泰Brunch了

假日的金馬倫道, 人少車少, 繼續與老友睇鋪位, 行了一整個上午, 少少腳軟, 專登安排最後一站於金馬倫廣場, 看見大型易拉架, 老友忽然一句: 泰Brunch喎...., 老友日文了得, 但英文則如一般日本人一樣, 續個音節讀出來, 於是, "泰Brunch"讀成"太笨X"..., 噴飯...我答佢:"係呀...你真係"泰Brunch了"...哈哈..., 無論如何, 泰式"早午餐", 聞所未聞, 下午無事做, 都好, 慢慢坐, 慢慢食.

樓上二樓店, 安排窗口位, 望到金馬倫道車來車往, 還看到對面大型廣告牌, 是近期大紅人, 遵理的林溢欣, 他的新聞, 全城人皆知, 但另一編花邊網上文章, 作者是IFC張智霖(佢自稱咋...)的作家葉朗程, 文章名稱:"如果我也是林溢欣", 作者幫林氏數身家, 遵理上市文件透露, 林氏過去三年的收入, 是一億五百萬, 真是零頭都夠買個上車盤, 而最巴閉係他只教了四年補習社, 絕對是遵理捧紅他的.. 但重點都不在此, 而是網文更多談論到, 彷彿補習社的老闆都是兩個顏色的人, 就是橙色和杏色 (唔明???... 哈哈), 但除了一位, 就是伍小姐的哥哥, 他們是否相識, 不得宜知囉...

新推廣餐牌, 只有星期六、日才有的泰式Brunch, 總共有七項: 頭盤(任食, 但每次只可選三款), 刺身, 湯品, 主菜, 粉麵飯, 甜品, 餐飲, 詳細的菜式, 可參考餐牌更清楚.

先來刺身, 後上頭盤, 合晒要求, 先吃生, 後吃熟. 刺身共有四款: 厚切三文魚, 大型班節蝦, 原殼生蠔, 巨型帶子.

Well...我並非日本魚生的原教旨主義者, 所以我絕不會像某些人一樣, 瞧不起三文魚, 甚至對其甚有好感...添... 這三件厚切三文魚, 鮮橙色的外型, 清澈明亮的白脂間, 無得輸吧...

泰式與日式有別, 不用醬油芥辣, 而是另配醬汁: 泰式酸辣汁和芝麻蕃茄汁. 巨型帶子, 未蘸醬汁前, 先試了一件, 鮮甜無比, 再放酸辣汁, 雖蓋過了原始鮮味, 但清新提神, 別有風味.

泰式生蝦, 班節蝦類型, 夠大隻, 灰色紋理, 肉質晶瑩, 爽口彈牙, 去殼, 切雙飛, 留尾殼, 蘸泰式酸辣汁, 再加一兩片生蒜和辣椒碎, 酸甜香辣齊晒, 最正.

泰式柚子沙律, 清新前菜, 加入泰國蝦乾、炸紅葱、腰果、青葱, 夠香口, 柚子酸酸甜甜, 口感多汁, 健康醒胃.

蒜蓉牛油雞翼, 雞翼大大件, 外層鬆脆, 蒜蓉味突出, 牛油香氣但不重油膩感, 唯一不足, 肉與略為硬實.

泰式炸魚餅, 魚漿捏成餅狀, 炸起後, 色澤金黃, 微微檸檬葉香氣, 味道豐富, 入口酥香彈牙, 配以紅蔥醬汁, 鮮香酸甜.

冬陰功, 泰文"冬陰"是酸辣, "功"就是蝦, 個中意思已經說明主要材料, 再加上檸檬葉、香茅、朝天椒、青檸檬等配料, 味道集齊酸辣甜鹹.

泰式豬手, 肥瘦剛好, 約三七分, 滷水香甜惹味, 炆得像東坡肉一樣, 軟腍味足, 外皮和中間膠質部份, 一起入口, 那種半融膠狀的感覺, 肥而不膩.

火車頭越南粉吃得多, 泰式火車頭炒飯甚少見, 這碟炒飯雖炒得未夠乾身, 但入口仍然粒粒分明, 配料與飯差不多是一比一.

泰式咖哩蝦, 以黃咖哩和雞蛋炒拌, 蛋炒得半熟, 質感滑漏. 大蝦爽口彈牙, 咖哩香濃, 味道鮮甜, 濃郁辛香不嗆喉, 配搭香脆薄餅, 鬆化中有煙韌.

芒果糯米飯, 傳統泰國甜品, 芒果絲滑般口感, 配上黑白雙輝凍糯米飯, 淋上濃郁椰汁, 清爽中帶軟糯, 香甜中有清香.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================