探險家攻略 > 城中探秘 / 旅遊 > 特色景點 / 博物館 / 古蹟 / 其他 / 長線旅遊 > 台南。安平古堡

台南。安平古堡

由平凡人於 2016-01-22 20:00:00 發表 | 累積瀏覽 479

分類：長線旅遊特色景點博物館古蹟其他；地區：其他

< 台南﹑阿里山﹑高雄5天遊 >

第三天（續）

離開阿里山後，經嘉義轉車返台南，台南係一個歷史文化氣息非常重既地方，所以我選擇係台南留多一日，參觀台南歷史古蹟


入到嘉義站，第一時間就係買車飛，買好後都冇時間四圍行就直接去月台，下一班自強號好快就到



今次坐中柴油自強號，無論開車或者停車引擎聲都非常大，好彩唔係坐好耐冇咩所謂，不過有得揀最好都係唔好揀呢部

再次黎到台南啦


黎到台南第一件事就係要返去酒店拎背囊，今晚係星期六特別多人住酒店，之前住開個間冇晒房，所以要搬去其他地方住，星期六既酒店價錢比平日仲貴好多tim

唔知台南今晚有咩節目呢？封晒成條街又有表演睇

今晚住既hostel係一條寧靜小巷之中，沿路冇招牌又冇指示，好彩佢都有先見之明book房時會比埋地圖，冇地圖一定唔會搵到，就算有地圍都好難搵得到



小巷最入就係今晚要住既地方，都係冇招牌


放低背囊就出去搵野食，行去附近既新光三越，個道應該算係一個旺小小既地方，有大商場又人多車多



其實...我黎呢道既目的唔係為左行街，我係黎食麥當勞咋，係地圖上見到呢道有麥當勞所以一定要黎，事關未係台灣食過麥當勞點都要試試

試下香港冇得食既野先

塊雞肉辣過香港個啲好多，好辣丫


食完麥當勞就返hostel lu

今晚住係Leo Ho Hostel，細細間得黎又幾精緻



四個人一間房，入面有廁所



每個人都有一個儲物櫃

有好多插蘇位差電，而且仲有兩個香港三腳插蘇位，一次差幾樣野，正！

我訓下面床位
呢道唯一一個唔好既地方就係我個位收唔到電話訊號，而且wifi又連唔到，想訓係道上網就要用手舉高部電話，一係坐出黎用...訓上格就冇呢個問題；除左呢樣之外其他都唔錯

今朝晨早就起身睇日出，今晚都係早啲訓



第四天

今日终於可以輕鬆一下，唔洗再咁早起身，訓到8點幾先慢慢爬起身（不過7點已經醒左，習慣左早起）

今日想去安平個邊玩，寄存好個大背囊就出發啦；一出到大馬路就見到部台灣好行99號車行過，即刻跑上去追車

16分鐘車程去到安平古堡站落車，好快到



落左車未去古堡住，先睇下附近有咩好食先，早餐都未食架



安平有好多古蹟



郵筒都有安平地道劍獅圖案



安平豆腐花好出名架，呢道有好多唔同豆腐花店，早餐食豆腐花係奇怪小小，唔緊要食左先算

呢間算係安平最出名，就食呢間


晨咁早冇咩人

豆腐花都有好多選擇

我食呢個，好好食！

食完就去今日最重要既目的地「安平古堡」

朝早街上面未有好多人



入去啦

門票只係NT$50，好平

一入門口就見到有導賞員準備開始講解，不過就勁可憐叫左幾分鐘都冇人參加，咁我就做佢第一個團員啦，之後就越黎越多人；安平古堡導賞係免費，呢位導賞員仲講得超好又有趣，跟住佢可以識到好多關於安平古堡既野，10000個推薦

安平古堡古稱熱蘭遮城，最早由荷蘭人建於1624年，曾經係台灣最重要既地方，經過咁多年安平古堡曾經多次重建，變成而家見到既呢個樣；當年熱蘭遮城遺蹟只係得返呢道牆咋，而家係國定古蹟



以前冇水泥，中間由糖水﹑蠔殼﹑灰等等建造而成，導賞員有講過點解用糖水都唔會有蟻，不過我唔記得左...

導賞員話呢個位影相最靚



小朋友坐住既呢舊石據說好特別，全世界係等得台灣唔知邊個離島先有，台灣本島都冇

當年熱蘭遮城就係咁樣

導賞活動大約一個鐘結束，我都重新係安平古堡慢慢行一次；今日天氣超好，大大個太陽係頭頂，話就話係11月秋天但我估有成30度，好熱！

地下仲有遺蹟未發掘出來



無論行去邊都可以見到高塔



唔知啲大炮係真定假呢？

個個黎都會影呢個牌

其實牌後面有段故架，以前後面係有字，有一日蔣總統去台南參觀呢道，啲士兵怕幾個字得罪總統所以摌晒佢，至於個幾個係咩宇我就唔記得啦...

鄭成功係荷蘭人手上成功收復台灣

啲樹好得意



行上去上面睇下先



蛋白花既樹



清朝時安平古堡曾經做過軍裝局

室內地方有安平古堡歷史相關展覽



可以行上塔上面睇風景



安平區冇咩高樓大廈，四邊都睇得好清楚

最後行埋入面一個博物館，係安平古堡留左兩個半鐘就離開；安平古堡都算多野睇，又令我知道好多安平同台灣既歷史，好鐘意呢道

出返黎啦，人多左好多



門口有好多懷舊玩意，又有好多小食，呢啲玩意香港曾經出現過，細過亦都玩過，不過而家香港應該唔存在啦



行去安平老街人就更多

而家要先搵地方開餐，今餐會去食安平好出名既蝦卷，連台灣本地人都推薦我相信一定好好食，哈哈

鐘意SeeWide的分享，給我們一個Like吧！