探險家攻略 > 逸亭餐廳 The Gazebo Restaurant：冬至、聖誕同樂逸

7 逸亭餐廳 The Gazebo Restaurant：冬至、聖誕同樂逸

由山區麵包王於 2015-12-22 00:00:00 發表 | 累積瀏覽 1242

分類：

年年親戚做節，無論團年、端午、中秋，抑或冬至，都喺搞中式，晌附近嘅街坊酒樓或者連鎖酒家，平平哋擺兩圍高興吓。今年嘅冬至就破例少少，有親友睇見利景酒店嘅逸亭做團購（其實，依間嘢都長期有做），建議食自助餐，順道慶祝埋聖誕節，連加一大小同價$265，晌群組咨詢下，一呼百應好快成事。

唔知喺有緣定巧合，今次已經喺第三次嚟，不過，對上兩次已經喺2007年同2013年嘅事，都相隔咗一段長時間，環境都無乜點變，只喺因為就快聖誕，就多咗啲聖誕裝飾。

因為冬至有早放，所以，可以提早少少到達。趁人未多，先巡視一下現場，睇睇有咩好食，兼影吓相。其實，晌買個團購時，網頁都列晒有咩菜式，睇嚟都幾吸引，不過，網頁底下一句「餐牌內容或會因時令或食材供應而稍作調整」，就心裡有數與實際有出入。不過，以自助晚餐計，只喺兩舊半多啲，對比起四、五星酒店嘅餐廳賣五、六、七百蚊一個自助餐，所以，晌度都唔好抱有太多期望。

先介紹吓依度有咩食，等大家有個參考，之後再分享小弟是夜食過啲乜，味道又喺點。好喇，立刻去片：

沙律
一邊廂黐住刺身依邊有3大盤新鮮沙律菜、4款醬汁（千島汁、蜜糖芥末汁、油醋汁、芝士沙律汁）、6款配料（黑橄欖、青橄欖、鯷魚、麵包粒、煙肉碎、芝士粉），款式跟以前無乜點變，醬汁都喺依4款，但喺，少咗蔬菜類配料（如三色燈籠椒、紅菜頭、車厘茄、粟米粒……），陣容上肯定比以前退步咗。

另一邊廂黐住冷盤嗰邊仲有3款預製好嘅沙律，包括：泰式金不換扎肉粉絲沙律、千島菠蘿海鮮沙律，以及一款小弟以為喺普普通通嘅吞拿魚沙律，原來大有名堂叫法式尼高斯沙律（吞拿魚、蛋、紅腰豆）。至於有一款叫鮮露筍亞枝竹芝士沙律就未見有露面，依個沙律反而喺小弟期待想試。

刺身、壽司、卷物

順便講吓有咩刺身：三文魚、吞拿魚、劍魚腩、甜蝦共4款，要幾多就搵師傅切幾多，師傅都幾手鬆，件件厚切，怕你唔夠食咁。而側邊兩大盤壽司、卷物，相片記載就有三文魚、赤貝、鰻魚、北寄貝、甜蝦；卷物睇落都有三幾款，如加州卷、太卷……等等。因為兩者都無食，就唔知後期有無轉款。

餐湯

原先團購餐牌話中湯喺人蔘雞湯，而西湯喺美酒龍蝦湯，實際只喺粉葛赤小豆豬骨湯及野菌忌廉湯，所謂配意式麵包及香脆麵包條，都只喺晌甜品嗰邊個暖櫃有啲頗硬嘅小圓包，依部份個落差比較大。

冷盤

有煙三文魚，但就唔見有煙鮫魚，另一邊嘅什錦凍肉拼盤就確喺有頗多款式，如意式凍豬腿、巴馬火腿、沙樂美腸、黑椒牛肉、煙火雞，睇落唔錯，所以，小弟都有試勻咁多款。

芝士板

我記得以前佢哋都提供唔少芝士，仲列明款式，不過，依家同樣款式多，但就唔插名牌喇。5款芝士分別喺羊奶芝士、金文畢芝士、藍芝士、車打芝士及一款唔太知叫咩名，可以配梳打餅或果乾同食。

