探險家攻略 > 城中探秘 / 旅遊 > 特色景點 / 古蹟 / 長線旅遊 > 嘉義。阿里山小火車﹑奮起湖

嘉義。阿里山小火車﹑奮起湖

由平凡人於 2015-12-21 21:40:00 發表 | 累積瀏覽 1067

分類：長線旅遊特色景點古蹟；地區：高雄,其他

< 台南﹑阿里山﹑高雄5天遊 >

第二天

今日就係去阿里山既大日子，阿里山係今次旅程其中一個重要行程，為左上阿里山事前做足準備，得到朋友相助行程非常順利，期待左好多成既阿里山之旅正式出發！

阿里山位於嘉義，而我仲身處台南所以要一早起身出門；6點起身6:45去到大堂check out，我係酒店餐廳第一個客人，想坐邊都得



呢道早餐係套餐形式而唔係自助餐，可以揀中式或者西式，我呢份係西式，三文治好好食架，係香腸奇怪一啲，唔係平時係香港食慣個款；呢餐係三餐酒店早餐之中最好既一餐，簡簡單單已經好好食

食飽就要出發啦！晨早天都未光晒，街道有小小冷清


唔知台灣八方雲集同屋企樓下個間有無分別呢（兩間都未食過！）

再次黎到台南火車站，琴日已經買好飛唔洗排除買，可以直接入月台



黎左部區間車，未到我坐個班要耐心等等



我坐個部終於黎啦，今次選擇坐自強號，停站比起區間車少好多，行車時間亦都快好多，當然價錢會貴小小



好多人上車，不過唔洗急，買左有座位既飛唔怕冇位坐

舒舒服服坐定定等落車



沿路景色好靚，咁早起身係會眼訓，不過望見咁靚既風景就算幾眼訓都唔可以訓著



咁岩又有車長查飛


大約45分鐘車程，8:15準時到達嘉義站



嘉義站比想像中細好多，一出車站就見到賣阿里山小火車車票既售票處，要買小火車既飛就一定要係呢道買，普通火車站售票處係買唔到

阿里山小火車既車飛係非常之搶手，車票可以預早14日用電話訂，但我唔記得左呢件事到13日前打電話時已經冇晒，好彩3日比錢限期過左有人冇比到錢，再麻煩台灣朋友幫我打電話訂票（其實我都唔知係8點開始訂，好彩朋友知道，感謝x10000），由8點開始打左41次電話終於打通成功訂到呢張飛，真係得來不易，而家我只要排隊用護照就可以拎到火車飛啦！排隊時見到前面既人都好似買到火車飛，不過只係站票冇座位票，但總好過冇既，今日係平日應該唔算多人，如果係假日旺季人多個時我諗站票都好難買到

阿里山火車車票到手


嘉義站個feel同台南站好似

我黎啦，由嘉義坐到奮起湖車費只係NT$240

等左咁耐個心已經飛左去小火車道，拎到飛好快就入到月台睇火車，小火車就停係嘉義站一號月台



阿里山小火車正式叫「阿里山森林鐵路」

E...車仲未到bor...阿里山森林鐵路之所以叫小火車，係因為路軌軌距比普通火車小，香港火車地鐵用1435mm軌距標準軌，台鐵用1067mm軌距窄軌，而阿里山森林鐵路用更窄既762mm窄軌，路軌小火車都比較小，所以就叫做小火車

嘉義站係阿里山森林鐵路起點，下一站係北門站



我坐車頭，行到最前等車

就快9點，小火車終於到啦

期待左好耐終於可以近距離見到阿里山小火車真身，細細部好可愛

呢個就係小火車車頭，係唔係好奇怪呢？因為火車要爬上好斜既山路，為安全起見所以火車車箱都係車頭位置，提供動力推動火車既火車頭係最後位置，咁可以減低車箱之間既連結器負荷過重造成斷裂既機會，就算車箱真係出問題都有火車頭係後面頂住，唔怕碌晒落山

我就係坐第一卡啦

就快開車快啲上車先！車箱比普通火車細，座位用2+1排列，我坐右邊單人位好舒服；呢班車好難買到飛，同車箱有一半係大陸旅行團，有幾個外國人，仲有兩個香港人，唔知佢地點買到車飛呢？

跟著森鐵去旅行，由海拔30米嘉義站出發！

一眨眼就去到下一個站「北門站」；北門站距離嘉義站只係1.6km，呢道可以話係阿里山森林鐵路真正既起點；北門車站1912年已經啟用，當時就係阿里山鐵路起點，後來為左方便乘客坐車先將路線延長到嘉義站

