0

金澤。兼六園點燈﹑富山拉麵 Day1-2

平凡人 於 2016-03-18 20:00:00 發表  |  累積瀏覽 668

分類:長線旅遊 其他 特色景點 博物館 廟宇 古蹟 公園 ;地區:大阪,其他
< 日本中部﹑關西﹑中國15天遊 >

第一天

今次日本旅程係出發前大約一個月已經買好機票,因為今次想去就去冇等機票特價,機票比前幾次去日本貴好多,不過有得去玩冇所謂啦(如果遲幾日買會平好多!);除左買機票之外其他要準備既野唔多,預定住宿﹑電話卡﹑交通pass﹑巴士飛,再買好保險就可以等出發


日本咩都有好多野唔洗係香港準備都得,今次我就有野唔記得帶所以要係日本買,但去白川鄉既pass就一定要係香港買,因為「高山北陸地區周遊券」只可以係日本以外地方購買,去到日本係冇得賣架;呢張5日pass賣13500日圓,佢幫我慳到好多交通費,去白川鄉可以考慮下佢;我是但行入一間旅行社就買到張pass既換票證,拎去日本可以換到正式pass


「高山﹑北陸地區周遊券」資料可以係呢道睇到
http://touristpass.jp/zh-tw/takayama_hokuriku/

今次又係靠佢陪住我,去個時入面唔多野裝唔滿


黎到機埸啦,今日搭夜晚8:45飛機,預早啲六點前已經去到機埸,快啲check完in就可以快啲開餐


入面間間餐廳都好多人排隊,今次時間多可以食大力水手炸雞,香港得呢間分店終於第一次食到啦;其實排隊都唔算好耐,搵位坐先耐,實在太多太多人


食飽出發!今次部機停係最尾,坐完車仲要行好遠




去到71位準備上機


今次坐捷星航空,呢班機唔滿可以比我一個人坐三個位,好舒服


連佢都有位坐


飛機飛過台灣上空,由天空望台灣原來係咁架,好特別






第二天

日本時間一點幾去到大阪;第一次見呢種登機梯,係斜路唔係樓梯




今次過關好順利,一句都冇問就成功出到黎


當年曾經係呢道訓過兩晚,好懷念;去搵返以前訓開個個位,但太遲啦全層座位都訓滿人,要落返去下面接機大堂先有位


早一個星期係amazon訂左上網卡送黎機場呢間Lawson,預先print定張單好易就拎到


我只係買張電話卡個盒就pizza盒咁大,好誇張




今次用呢張So-net上網卡,30日可以用2GB全速4G數據,速度好滿意,價錢都唔貴呢張賣¥2754,比起去到機場先買平好多,不過So-net卡要網上登記先用到,要花小小時間注冊;其實我係鴨寮街都買左兩張電話卡準備用,見到有好多劣評都係唔用lu,So-net應該穩陣啲




玩下電話又攤下好快就到5點,上去SuKi家食日本第一餐,24小時營業唔怕冇得食




日本第一餐係牛肉飯,¥290一碗好抵食


五點半火車站開門lu,食完早餐就出發啦




首先要去JR Ticket Office換Pass,之後就可以用Pass入閘上車




上左最快開出個班車,先坐關空快速去大阪站




白川鄉之旅就係靠呢張Pass啦


去到大阪站再轉特急列車去金澤






火車離開京都後經過既好多地方都係鄉村農田,風景唔錯




由關西機埸出發坐左成4個鐘車,大約十點準時去到金澤




金澤站對出有道好大既門,係呢道既標誌


金澤仲有啲好舊式既鐵路




去Hostel放低大背囊,即刻又返到金澤站;Hostel距離金澤站好近,幾分鐘就行到,我就係鐘意佢夠晒方便


金澤站入面好多人為台南地震籌款,加油




今次張Pass可以搭上年新開既北陸新幹線,呢頭冇特別地方想去,見張Pass包埋都去遊下車河啦




第一次坐行走北陸新幹線既E7系列車




車上座位又靚又舒服




最正係每個位都有得差電(雖然暫時對我冇用)


