月中,同老公,醫生商量決定前日(26-2-2016 Fri)朝早入院,由於有保險,同事都我入o左院後至食晒早,午,晚三餐,重要食豪啲,夜晚o個餐重可以叫埋老公o黎食.啊,我重諗住晏晝早啲出院去買餸返屋企煮添.好,一於聽同事話 .

攞o左床位,即call送餐服務喇,我揀o左$50.00o既美式早餐,要炒蛋,豬柳漢堡扒配牛角包,飲熱奶茶.送到o黎睇,三樣o野食都好細件/份,

先食豬柳漢堡扒,似白烚,冇乜味,自己加胡椒粉吧.

炒蛋一樣係冇乜味o架喇,自己加啲鹽,但佢o地都係炒得嫩;牛角包鈿件到我以為得半件,原來唔係.佢唔酥,牛油味淡但夠,唔油膩.

熱奶茶我落o左一包糖,茶味OK夠.

食完呢個餐,我重係唔夠飽.
味道: 2.7分, 抵食: 1.5分

而由於原定o係12:20pm做o既小手術押後到3:00pm,於是諗埋個lunch.我要$85.00o既菠蘿咕嚕肉配絲苗白飯.睇menu,睇有咩o野食,見到有燉湯,同老公好少煲湯喇,飲埋佢啦,呢個要早兩個鐘訂,趁老公lunch time,問佢飲邊款,就落定單,叫人o係7:00pm送呢個兩個燉湯o黎,飯就即上.

亦同老公研究o左夜晚食咩甜品(係另一間),就打埋電話,叫人8:00pm至送.

菠蘿咕嚕肉配絲苗白飯到o黎,

顏色好靚,

菠蘿好多,食落,咕嚕肉熱騰騰,外面仍脆,酸甜度o岩o岩好,好味 .而白飯,唔好意思,麻麻地,有啲o鞋口.
呢個份量好夠,夠飽.
味道: 3.1分, 抵食: 2分

6:50pm,我同老公揀o既要$88.00o既南北杏雪耳燉竹絲雞同$78.00o既紅棗圓肉燉瘦肉送到o黎,唔大盅o既.

而老公就7:00pm o黎到,先同佢研究埋晚餐要咩主菜,然後飲湯.

睇睇啲料都好足,我先飲我o既南北杏雪耳燉竹絲雞,

呢個有啲甘苦味, 雪耳同竹絲雞都夠腍,好快食o左半盎同老公交換.
味道: 4分,抵食: 2分

老公o既紅棗圓肉燉瘦肉

相對好甜,但瘦肉未夠腍,仍幾硬,一般.
味道: 3.5分,抵食: 2分

原以為我食完晚餐就可以攪出院手續,點知醫生巡完房,話要我留多一日做另一個化驗.咁唯有留,既然要留多一日,又計多一日,不如老公又o黎食早餐啦.

由於尋日27-2-2016(Sat)o既化驗book到好早,於是o係老公臨返屋企前,揀定食咩,咁佢 就唔使晨咁早起身走o黎等.

經過前日早餐o既經驗,我o地決定叫四份早餐 ,要o左:$50.00o既中式早餐:雞肉粥,素餃子,要中國茶.$42.00o既瑤柱雜菜粥,$32.00o既果占多同$32.00o既番茄煙火雞三文治,要麥包.

到o黎喇,我o地睇睇,

果占多有四片多士,果占要自己搽,由於唔想佢變腍,所以我第一樣就係食佢.搽o左半份果占夾o黎食,呢啲咁簡單o既,冇乜好講.
味道: 3分, 抵食: 0.5分

之後我食素餃子,素餃子入面有粟米粒,紅蘿蔔粒,冬菇粒同椰菜粒,味道淡淡的,正常吧.

味道: 3分

然後食老公o既雞肉粥,

由於佢食o既時候覺得唔夠味,就落o左成包胡椒粉,攪到我覺得辣o左啲.老公話呢個有好多雞肉,不過到我食時唔多覺.
味道: 3分, 抵食: 1分

然後我食瑤柱雜菜粥,瑤柱碎唔多,而且係白色o既,雜菜有粟米粒,菜心葉同生菜絲,

就係咁樣清清o既一碗粥.
味道: 3分, 抵食: 1分

最後食番茄煙火雞麥包三文治,睇到煙火雞似火腿,

不過當然唔係,佢唔肥膩,不過冇乜煙燻過o既痕跡,亦冇乜味.
味道: 2.5分, 抵食: 1.3分

呢餐早餐都係清淡健康為主,但最後一提,o個杯中國茶味道好濃.

之後,我o地決定食埋晏至走,於是叫o左$75.00o既北菇竹笙扒時蔬,$72.00o既雪菜肉絲炆米,同$28.00o既芒果布甸兩個.

送到o黎睇,原以為北菇竹笙扒時蔬o既竹笙唔會多,但原來都多,

唔錯.開餐喇,北菇同竹笙都夠腍,時蔬係菜心,菜心幾甜,又唔錯.而白飯同樣係唔好食o既,
味道: 4.3分, 抵食: 2分

老公o既雪菜肉絲炆米呢?

呢個我覺得味道淡o左啲,可能老公加o左辣醬會好味好多.
味道: 2.8分, 抵食:1.3分

最最最最最後,真係最後,到芒果布甸,

味道唔太甜,微微地酸,質地唔算好細滑,算啦,醫院餐廳係咁o架喇.
味道: 2.8分, 抵食:1.2分

服務:
26/2 9:45am打電話去,打幾次同響好耐都冇人聽,我以為我唔識用醫院o既電話,於是搵搵護士幫我,點知係護士長入o黎,一打就有人聽,真係唔好意思.
送餐服務最少要等45分鐘,客人要留意.
所有碟(除盛載凍o野外)都熱,唔錯.

衛生:
所有o野都會用保鮮紙包好至送上.

總味道: 3.14分, 抵食1.44分

============================================

感謝 愛食 提供以上資料

愛食 的網誌: http://www.openrice.com/zh/gourmet/reviews.htm?userid=46226&city=hongkong

============================================