去了韓國working holiday一年多的好友終於捨得返來香港，
上年因佢身在韓國，冇得同佢慶祝生日，
今年一次補返兩年的生日飯，由佢決定餐廳。
以為佢在韓國咁耐，應該會揀其他地方的菜式，
點知佢指定要食韓珍，果然是韓迷一名。

原來佢揀韓珍除了食韓燒外，仲另有目的，
為了佢心愛的GD而來
聽佢講這店是GD父母朋友開的店，
佢一上到去就去左同GD的簽名相影相!
哈哈，怪不得佢揀這店啦~~~

餐廳環境寬闊，每張枱面都非常大，方便之後擺滿食物呢!!!
枱與枱之間分隔較開，一點也不侷促.

由於快到聖誕關係，所以添加了很多聖誕裝飾!
餐廳的燈光調得較暗，感覺比較新派，不像傳統的韓式燒肉店
不過燒肉最怕是唔夠光會判斷唔到燒熟未，又驚燶左
餐廳每枱的鐡板上方設有射燈，方便檢視食材的程度，GOOD

坐低後，店員送上了4款前菜：
辣白菜、醃蘿蔔、醃青瓜、沙律生菜 以及幾款調味料

我覺得抹茶鹽及鹽油汁配五花肉一流
座位還配備濕紙巾，就算整污糟手都可以清潔

見到餐牌第一版的八色五花腩，
之前見過一些韓國旅遊節目有介紹過，好吸引呀!
可惜店員話已SOLD OUT 呢~~

於是轉戰其他肉類， 選了蜂窩五花腩
其實唔知咩叫蜂窩，見到個名好得意便點了
總之有五花腩我就心滿意足

又選了豬肉拼盤，因為一次可試勻多款肉類
既然叫了豬五花腩，咁索性試埋牛五花肉吧

餐牌除了肉類外，還可選擇燒海鮮，龍蝦、大蝦、貝類等等 醬油蟹都好吸引呀!!
還有不少韓式熟食呢! 

點菜後，店員先送上雞蛋pizza，是免費的，呵呵
一定要趁熱食，好好味!!

店員一次送上兩款五花肉，好震撼
兩款的份量都比我想像中的要多

蜂窩五花腩
原條厚切的五花腩，肥瘦相間
上面已預先切了格子花，更易燒熟
當燒至金黃時，格仔花變明顯了，
真係有D似蜂窩喎!

當其中一條燒得差不多時，
店員很主動過來幫忙剪細五花腩
我地可以有手食已燒好的燒肉了
五花腩剪成小件後，可再燒得香口一些
因為五花腩肥瘦均勻，
所以燒耐一點也能保持JUICY
沾少許辣醬或鹽油汁後，用來夾生菜就好好味了

牛五花肉
牛五花肉是有預先醃好的，未燒已聞得到醃得好香
中間還有一小兜的調味醬，
不知是在燒前沾，還是燒好後才沾
我最初夾起一塊打算逐片燒時，
朋友阻止我，佢話唔係咁燒，
佢一次夾了一大堆肉，然後在鐡板上快炒

因為肉已切成薄片，佢快手地兜幾兜d肉就熟晒
一堆牛五花肉小山已在我的碟上
果然朋友這一年是不枉過，
d牛肉咬落仲有好多肉汁，
大啖大啖咁食，好過癮呢!

這牛五花肉因事先已醃好，
就算不沾調味料，都已好夠味
不過沾埋特製的調味醬，又別有一番風味，正!!

豬肉拼盤
豬肉拼盤已有豬頰肉、豬頸肉及調味豬肩肉

豬頸肉及豬頰肉 要像燒五花肉咁燒
因為兩者中間都帶有適量的脂肪分布，
所以燒至金黃，不單依然入口juicy，
也可把多餘的油份迫出，
口感可以造到外面香口，裏面肉質嫰滑
中間用小碗盛着的就是調味

豬肩肉
豬肩肉較瘦，也是切成薄片
所以用牛五花肉的快炒法來炮製
話咁快成個鐡板都是美味的燒肉了

店員還幫我們把伴碟的洋葱、南瓜、蕃茄等一併放入鐡板燒
洋葱配牛五花肉/豬肩肉一齊快炒實在太夾
吸收了肉汁，洋葱變得格外鮮甜

這次既然是跟朋友慶祝生日，
唸住再加點一個煎餅，上面插支蠟燭當生日蛋糕

店員得知我朋友生日，
他們推介了SPECIAL DISH<芝士仔>比我地，surprise!

一捧上來真係”嘩”一聲，好大的一盆
鐡板中間的大位置 裝了一些泡菜汁，
上面放了大大隻炸八爪魚
旁邊還有幾個小格仔，放了不同類型的食材：
年糕、香腸、西蘭花、香菇、彩椒、奇異果、火龍果同粟米

我同朋友講，這個好似新年的全盒

店員開了GAS爐，令中間的泡菜汁開始加熱，
煮到差不多時，店員開始將炸八爪魚剪開，
然後撈落已加熱的泡菜汁，辣辣地好惹味

原來泡菜汁也內有乾坤，
中間有不少牛肉片、芽菜，
用這個汁配飯食一流，
不過這次沒有叫飯，我改用旁邊的年糕都好夾!

店員又放上了一個奇怪的裝置，
上面有兩個小煎PAN，不知怎樣用，
店員稍後再送上了一盆芝士拼盆，
有mozzarella、cheddar等等，
原來那個裝置是用來整溶Ｄ芝士，

在芝士上放上黑橄欖及剛剛鐡板上的配料，
趁微溶時可包住D配料，弄成個芝士卷咁! 

店員試範了第一份，
我們便開始自由創作了，放自己喜歡的配料，
這個加了mozzarella，可以多少少芝士拉出來，
包卷食材時較容易
我個人比較鍾意cheddar加mozzarella，
味道夠濃又可容易包住D材料， 味道有點像食Pizza
有少許芝士沾在煎PAN上，變了芝士脆脆，好好味!

朋友話我知這菜式在韓國最近很受歡迎呢，
沒想到在香港原來也有!  
我笑說這個芝士仔，食得又玩得! 

餐飲：
左:士多啤梨 及 右:藍莓特飲，
都幾大杯，又唔會太甜，食燒肉一流! 

這次多虧我這韓迷朋友生日，
讓我嚐了一餐不同燒法的韓燒，
又試了韓國的新菜色。

============================================

感謝 問米婆 提供以上資料

問米婆 的網誌: http://www.openrice.com/zh/gourmet/reviews.htm?userid=50320141&city=hongkong

============================================