落車影下相先
呢個站有唔少人上車，停車時間長一啲

舊既小火車車箱

舊車站建築

上返車之後坐一陣就去到下個站「竹崎站」，我又落去影下相先；竹崎站海拔127米，係小火車上山起點，經過呢道火車就要離開平地路段努力爬山

呢道距離嘉義有十幾公里，冇遊人上落啦

見到呢道有咁多路軌，原來竹崎站曾經係一個好重要既車站，以前蒸汽火車年代蒸汽火車頭會停係竹崎站換車同換位置，換部勁啲既火車頭同由前拉改為後推

後來火車頭決定全線固定係車尾後面推火車上山之後，呢道就變得唔再重要lu，而家人影都唔多個

同其實登山鐵路比較，阿里山森林鐵路有咁多星星，即係好勁啦，哈哈

準備向下一站「樟腦寮」出發

火車努力上山
係平地時部車都搖得好勁，行山路咁多灣仲搖得勁，好彩個位搖下搖下都坐得好舒服

火車係山之中前進，沿路好多地方都係荒山野嶺，就算有站停車都係一啲無人站，最多都係得一兩個行山客上落車



越上越高啦



上到海拔741米高既獨立山站，呢道有唔少行山人士落車；呢道停站只係一兩分鐘，我好快落去望兩望影幾張相就上返車，不過同車另外兩個香港人落左去唔知係咪掛住影相，部車關左門準備開車先返來拍門上車，結果比職訓示一餐，自始之後佢地就算停站都唔敢離開車箱，唔只佢地，我地全車人包括我都冇人敢再走出去...不過走左火車都唔驚既，開車後火車已經有廣播教大家點做，只要留係原地乖乖地等到下午就有落山既火車接返大家，哈哈

經過螺旋型路線，環繞獨立山3圈之後上到海拔904米「梨園寮站」，呢個站全車乘客都唔敢再落車，我企係門邊影張相就算啦

已經身處高山之中

經過兩個幾鐘車程，終於黎到今程車總站，位於海拔1403米既「奮起湖站」；由嘉義上到奮起湖路程45.8公里，車程要兩個幾鐘，所以火車係行得好慢架；雖然話車程要咁耐，部車坐得咁舒服，而且一路行一路睇風景，唔經唔覺就黎到啦，完全唔覺得辛苦，如果坐巴士上黎就辛苦啦，風景仲冇咁靚tim

奮起湖站係阿里山森林鐵路本線之中最大既一個站，以前蒸汽火車上落山要係呢道補充煤水先可以繼續上路，所以呢個站特別重要；大家覺唔覺得奇怪，點解阿里山鐵路總站係奮起湖而唔係阿里山？其實本來係有火車由嘉義直上到阿里山車站，好可惜2009年八八水災鐵路損毀，等到今年火車路線終於修理好，九月時仲成功試車由嘉義北門站開到阿里山站，預定今個月25號全線阿里本線可以複駛，不過大家開心左半個月到十一月時颱風杜鵑又吹爛左條鐵路，而家仲係通車無期...

火車暫時會停係道，下午先落山



11點半黎到奮起湖，預計會坐2:40個班巴士繼續上阿里山，而家有大約3個鐘可以係奮起湖四圍行

除左呢班車之外今日都唔會有其他車到，大家都放心係路軌行



已經行左大約3份2路程，仲差小小就到阿里山啦


奮起湖雖然有個「湖」字，不過同我地平時見慣既湖係冇關係，呢道係唔會見到一個真正既「湖」

要講奮起湖最出名既野，除左小火車之外就一定係鐵路便當，係火車站旁邊就有一間，以前上落山既火車需要行走好長時間，去到中途站奮起湖大家都會買個鐵路便當做午餐，呢道就出現左鐵路便當呢個特別文化

仲未肚餓唔食便當住，先去到火車站旁邊既奮起湖車庫參觀

車庫存放左幾部火車頭

已經退役既蒸氣火車頭都可以係呢道搵到

18噸等級蒸氣火車頭，專門行走平地段



更大既28噸等級蒸氣火車頭，專門行走山路段



細細部好可愛既工程車

呢個模型係介紹火車圍住獨立山轉圈上山；係獨立山個時我係感覺唔到佢轉緊圈，只知道經過好多隧道



上山既火車路暫時都冇車行，唔知等到幾時先可以坐火車上阿里山呢？

山區冇街市，要買餸可以係呢啲小貨車買

回望火車站



阿里山森林鐵路係日治時代已經建成，當年係為左運送山上阿里山林場出產既林木興建，林場自1963年結束營業後，阿里山森林鐵路就變成客運同觀光路線，載聚多居民遊客往來阿里山，我就係其中一個！