沿路可以見到積滿雪既中部山脈




大約半個鐘車程去到富山




黎富山冇咩地方想去,純粹想坐新幹線咋,既然一場黎到冇理由一出黎就走既,咁就順便係道搵地方食午餐


富山拉麵好似好出名,係網上搵到富山兩間好出名既拉麵店,又日本第一又銷量第一等等,感覺上好似好正一於去試試


揀左兩間之中相對冇咁出名既一間,貪佢近火車站,過條馬路就到


就係呢間啦
話就話冇咁出名,佢都拎過好多年第一




入面食緊既都係日本人,咁地道我諗一定好食;冬天立山黑部未開山應該冇咩遊客會黎到富山


拉麵黎之前餃子先到,好好食


拉麵到啦!富山最出名係黑醬油拉麵(右面黑色個碗),同平時食開既豬骨湯拉麵好唔同


我食呢碗紅色既,賣相幾靚丫,見咁紅又話「激新」以為好辣,實際係唔辣;呢碗拉麵湯底應該係海鮮,對於唔食海鮮既我就唔岩我口味啦,我朋友都話黑醬油拉麵唔岩佢口味,所以分辨唔到呢碗拉麵好唔好食,人人口味唔同要自己試過先知;今餐食左¥2370,以拉麵黎講唔平丫


唔知呢間同香港間富山麵家有冇關係呢?大家都係蠟筆小新


返金澤既車仲未開,係火車站超級市場行下,日本既超級市場永遠都係咁靚,賣既野又靚


係富山見到Poster先知東京迪士尼有魔雪奇緣睇!身為Elsa迷好好好後悔冇去
我應該改行程最後個幾日去東京先岩,啲住宿可以免費取消即時轉地方都得,總好過係大阪唔知做咩...成個trip最後悔就係冇去東京,唉...




坐新幹線半個鐘返到金澤


咁岩見到金澤吉祥物,第一次見




返到金澤係時侯做正經野先,先去火車站旁邊既北陸鐵道售票處換白川鄉既巴士飛;去白川鄉巴士車飛可以預先係網上預訂,咁就唔怕冇位(之後係高山聽到講播話去金澤既飛賣晒,如果去到先知冇飛真係有排煩);要訂飛好易,上j-bus預約就得,入面好多漢字唔識日文既我都睇得明,有個小小麻煩既地方係注冊時要打日文名,不過拎飛時冇睇名,有訂票號碼就得


J-bus網址
https://secure.j-bus.co.jp/hon/

今次總共訂左三程車,包括「金澤-白川鄉」﹑「白川鄉-高山」﹑「白川鄉-金澤」,出示張Pass一次過換晒唔洗比錢,好野!


正經野做完就返去Hostel拎房,今次住呢間小小既「Good Neighbors Hostel」


職員好好人,幫我地拎行李上到房,又介紹Hostel有咩設施


今晚住呢間雙人房,房價¥7500,以Hostel黎講覺得有小小貴


又去返火車站出面坐巴士,準備去「兼六園」;金澤呢道越落越大雨,我又冇拎遮出黎,比雨沐到唔想行...呢道有¥100巴士坐,好多人排隊


好怕啲巴士開暖氣,坐多陣焗到暈低都似,完全冇空氣流通,都唔明日本人點可以忍受


去到兼六園旁邊既「21世紀美術館」門口落車,呢道有個好出名既水池,不過就要買飛先入到去參觀,我對美術冇興趣就唔晒錢入去啦,我唔想睇到恰眼訓


由下向上升既lift,第一次見


出面比雨沐到變爛地...遇著落雨冇咩心情行,但又冇理由坐係道咩都唔做,係入面坐左陣都係出去行動啦




過馬路去對面兼六園,去到門口先知呢道五點就關門,而家都四點三冇理由仲入去掛?售票處阿姐都見議唔好入去住(應該係呢個意思),指住五點半而且又話free,作為一個乖小朋友都係聽話等一陣先入去




兼六園旁邊有間小神社「石浦神社」,係金澤歷史最悠久既神社,好似有過千年歷史,就咁睇外表咁新淨估佢唔到




有神社當然都有鳥居






兼六園仲有一個鐘先開門,旁邊金澤城又已經關門,呢頭除左美術館之外想搵個地方坐低避雨都冇,要行10分鐘去到「香林坊」個邊大街先熱鬧返啲


見到有間麥當勞就入去坐底,呢啲傳統風格麥當勞係香港已經好小見;之前新聞話日本麥當勞做唔住分店越來越少,如果同香港比日本麥當勞又真係小好多人,香港麥當勞長期都好多人,呢道都算係大街但都有好多位


就算唔肚餓都買個餐試試,朋友未試過日本麥當勞都想試下;呢包薯條炸到好濃唔係咁好食


呢個係北海道XX包 (唔記得個名),都係一個牛肉漢堡,唔記得係六百幾定七百幾円啦,比香港麥當勞貴,係日本七百円可以食到好多唔同既野啦跟本就唔洗食麥當勞呢啲快餐,少人食好正常,而且之前仲要爆醜聞...如果香港麥當勞賣咁貴我都唔食啦


