好食嘅粵菜，唔一定要花巧，賣相就算點靚都好，味道始終都係最緊要。位於中環一個相當隱蔽會所，正係今次要介紹俾大家食優質粵菜嘅好地方，食嘅雖然唔係珍饈百味，但呢度粗材細作嘅每一味順德家常菜式，實在非常出色...
![]()
|
| 菜乾豬肺湯 |
煲得相當精彩嘅一個老火湯，菜乾跟湯已二合為一，每啖湯水都感覺到香濃菜味，質素相當之高。另外大大碟嘅湯渣，材料可見斤兩十足，不過可能個湯實在太甜太好味，飲落好似唔多夠喉添～！
![]()
|
| 豬肺 |
豬肺有如豆腐一樣白滑軟綿，食落去質感細嫩，相當好味！
![]()
|
| 清蒸鮑魚仔 |
清蒸鮑魚仔又鮮味又大隻，蒸出來味道大家心裡有數，而最驚喜就係上面嘅薑蔥，實在好食到不得了，而且極考功夫！如果俾一碗淨薑蔥我，可以用來送下兩碗白飯，絕對無誇張～！
![]()
|
| 燒焗魚嘴 |
順德名物燒焗魚嘴同樣係不試不可嘅菜色，魚嘴分魚腦同魚下巴兩部份，同樣都係上粉過油後再炸。我唔喜愛食魚，亦被香味吸引試左一塊魚下巴，肉較少，但無可否認係令人回味無窮。魚腦部份聽友人講軟滑豐腴，可惜唔多合我口味...
![]()
|
| 炒桂花翅 |
炒桂花翅係呢度必叫嘅菜色之一，不試不可。但主角並唔係素翅，而係炒得極精彩出色嘅蛋花，蛋花炒得鬆香，加上銀芽爽口唔出水，功夫少啲都做唔到，而且微微滲出淡淡上湯味，加埋火腿鹹香，又係一個送飯嘅好菜色...
![]()
|
| 海參扣柚皮 |
海參扣柚皮上嘅芡汁味道做得非常好，濃度方面好適中。柚皮本身做得質感幾鬆化，濃湯精華入晒味，加上陣陣柚香，食落無澀味，的確令我對呢種食材有好大改觀。當然海參同樣扣得入味，咬口爽滑，絕對唔會失色俾柚皮！
![]()
|
| 肘子扒芥膽 |
肘子扒芥膽係我整晚食得最多嘅一味菜，外層係扣得入味嘅芥膽，將芥膽撥開後，就會見到中間放上原隻肘子，肘子即係經處理過嘅鹹肉，味道同金華火腿相若...
![]()
|
| 肘子 |
燴左濃湯嘅肘子鹹香全部入晒菜膽入面，咬落去香味撲鼻，加上菜本身又鮮甜又扣得腍，食落實在驚喜萬分～好中意！
![]()
|
| 紅燒炸子雞 |
紅燒炸子雞外皮炸得好出色，入口脆化甘腴，更帶麥芽糖甜味，而且雞肉食落軟熟，雞味濃郁，雖然已開始飽，但忍唔住都食多幾件...
![]()
|
| 生炒臘味糯米飯 |
最後黎嘅生炒臘味糯米飯，一早已知係呢度嘅名物，就算點飽都要試清底蘊。食落果然非池中物，糯米入口感覺乾爽，咬落煙韌無油膩，細味感覺到之前應用上湯去煮。加埋金華火腿，臘肉同蔥香其他配料，相信呢個生炒臘味糯米飯絕對係全城數一數二嘅極品！
![]()
|
| 裝修平庸但客似雲來 |
順德聯誼總會藏身於中環舊式商住大廈，雖然裝修平庸亦無賣廣告，但依然客似雲來，吸引唔少識食之人。呢度同其他酒樓唔同，一定要預先訂位點菜，到場後唔可以再作添改。呢餐一圍12人，每位$250，能夠食到咁高水準嘅粵菜，呢個價錢值對物有所值！
順德聯誼總會中環租庇利街17-19號順聯大廈3樓
============================================
感謝 kent1012 提供以上資料
kent1012http://www.kentxfood.com/
============================================