冰鎮海鮮

常設有松葉蟹腳、翡翠螺、蜆、中蝦、藍青口，至於琵琶蝦就久唔久先出得一次，總算喺跟團購個餐單一樣。

熱盤

金銀蒜蒸扇貝只喺晌第一輪見佢出過一盤，之後成晚都未見過，而熱盤期間都見有轉過款，所以，有啲咩熱盤，都喺大概憑相記低，包括：炒什菜、地中海清燒鱸魚、清蒸東星斑（後期轉款菜式）、蜜汁煙豬柳、炸薯寶、德式啤酒焗羊架、香燒羊髀、芝士鴨肉醬粗通粉、日式和牛酥盒、香煎三文魚、XO象拔蚌西蘭花、什菌炒飯、古法豬腳薑蛋、薄煎牛柳配鵝肝醬汁……等等。至於紅咖喱芝士配印度薄餅、日式海膽炒飯就唔多覺有供應。

車仔麵檔

過番去近門口位，有車仔麵檔、薄餅檔、鐵板料理，不過，團購餐單話有聖誕節日限定特式薄餅（餡料包括火雞肉、火腿、水牛芝士及金巴利汁……等），但實際是日喺無薄餅供應嘅。而麵檔有超過10款車仔餸、2款菜、4款麵條，可配清雞湯或喇沙湯。

金牌海南雞飯

麵檔附設埋海南雞飯，配埋黑豉油、辣椒醬及薑蓉，對上一次有試佢嘅海南雞飯，印象中喺唔錯嘅，不過今次就無試。

鐵板料理

話就話有韓式烤肉：牛肉、牛脷、豬腩肉、雞柳，實際全無，只有香煎鵝肝。

銀燒車

因為時近聖誕，除燒美國西冷外，仲有燒火雞配金巴利汁、燒汁，以及聖誕火腿配黑松露紅酒汁。

甜品、生果
對於逸亭嘅甜品，我就記得喺好般啫，又睇吓聖誕關係，會唔會質素有所提供。至於款式都算OK，有聖誕樹頭蛋糕、聖誕曲奇、聖誕麵包、馬卡龍、泡芙山、美國芝士蛋糕、意大利芝士餅、特濃朱古力餅、紅桑子慕絲蛋糕、蘋果金寶、木瓜雪耳、豆腐花、窩夫機、Dreyer's 雪糕（芒果、士多啤梨、薄荷朱古力）、雪米糍，期間有轉過款，但大致都喺咁上下，而馬卡龍擺出嚟一次就無再出，所以，初時影過相之後無拎就無機會試，表姪女就醒呀，一開始就拎三、五個自己埋位慢慢嘆，佢就真識貨。

任飲汽水，只有百事可樂同七喜兩款選擇，好普通。另一邊有自助即磨咖啡機，紅茶及檸檬片，都喺大多數自助晚餐好基本嘅供應。

因為一早就到，所以，可以由6:30pm食到9:30pm，慢慢食，邊食邊同親友打牙骹。以下，喺時候分享小弟食過乜。

沙律、冷盤
小弟食自助餐嘅慣性，第一碟就喺沙律，唔單因為多食菜幫助消化，更有效開胃，經驗所談真喺食得多啲嘢。幾款沙律菜拌點蜜糖芥末汁，糝少少煙肉碎、芝士粉，再加啲現成嘅千島菠蘿海鮮沙律，伴煙三文魚、意式凍豬腿及黑椒牛肉片，作為頭盤，喺超豐富。難得啲沙律菜幾爽脆，菠蘿海鮮沙律又幾清新，意式凍豬腿夠咬口，成道「頭盤」都非常好食。

野菌忌廉湯、粉葛赤小豆豬骨湯

兩款湯以後者老火湯好啲，入口較潤，味道較濃，至於個西湯只喺一般忌廉湯再加入野菌粒，湯底本身無菌香，猶如港式豉油西餐嘅級數。

海鮮、刺身

海鮮同刺身都攞齊咁多款，一碟過，雖然無生蠔，無龍蝦，都搵隻琵琶蝦撐撐場，所以，睇落碟「海鮮拼盤」算幾有睇頭，不過，琵琶蝦跟龍蝦比質素都喺差一截，肉質無咁爽口。然而，啲松葉蟹腳、翡翠螺、藍青口就幾好食，松葉蟹腳仲帶幾重海水味；相反，個人覺得啲刺身就好一般，劍魚腩、吞拿魚入口有少少冰感，甜蝦有點霉，三文魚就相對較好，入口油潤。