坐到差唔多五點半,起程返兼六園




兼六園已經點好燈啦!每年農曆新年前後時間,兼六園係某啲日子會舉行夜間點燈活動,咁好彩我又撞岩左點燈日緊係要黎睇,平時日間入兼六園係要收入埸費,夜晚點燈活動反而係免費入場,太好啦




黎左日本一日都冇咩特別行程,只係四圍行下,全日最重要就係黎兼六園睇點燈;兼六園係日本有名既三名園之一,我相信一定好靚




前面呢幾棵好似聖誕樹既樹就係兼六園最重要既風景,冬天為左防止樹枝比積雪壓斷,樹枝會用繩吊起,遠睇就好似聖誕樹;如果落雪既話仲更加靚,今日雪就冇啦雨就有好多,不過夜晚睇都幾靚




好多人排隊入去靚位影相,我都一齊排


近啲就睇到呢啲原來係松樹






呢道夠高可以望到金澤市區


行遠啲望返啲樹








係兼六園留左一個鐘多小小,好滿足咁離開,呢道好靚




大家都等車返火車站,夜晚巴士小好多班次,好彩冇咩人搭一部車就上到


今次坐唔中100円巴士坐左部貴車,大約10分鐘車程已經要200円,所以話日本交通費貴,連巴士都係超貴,香港呢個價錢可以坐1個鐘去到屯門啦


話咁快又返到金澤站,夜晚好冷清






入去睇下有冇咩野好食先


超級市場做緊特價,買定盒壽司做宵夜都好


係火車站出面見到間薩莉亞,話晒佢都係日本公司而我又未係日本食過,今晚晚餐就決定係呢道食




入面冇咩人坐得好舒服




今餐啲野好好食,岩晒我口味,而且仲好平,全部加埋先¥1176,平靚正


食完就返Hostel lu,路經一間疑似有得飲茶既地方,但食物同茶樓好唔同


返到黎啦


今晚宵夜就係半價壽司,好抵食


今日就係咁過左,金澤對我黎講只係一個路過同住宿既中轉站,全個行程重點係聽日將會去既白川鄉,今次日本旅程就係因白川鄉而起,期望聽日見到好靚既雪景啦,我要雪丫雪丫雪丫!



鐘意SeeWide的分享,給我們一個Like吧!
  • 攻略日期:N/A
    攻略地點:大阪,其他
  • 攻略時間:N/A
    是次消費:N/A
0人比"掂"
  • 特搜總編E 於2016-03-18 16:45:20 留言
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
  • 舉報 回覆
  • No.1
  • 林公子 於2016-03-19 06:21:30 留言
    睇左好耐先睇晒...好長編...

    其實係香港買上網卡也可以的

  • 舉報 回覆
  • No.2
  • 林公子 於2016-03-19 06:23:26 留言
    你都幾辛苦,去到好盡@@

    又去富山點燈....

    不過富山係咪即係有架叮噹電車個度?
  • 舉報 回覆
  • No.3
  • 平凡人 於2016-03-20 01:32:28 留言
    原文由 特搜總編E 於 2016-03-18 16:45:20 發表
    恭喜!經過「SeeWide評審團」一致通過,你的發佈已被選為推薦攻略!你不但可以獲得200經驗值,更能累積200探險里數作為開展下次探險之旅的旅費!
    Thanks
  • 舉報 回覆
  • No.6
  • 平凡人 於2016-03-20 01:36:44 留言
    原文由 林公子 於 2016-03-19 06:21:30 發表
    睇左好耐先睇晒...好長編...

    其實係香港買上網卡也可以的

    Sorry,今日得兼六園一個景點唔知點分段好我都有係香港買左兩張上網卡,仲平啲,$75有7日每日200MB上網,不過冇用到
  • 舉報 回覆
  • No.7
  • 平凡人 於2016-03-20 01:42:58 留言
    原文由 林公子 於 2016-03-19 06:23:26 發表
    你都幾辛苦,去到好盡@@

    又去富山點燈....

    不過富山係咪即係有架叮噹電車個度?
    都唔算辛苦既,今日好多時間都係搭車叮噹電車係高岡唔係富山,我冇去
  • 舉報 回覆
  • No.8
  • 平凡人 於2016-03-20 01:44:59 留言
    原文由 林公子 於 2016-03-19 06:24:10 發表
    更正:應該係去富山又返金澤燈
    金澤點燈係今日重點,點都要去架,哈哈
  • 舉報 回覆
  • No.9
  • 平凡人 於2016-03-20 01:45:22 留言
    原文由 EEChan 於 2016-03-19 12:21:05 發表
    有得玩最開心。
    係丫
  • 舉報 回覆
  • No.10

最多能輸入300字

累積瀏覽 85217

全部攻略 126

全部回應 1394