之前幫襯過樂天皇朝好幾次，八色小籠包當然一絕，其他菜式亦高水準，所以，佢哋嘅姊妹店開到嚟香港，自然投其信心票。位處奧海城嘅「樂天客棧」，交通尤為方便，今晚同朋友嚟食晚飯，因為佢哋就晌附近返工。
相對「皇朝」，「客棧」依一邊就顯得平實親民，裝潢樸實而摩登，光猛闊落，所以，空間感足，讓人感覺舒服。聽朋友講，嚟奧海城個場食飯嘅人都比較慢熱，所以，我哋7:00pm嚟到都唔喺咁多人，但到8:00pm就座無虛席。
雖然稱為客棧，但唔會得小菜兩道，翻一轉餐牌，原來菜式甚多，由湯、冷盤小吃、豆腐、肉類、海鮮、蔬菜、飯麵、拉麵、到甜品，概略計一計有近90款食物，不愁無嘢唔啱食。而菜式喺揉合南洋風味及東南亞香料嘅中菜，例如醬料上加入娘惹咖喱醬、參巴醬、冬蔭功醬、南洋咖啡漿……等等，有不少頗有心思！亦鍾意佢哋大部份菜式都分咗大、中、小份量，方便點菜更有彈性。
![bowl]()
話梅車厘茄 $12
餐前自家醃製嘅指定小吃，車厘茄已經去皮，入口少少冰涼，清爽而帶話梅嘅酸香，開胃醒神。
樂天客棧都好注重湯水，餐牌內提供4款燉湯供選擇：天麻藥膳豬肚湯（$138）、經典鹹菜鮮鴨湯（$138）、原盅藥材燉雞湯（$158）及乾貝菜膽竹笙炖湯（$168），講明每盅可供3-5人享用。另有每日靚湯，$42 / 位。
![bowl]()
經典鹹菜鮮鴨湯 $138
將湯渣撈起，半隻鴨加鹹酸菜，貨真價實，而且，鴨湯煲過湯後更軟腍，當然，鴨味會褪些少。份量就十足，味道又如何？飲落甘甘甜甜，嗒落既有鴨肉引出嚟嘅肉香，又有鹹酸菜帶出嚟嘅酸，整體喺香而不濁。
![bowl]()
咖啡脆雞 $86 / 小
樂天皇朝曾經推出過一道「香濃咖啡骨」，但做完推廣後就無再納入正規餐牌中，道菜嘅濃香咖啡味我仲念念不忘，估唔到晌度遇上脆雞版本，咁就一定要重溫啦。依然賣相色澤深到近黑，絕不討好，不過，脆雞非常好食，皮脆肉嫩，但咖啡味似乎無以前咁香濃。
![bowl]()
青芥末蝦球 $128
同樣喺尋回滋味，上次晌樂天皇朝試過依道菜式，所以，推介俾朋友試試。一客6隻，沾滿芥末蛋黃醬嘅蝦球咪睇佢青青綠綠，其實芥末味含蓄唔攻鼻，惹味得嚟易入口；蝦球大大粒，爽彈帶鮮，用料絕無欺場，就連脆米盞都脆口又幾好食；伴以蟹籽、蘭香子及芒果粒，好睇、好食、又有特色嘅一道海鮮菜。
![bowl]()
家鄉鹵元蹄 $118
百零蚊一份嘅招牌元蹄真喺好抵食，最欣賞喺佢哋連埋熱爐及大盅上枱，令元蹄保持一定熱度，唔怕攤涼咗啲油脂凝固。睇餐牌中嘅介紹，既加入中草藥同香料去熬製，又煮足六個鐘，放上芫茜，嚟到已香氣四溢。骨肉被炆到輕易分離，雖然話喺元蹄，亦無想像中咁肥膩，皮下脂肪位入口即化、油潤甘香，瘦肉部份軟腍入味。
個滷水汁底稀杰度啱啱好，濃香不濁，點可以唔叫碗白飯（$9）呀！
![bowl]()
雙菇扒西蘭花 $98
樣樣肉，自然要有一道蔬菜平衡吓好啲，菇菌一向都好啱我，雙菇扒西蘭花有益夠健康。雙菇以大花菇及茶樹菇入饌，前者厚肉而菇味濃，後者帶爽，茨汁又煮得啱啱好。
甜品一欄，6款甜品中以三色桂花班蘭糕就最有特色、最有賣點，雖然我哋都有啲飽，都仲喺想試一試，況且只喺$26一客，真喺好抵食！
![bowl]()
三色桂花班蘭糕 $26
桂花、班蘭及椰汁做成嘅三色糕，一客6件，真喺抵食到無朋友，賣相又精緻，不過，大可放心，唔會得個樣。糕身紥實，各有各味道，夾埋又唔會太古怪，意外哋合襯，又無過甜嘅弊病，有份清爽怡人嘅感覺。
除錢茶$7位之外，另收加一，但夾埋除開每人都只唔使百八蚊，就已經品嚐咗多道帶南洋風味嘅中菜，朋友都讚夠特色，有機會都再嚟，加上服務到位，確喺值得再幫襯。
個人評分
味道：8/10
環境：8/10
服務：8/10
抵食：8/10
平均每人消費：HK$180
餐廳資料：
樂天客棧 Paradise Inn
大角咀海庭道18號奧海城二期UG樓UG09號舖
2177 0760
=============================================
感謝 山區麵包王 提供以上資料
山區麵包王的網誌: http://garycwm.blogspot.hk/
=============================================
好食懶做（地區分類）
樂天客棧
Italian Tomato Café (馬鞍山店)
南坊
富臨皇宮 (黃大仙店)
小皇府 (MOKO新世紀廣場)
名館 Ming Bistro (希慎廣場)
G-fit
海逸皇宮大酒樓