熱盤、烤肉

熱盤揀嚟香煎三文魚、香燒羊髀、薄煎牛柳、蜜汁煙豬柳、炒什菜、日式和牛酥盒，概括嚟講，味道中規中矩，當中嘅香燒羊髀及薄煎牛柳較得小弟歡心，軟腍又富肉香，羊髀帶少許羶就更滋味；因為慢慢嘆，所以，輪到去銀燒車時，烤肉剩番唔多，薄切兩片燒美國西冷，燒得中心位仍喺粉嫩，食落質素不俗。

車仔素菜

要碗車仔麵實在喺太大負擔，同老婆夾份要碗車仔素菜就上算啲，菠菜配點什菇，加喇沙湯，嚟一客自家「濃湯浸時蔬」補充一下纖維質就最好不過。

甜品拼盤、雪糕窩夫、甜筒

以往甚少同一大班親友食自助餐，所以，當最後捧嚟一大碟自選甜品拼盤時，都被佢哋話我原來咁擦得，其實因為依度款式唔算多，又唔太特別，所以，今次算少喇！份拼盤揀咗心水嘅聖誕樹頭蛋糕（應吓節）、泡芙、美國芝士蛋糕、意大利芝士餅、紅桑子慕絲蛋糕、蘋果金寶，雖然稱唔上有驚喜，但水準平穩，小弟認為做得出色喺紅桑子慕絲蛋糕同蘋果金寶，前者酸香柔滑，後者酥香鬆脆。一邊食甜品，一邊飲住咖啡，雖然咖啡喺即磨，但感覺麻麻，可能喺豆嘅質素。

食完第一份甜品，個胃仲有唔少虛位，夠食力添多一份窩夫。講開窩夫有段小插曲，就喺窩夫機要自己搞，表姪女唔喺太敢亂搞，一搞就搞成底番嚟，我就梗喺搞1/4底就夠啦，不過，佢部機話烘3min，其實都過長，烘到我件窩夫變咗「朱古力味窩夫」添，雖然燶咗少少，但變得好脆口。配上兩球Dreyer's 芒果及士多啤梨雪糕，淋啲朱古力漿，灑啲果仁碎，好味！

今晚真喺幾好戰鬥力，所以，臨尾加多一小個甜筒。既然有啲朱古力漿，自不然做埋個脆皮面，咁食自助餐先好玩喺。之後，啲表姨甥個個都跟風出去整，最搞笑失手連個雪糕球都跌埋落人哋啲朱古力漿度，哈哈！

生果

成晚食咁多嘢，梗要食番多少少生果再幫助吓消化啦，新鮮西瓜及菠蘿就最啱我。

因為打從嚟之前都知佢嘅質素大概去到邊，可謂心裡有數，所以，就晌無抱太多期望之下，今晚食到嘅都算符合預期。咁你俾兩嚿半多啲，點都以番依把尺去衡量，單以食物種類、款式、質素嚟秤，可以話喺OK嘅，唯一較大落差就喺餐湯、鐵板料理、薄餅依幾個類別，殷勤嘅服務當喺搭番夠數，因為目測所見今晚都有八乘幾滿，收碟、食物補充都算做到足。最緊要喺一班親友食得開心盡慶，大家食足3個鐘，相信個個都滿足而歸，破破例食吓西式賀冬至都唔錯吖！

個人評分
味道：7/10
環境：7/10
服務：7/10
抵食：8/10
平均每人消費：HK$265（團購價）

餐廳資料：
逸亭餐廳 The Gazebo Restaurant
灣仔灣仔道209-219號銅鑼灣利景酒店1樓
2892 3388

=============================================

感謝山區麵包王提供以上資料

山區麵包王的網誌: http://garycwm.blogspot.hk/

=============================================

鐘意SeeWide的分享，給我們一個Like吧！