吃過King Ludwig Beerhall的脆皮豬手和Espuma的香脆咸豬手後, 簡直愛上吃皮脆肉嫩的焗豬手! 之前逛吉之島的超級市場時, 見到有西班牙豬手賣, 大大隻, 售價不過$60, 蠻吸引, 於是嘗試自己動手整!
![]()
豬手包裝袋有教中西式兩種烹調方法, 要食脆皮豬手當然要用西式煮法, 不過焗之前的預備功夫需時頗多, 差不多要一整日! 雖然烹調時間長點豬手會入味好多, 但自己又心急想即晚食, 於是網上找來快捷一點的方法.
![]()
材料:
西班牙咸豬手......一隻
調味:
白胡椒粒......一湯匙
白醋......兩茶匙
德國啤酒......兩罐
(德國啤麥味較重, 令豬手更香味外, 亦令豬手更易上色)
百里香.......一湯匙
月桂葉.......六片
(廚房的調味沒有百里香和月桂葉, 改用了basil 和意大利香草, 而且份量可以再多點, 令豬手更香)
![]()
做法:
1. 先從冰箱取出豬手解凍, 之後煮一煲水將豬手出水5分鐘, 撈起, 用凍水沖淨, 剪/鉗走豬皮表面的豬毛雜毛.
![]()
2. 將豬手連凍水放入煲, 水的份量要蓋過豬手, 加入白胡椒粒, 白醋, basil, 意大利香草和一罐的德國啤酒, 大火煮滾後, 用中火煮一小時.
![]()
3. 撈出豬手瀝乾, 用叉於豬皮表面平均插孔, 等豬手更易入味.
4. 將一罐德國啤酒和basil, 意大利香草倒入碗中伴勻, 放入豬手, 浸10分鐘, 浸至5分鐘時將豬手翻轉再浸5分鐘, 期間給豬手做下按摩, 令豬手更易吸收啤酒和香草的味道.
5. 焗爐預熱至230度, 將豬手放到鋪了牛油紙的烤盤上, 浸豬手的香草撈起鋪於豬手表面, 再用剛才浸豬手的啤酒均勻塗於豬手上, 放入焗爐焗一個小時, 或焗至豬手表皮金黃香脆即可. 期間每10分鐘取出豬手再塗上啤酒, 30分鐘後將豬手反轉另一面塗上啤酒再焗, 同樣每10分鐘取出塗上啤酒.
![]()
![]()
熱辣辣香噴噴的豬手出爐了, 因為好肚餓, 所以沒等到豬皮焗到很脆口就取出, 豬皮還帶點膠原的質感, 不過內裡的豬肉就很嫩滑多汁, 充滿啤酒和香草的味道, 好味好食, 跟老公兩個人食已經好足夠! 不過原來焗一隻豬手步驟多, 時間亦都多, 是心機菜呢!!
![]()
![]()
![]()
![]()
![]()
![]()
============================================
感謝JannieWong 提供以上資料
JannieWong的網誌: http://janjancat.blogspot.hk/
============================================
