粉麵三部曲最後一章壓軸當然最精彩，呢間位於中環吉士笠街嘅水記，主打係各式牛雜粉麵，其實呢度有一樣最吸引我黎嘅食物 - 就係每日只賣兩碗（你無睇錯，真係兩碗）嘅....牛沙瓜！
![]()
|
| 橫街斜窄巷的水記 |
雖然只係橫街斜窄巷一間小檔，但其實都唔難搵到。大家去到中環中心對面嘅PCCW專門店，旁邊有條小巷直上就會見到熱鬧非常嘅水記！
![]()
|
| 牛雜 |
我去到見夠鐘都仲未正式開檔，問一下老闆，佢叫我坐多陣等湯滾好就有得食，我問佢今日有冇牛沙瓜，佢話一開檔一定有，但每日只賣２碗，慢少少都無得食，極之珍貴，順手影一影檔前果盤令人口水直流嘅牛雜....
![]()
|
| 酸蘿蔔 |
我坐埋位等食時，早已被檯面果樽酸蘿蔔深深吸引住，通常呢類自家製作酸蘿蔔都係要另外收費，呢度係任食唔嬲，我當然唔客氣啦～～
![]()
|
| 酸蘿蔔 |
蘿蔔醋酸味唔算好勁，但醃得相當入味，一羹羹食食下，已發覺半樽被我食晒～而坐我對面果位阿姐，見我食得咁開心，好似唔輸蝕咁～～最後我地兩個就瓜分晒成樽蘿蔔！
![]()
|
| 牛沙瓜河粉 |
牛沙瓜河粉黎喇！呢個珍品賣相有少少似牛肚，咬落去口感同味道係完全另一回事。外層皮薄有少少脆口，內裡味極甘膩，而且口感豐厚，牛味爆晒燈，不過膽固醇當然都唔少...
![]()
|
| 牛沙瓜 |
或者有朋友問，牛沙瓜到底係乜，點解每日只賣咁少？其實牛沙瓜係牛第四個胃，一隻牛只有一個夠二人份量的沙瓜，所以咁珍貴，仲要唔係度度都有得食！
![]()
|
| 未煮熟的牛沙瓜 |
圖中所見就係未煮熟嘅最後一份牛沙瓜，另一份？入左我肚喇～～～
![]()
|
| 炸門鱔雲吞 |
水記除左牛沙瓜，牛雜出名之外，另一個名物就係呢個炸門鱔雲吞。呢個炸雲吞唔需要蘸其他甜酸汁，因為雲吞上面已灑上鹽，食落香脆又滋味，餡料唔算太多，不過鱔味算在幾濃，作為一個小食，真係唔錯～
![]()
|
| 一大盤炸雲吞 |
臨走前見到一大盤炸雲吞咁誘人，引唔住買左幾包返公司同人分享，差唔多半小時車程，仍然脆卜卜！
![]()
水記價錢收費在中環來講真係好抵食，而且質素非常掂，我真係一路食一路讚不絕口，所以特登安排作為介紹粉麵三部曲嘅壓軸篇。如果大家有機會黎到而又食唔到沙瓜的話，呢度嘅爽腩，牛脆骨，牛心椗都口碑唔錯架，不妨試下！
水記中環吉士笠街2號牌檔
============================================
感謝 kent1012 提供以上資料
kent1012http://www.kentxfood.com/
============================================
