鮮味大測試...

絕對不起眼的位置, 住係附近都無留意, 今日約了同事吹水才知道, 原來之前個間"日式咩咩咩..."關門後, 便開了這間....一睇個名, 你大概估到了吧... 韓潮又殺埋身了....

韓潮停不了.... 以為炸雞熱潮已過, 誰知又來一樣新花款: 層層疊疊蒸煮式火鍋, 檯上裝置了火鍋爐, 大約十多二十分鐘, 便可以把層層海鮮塔內的食物蒸熟, 蒸海鮮滲出來的湯汁, 會流入底層, 所以底層都會預先放入生米和些少配料, 食到最後, 便可以嘗到十分美味的海鮮湯粥

睇店舖自己介紹..., 咁樣樣講喎....即使韓國的店, 賣這種菜式, 都是在廚房把海鮮略為煮一煮, 待半熟後才取出, 放客人面前再蒸熟..., 但此處自稱其將會全用生的新鮮食材, 放客人面前蒸..... 是實上... 如果兩者都是新鮮的食材, 我真的不知道分別有多大.... 可能我的功力太輕, 太小分別實在吃不出來....哈哈... 不過, 我甚喜歡這種不加調味料的蒸煮方法, 實在是對店鋪的大考驗, 食材水準, 一試便知好壞....

檯上即蒸海鮮, 蒸爐火力特別猛烈, 普通貨式.... 唔得囉, 一定要"桑拿火鍋", 再加上一枝溫度計, 睇住溫度續級上升, 心情有些少興奮... 唔知算唔算...唔正常呢..??

三款醬汁, 由左起, 第一種, 那位十分有禮貌的靚女店員強調, 是淡身豉油, 點解淡身??? 因為新鮮海鮮, 原味最重要, 如果豉油太鹹太重, 會蓋過食物味道...喎... (好似係...), 中間那隻黃色的... 我只記得她說過, 是用來蘸蝦的, 我試過... 有些似"燒鵝醬", 右邊的是辣醬, 靚女店員再三提醒, 大致上係咁既意思: 無必要就唔好點喇, 食海鮮, 最緊要係鮮味...吖麻... 而我和友人之後就不停地留意住那位靚好店員, 一見她行開了, 我們就點那些醬... 哈哈哈哈哈哈.....

打開第一層, 中型大小的蟶子和象仔蚌仔, 肚子餓, 先消滅那件小勝瓜, 蟶子上的小番茄, 熱到辣親咀, 蟶子蒸得的時間剛好, 入口鮮甜嫩滑, 象拔蚌仔已經切成幼條, 質感爽脆不韌.  

海蝦絕對是新鮮爽口, 大蜆略為韌了一點, 但新鮮度不容置疑, 入口十分鮮甜. 還有扇貝..., 友人話, 兩隻都是女性.... 我...吓了一聲, 以為他講"爛gag", 何以見得呀??! 原來他也是生物學(扮)專家.... 雌性生殖腺是橙红色, 雄性生殖腺則是乳白色... 比佢講完一輪, 我只係食咗圓班白色部份, 其他位置的.... 哈哈哈... 

型狀頗大連殼的北寄貝, 日式用北寄貝做刺身或壽司, 只會用北寄貝內的某個部份, 網上查一查, 無講喎, 但看圖識內臟.... 就知道, 通常吃的都只是那紅和白色的位置, 其實即是"足部"... 無錯! 即係貝類用嚟行走移動的身體部份, 因為其他部份都是內臟, 不適宜生吃, 今天用高溫蒸熟了, 終於可以一嘗. 北寄貝連海水蒸熟, 肉質豐腴鮮甜. 伴海鮮一起蒸的, 還有蘿蔔, 南瓜和番薯, 有滋潤之作用.

頗為特別的韓國蜆, 據聞...(又係網上找一找...)名稱是"夜明珠", 味道和質感類似小型北寄貝, 龍躉肉, 大魚的魚味通常不及細魚, 但全完不腥, 而十分嫩滑, 肉蟹又是另一高水準之作, 入口一咬, 已經肯定肉質上盛, 食完全隻蟹, 友人也同意, 沒有一處肉是梅的, 十分滿意.

此圖重點, 當然是"鮑魚", 友人又义一句: 鮑魚是鮑魚, 九孔是九孔, 當然, 九孔也是鮑魚!.... 而九孔也不是鮑魚的童年時代, 九孔是養殖貝類, 但都是高密度養殖之品種, 如果把九孔跟澳洲養殖的鮑魚, 一樣放到大海來養, 也可能會產出如澳洲鮑魚一樣大的九孔.... 那到底九孔好味?還是鮑魚好味呀?? 我自問品味低, 唔識分, 請教專家... 專家話: 九孔口感滑嫩, 味道較淡, 最好用嚟清蒸, 而鮑魚則肉質扎實,  爽脆彈牙, 適合生食或日式佃煮.... 我..."哦...."咗一聲 (心裡則..."超..."咗一聲), 然後把鮑魚放入口...: 又係喎.....   哈哈....

韓式豬手湯內有珍珠米, 年糕和蘿蔔, 加入了海鮮汁, 食完上層所有海鮮, 米已煮成泡飯, 並滲入了由上面流下的海鮮汁, 味道清甜, 些少鹹香, 食完也不覺飽滯.

============================================

感謝 oasiswong 提供以上資料

oasiswong 的網誌: http://www.openrice.com/zh/gourmet/reviews.htm?userid=85184&city=hongkong

============================================