同fd去旺角行街大血併，買到一袋二袋簡直好瘋狂xd
瘋狂過後就要搵食，因為今次大出血，所以都唔會食咁貴～
行左幾間鋪，兜左一陣，見到依間串燒店，價錢都ok，就入座喇。

店內唔算太多人，出餐速度都比較快，而且有個大大電視機係到，岩晒邊食邊睇劇～




環境有泰式既風味，牆上掛滿泰國特色畫像外，仲有一啲特別既擺設，整體感覺以黑色厚實為主。


中等價錢，相比起其他串燒店會平啲，款式亦都幾多，紅肉到白肉、海鮮、蔬菜等等都有得揀～
但飲品方面，可能冇左酒牌（猜測），所以只得汽水供應。

牛舌，厚實得黎唔油膩，而且牛味出眾，加少少調味粉，味道更加GOOD!值得一試～

餃子雞翼，食落去一大啖肉，而且唔洗拆骨好方便，燒到岩岩好既狀態，
餡料豐富，加上外層既蜜糖配搭，味道一級棒～

雞肉串，口感香滑，會有少少肥膏，但燒到個味道夠出，而且雞串係串燒必嗌之選！

燒八爪魚鬚，味道鮮香而且食落好咬口，腳果部份帶微窿，夠晒火喉，唯份量唔多

醬燒雞中翼，燒雞翼～我中～意食～不可不嗌既雞中翼～呵呵
外脆內軟，雞肉既溫度岩岩好夠熱，而且外層醬汁都好入味。

燒娃娃菜，$12只得四塊菜認真唔夠過癮，而且落得太多汁，令成個味變得好咸

芝士蒜蓉焗西蘭花，芝士既份量頗多，可以邊食邊拉絲出黎，
而且蒜蓉個味都幾香，開頭食會有少少咸，不過之後就好番啲
不過焗野會比較慢上，所以一早嗌定就更好喇～

蒜蓉燒扇貝，又香又多汁，扇貝夠彈牙，食落夠晒惹味，不過味道略咸，可以一試～

芝士燒蠔，食落唔會有腥味，而且芝士既味道唔會覆蓋左蠔既鮮味，
口感味道都抵讚，大細中度，$72有四隻都幾抵

整體黎講，款式夠多，串燒質素唔錯，有某幾類會偏咸，但勝在價錢幾抵又就腳，係可以一去既串燒店～

============================================

感謝 chickenandpp 提供以上資料

chickenandpp的網誌: http://www.openrice.com/zh/gourmet/reviews.htm?userid=51033932&city=hongkong

============================================