8 Fish & Chick Plus：一魚再遇

年幾前因為開通咗港島西延線，貪得意過咗去西營盤、堅離地城嗰邊搵吓食，其中一間喺Fish & Chick。最近，聽到好友講佢哋晌觀塘開咗新店，唔使過海自然方便少少我依等九龍人。原來，間店都開咗好幾個月喇。


對比起西環店，觀塘店明顯地方大好多，坐得較為舒服。而裝修一環，都喺以海洋為主題，所以，見到唔少相關擺設。牆身黃色撞藍，幾醒目，顯得有活力！



因為唔喺第一次光顧，所以，店內有咩食？咩喺主打？大致上都心裡有數，不過，店員話依度加插咗啲意粉同一啲特別菜式，咁除咗主打嘅炸魚薯條及烤雞，咁就不如再試試點新嘢。







友人喜歡湯品，所以，就點選咗其中兩款。湯類共有4款選擇，本來想試個清雞湯喺點，不過今晚就無供應，取而代之喺南瓜湯。



南瓜湯 $40 色澤橙紅，落咗忌廉嚟調和，雖然入口個南瓜味唔算得好強勁，但感覺絕對清甜，而且，口感非常滑溜細緻。



粟米蓉湯 $40 一啖落口就知有幾堅，清甜味比個南瓜湯更濃，粟米嘅味道極之突出，質感嘅稀杰度恰到好處，實在好飲。



鮮奶咖啡 $30 小弟揀咗杯鮮奶咖啡，雖然拉花方面就真喺麻麻哋，不過，奶泡都算打得綿密，咖啡又幾芳香，叫做不過不失，結終佢哋主打唔喺賣咖啡，其實叫杯有汽果酒配吓炸魚、烤雞仲好，自覺有少少嗌錯。

特色推薦菜有好幾款，鹹鱈魚蓉、雞肉卷、白酒鮮蜆及炒魷魚仔等幾款，比較有興趣喺個蜆。



白酒汁煮新鮮蜆 $90 嘩，估唔到都幾大份，有好多蜆，而且，吉殼唔多，夠晒足秤呀！雖然啲蜆唔喺好大隻，不過，就好新鮮，睇佢哋無邊隻煮唔開口就知啦；味道好鮮甜，帶少少鹹味，又幾厚肉，而且，個白酒汁煮得頗香，所以，食完啲蜆不妨當湯飲番幾啖，確喺唔錯。如果有啲餐包提供，更可以沾嚟食，記得晌馬交食葡菜有一道檸檬蜆，都喺食完個蜆，啲湯汁用麵包沾嚟食，好正架！





跟住就品嚐主菜嘅時候，就喺炸魚薯條，上之就試咗鯛魚、無鬚鱈魚，今次睇到餐牌上嘅魚類供應，又有唔同種類，仲標明來源地。



大比目魚炸魚薯條 $130 嚟自格陵蘭嘅大比目魚（Halibut），印象應該未接觸過，加上寫明獨家供應，好奇心驅使就揀依一款魚做炸魚柳；魚柳本身會伴有好多薯條，又因為燒雞有伴菜，所以，炸魚柳我哋就無追加伴菜！

大比目魚柳裁得好大件，極為厚身，外觀金黃閃亮，炸得一身如披上金甲冑；一落刀就感受到有幾脆，應聲咔嚓裂開，睇到外層粉漿做得薄，入口極之香脆，魚肉則嫩滑鮮甜而富油香，雖然店家提供一隻亨氏麥醋，但同上次一樣都喺愛佢嘅自家製他他醬，酸咪咪，又唔會咁易整濕個外皮。至於薯條，睇到粗身而不規則，以人手切成，有薯仔味，脆而不油！





烤雞喺另一主打，見有一款黑松露烤雞，可惜是夜無賣，退而求其次就食番原味嘅法式烤雞，反正友人未試過。烤雞有全隻（$180送兩款伴菜）或半隻（$90送一款伴菜），而伴菜有蘑菇、燴雜菜、薯蓉、青豆、甜粟米和沙律菜可揀，人少少半隻雞就夠晒食喇！



法式烤雞 $90 烤雞焗得金黃，並且散發出陣陣香氣，入口外皮帶點脆，卻唔油膩，肉質既嫩滑，又帶點露絲瑪莉香草味，水準依然。伴菜嘅青豆，睇落平平無奇，亦比晌超市見到嘅細粒啲，但卻喺更有豆味，再者，輕炒過又較香口啲。





橄欖油炒香蒜片辣椒扁意粉 $78 講明意粉喺依間店先有，當然試試其手勢得唔得，意粉有6款選擇（$68-$120），可選意大利粉、扁意粉或長通粉。我哋揀個中價嘅橄欖油炒香蒜片辣椒意粉，貪其簡而精。一上枱已聞到超香蒜味，確實，睇樣都見到扁意粉混入唔少蒜片。每炷意粉都充滿蒜香，餐牌顯示1隻「辣椒仔」，其實都帶點辣勁，而意粉口感啱啱好，咬落煙韌！賣相上，如果捲一捲起先落碟，就更好喇！

晚飯尾聲，少不了甜品作結，自家製甜品一共有6款，比起以前晌西環店嘅多，而且，種類都唔同，應該滿足到大部份人嘅喜好。



朱古力軟心蛋糕 $65 友人誤會咗喺心太軟，無流心而感到失望，其實個朱古力軟心蛋糕嘅朱古力味好香濃，味帶苦味，中間軟心就更濃郁軟滑，感覺就喺迷你版半熟蛋糕；再拼埋雲呢嗱雪糕一齊食，一凍一熱，爽呀！





超脆蘋果撻配雲尼拿雪糕 $65 講到超脆，又真喺並非浪得虛名，以酥香嘅酥皮夾薄薄嘅蘋果片，新鮮熱辣即食的確香脆，不過，蘋果片刨得超薄，所以，食落蘋果味唔突出，個人感覺有啲美中不足。如酥皮中間再夾入啲蘋果蓉一同焗，效果唔知又會喺點？

再嚟多次Fish & Chick，唔止英式炸魚保持到高水準，法式烤雞亦都不俗，而新出品嘅白酒煮蜆及蒜片辣椒扁意粉同樣做得出色，朋友亦非常欣賞！
個人評分
味道：8/10
環境：8/10
服務：8/10
抵食：7/10
平均每人消費：HK$230
餐廳資料：
Fish & Chick Plus
觀塘觀塘道414號1亞太中心(OPC)3樓302號舖
2970 0003

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================