陣香氣撲鼻，好味！當然詠藜園比佢更好，但呢碗... 我收貨！
![]()
|
| 鮮肉生煎饅頭($26/3件) |
以生煎包來講價錢唔算平，但份量總算交足功夫，上面嘅黑白芝麻粒組合，令到賣相更吸引，令人蠢蠢欲動...
![]()
|
| 勝在肉嫩 |
饅頭底部煎得金黃香脆，皮唔算薄但勝在肉嫩，餡汁亦充足，幾好食！
![]()
|
| 灌湯牛肉餡餅($26/3件) |
「突然有禮」嘅侍應上菜時提醒我，食果陣一定要小心。不過我無留意佢所講，只係被香噴噴而又炸得金黃嘅餡餅吸引住...
![]()
|
| 整體上合格 |
一咬落去就出事喇！餡餅湯汁好多而且好熱，好彩我食時餡餅頂部向出，否則我應該全身都係湯汁...肉餡豐盈多汁，外皮略嫌較厚而且較油膩。但整體上係合格好味嘅，不過我仍然覺得九龍城清真牛肉餅更合我口味...
![]()
|
| 服務上仍有值得改善地方 |
總括來講，霞飛雖然源出夏麵館經營方式，但服務上仍有唔少值得改善嘅地方，而考慮到尖沙咀食到呢個級數上海點心，坐得舒服，價錢總算合理。當然有比較下，我仍希望點心水準可以提升，增加多一啲競爭力會更佳～
霞飛點心拉麵尖沙咀河內道18號K11購物藝術館B226-B227舖
============================================
感謝 kent1012 提供以上資料
kent1012http://www.kentxfood.com/
============================================
