探險家攻略 > 休閒玩樂 / 城中探秘 / 旅遊 > 郊遊 / 其他 / 特色景點 / 古蹟 / 公園 / 其他 / 長線旅遊 > 五箇山。與白川鄉一樣美的童話世界 Day3

五箇山。與白川鄉一樣美的童話世界 Day3

由平凡人於 2016-04-03 23:00:00 發表 | 累積瀏覽 488

分類：其他長線旅遊特色景點古蹟公園其他郊遊；地區：其他

< 日本中部﹑關西﹑中國15天遊 >

第三天（續）

五箇山位於白川鄉附近，兩個地方都係世界文化遺產，可能五箇山既合掌屋冇白川鄉咁多，交通又冇咁方便，遊人亦都少好多；有時候少人都有少人既好處，起碼影相都方便啲，而家就出發去五箇山參觀

係白川鄉就有巴士去五箇山，今次將會坐既係「加越能巴士世界遺產線」，來住白川鄉同高岡，中間會路經五箇山

呢條世界遺產線一日只係得幾班車，要check好時間先好坐
http://www.kaetsunou.co.jp/regular/sekaiisan/

我坐11:35呢班車；呢程車好似平時坐巴士咁唔洗買定飛，車黎到上車就得，而且張pass係包埋，落車比司機睇一睇pass就得，唔洗比錢架

五箇山果然係冷門地方，車上乘客連司機都係一隻手數得晒



五箇山位於富山縣（白川鄉係岐阜縣），當中有兩個地方係世界遺產，包括「菅沼」同「相倉」，兩個地方巴士都會經過，今次我唔夠時間只好放棄細啲既菅沼，去好多薑餅屋既相倉

巴士中途有唔少人上車，去到「相倉口」有好多人上落

相倉口侯車室都薑餅屋造型

呢道既雪比起白川鄉靚好多，拎上手係軟綿綿架


由巴士站行入村，幾分鐘就見到相倉薑餅屋啦



寫住影到全景bor，行4分鐘就到，大家都向山上行去

又多雪又靚



如果條路無雪4分鐘都可能行到上去既，而家全條路都鋪滿雪，想行快小小都唔得

頭半段路啲雪軟綿綿好好行，中間有段斜路係冰地就要行得好小心，一唔小心仆左落地就好笑；其實我有冰爪係背囊，不過見慢慢行都OK就唔拎出黎啦

再行上啲條路變成流水仲衰，開頭都慢慢一步步小心行，不過我對鞋唔防水好快已經濕晒，之後都唔理得咁多，橫掂都濕左就咁行上去算...

我覺得呢道無論風景同雪質都比白川鄉靚，訓上去好舒服架


由高向下望啲薑餅屋好靚架



繼續向上行，上面已經冇晒人

見到有張紙介紹係呢個位影相，唔知下面4分鐘既牌係唔係指呢個位呢？不過4分鐘一定上唔切黎...

由呢道望出去就係呢個景啦


Zoom近啲睇更靚



有時候會突然好大霧，等一陣又散返，天氣變化得好快，要睇到靚景就要有耐性，更加要有運氣



睇左一陣要落山啦，係五箇山既時間唔多，想去多啲地方參觀；其實想快啲落山都快唔到，上山已經要好小心行，落山比上山要更加小心，我唔想碌落山架

有兩部旅遊巴黎左，呢道開始多返啲人氣；當中最少一個係香港團，即時多左好多熟悉既聲音，唔知佢地係唔係唔夠時間呢？佢地都係係下面行冇行上山



見面有條雪路行，我又行入去先；雪唔算好深，大約去到小腿中間位置


平時半分鐘都唔洗就可以行完既路程，而家五分鐘都未行到出去，開始個時好小心咁一步步行唔想對鞋入雪，行多兩行都唔理得咁多，快啲向前衝出去算，行呢啲雪地真係需要好多體力

成功出返大路



好多雪丫



夏天綠油油都一樣好靚；所有合掌屋都係用木建造，防火係好重要，所以係屋出面會見到好多水龍頭，呢道其中一個特色節目就係水龍頭射水，不過冬天就見唔到



行行下忽然又大霧，對近距離睇薑餅屋冇咩影響，反而多左幾分神秘感，好靚



可以係五箇山逗留既時間只係大約兩個鐘，冇辦法啦巴士班次實在太少，如果上唔到車會好麻煩，唯有好快行完一圈就走；去到路邊巴士未夠鐘到，快手拎起啲雪整個雪人先，今次應該係我第一次玩雪人

Do you want to build a snowman?

時間就到要去巴士站牌等車，如果走車就大獲，會搭唔到下一班車


車準時到，好多人係呢道落車；呢部車都好多乘客，大家都趕住去白川鄉，因為今日係白川鄉一年七日點燈日子既最後一日，過左今晚就要等下年啦

車上連乘務員都有

再次返到白川鄉，而家多人左好多

橋上都好多人



出現左小小小小小藍天

又再次向山上方向行去



沿路有好多賣手信既鋪頭，亦都有小量餐廳，今日午餐未食就想搵間餐廳食啦，不過行過幾間餐廳都迫爆人排長龍，最後都係食唔成...

見到有小食賣就排埋一份，就當係午餐都好；如果係我自己一個就唔食都冇所謂，不過有朋友係道唔想餓親人地啦



買左呢個飛驒牛薯餅食，味道OK，不過就食唔出飛驒牛冇咩分別



今既點燈用既燈已經set好，薑餅屋就係靠呢啲燈射住先可以咁靚咋



白川鄉周圍都係人，好熱鬧



和田家可以上上層參觀，見到打開窗個道就係啦，今日冇時間遲啲有機會先去



路邊有好多小雪人bor

大家玩雪玩得好開心，唔知佢地知唔知雪地下面係農田呢？今朝行入去時見到有啲位比人踩穿左，如果咁唔好彩踩中啲薄位就慘啦，中間已經踩到好硬冇咁易出事掛？

啲地結晒冰

又行返呢條路上山，地下已經鋪好路燈方便大家夜晚上落

下面好多人丫

山上觀景台都未到，山腰開始已經迫滿人；仲離六點半點燈仲有一個鐘先開始，想霸靚位就要再早啲黎到



要係人推中間搵個位影相都有小小難度

或者去啲比樹遮住既地方就冇人啦，哈哈

行返落山，離遠已經見到有人龍，排緊咩呢？

原來上山既路已經封鎖，未上山既人就要排隊啦，應該有過百人排隊，唔知佢地要排幾耐呢？

見到山上面企滿人



白川鄉成日都落住雨，到而家走都仲落緊



條吊橋超多人，來回兩邊都好多人，迫到唔係幾行到


停車場泊滿晒車，今日可能係白川鄉全年最多人既日子，我估高山所有開得既車都開晒黎架啦，大家都係為睇點燈而黎

拎好行李，坐5:20既車去高山，呢班係全日尾二去高山既班次，最後仲有一班5:30，不過尾班車只可以排隊冇得預先訂票，都係坐早一班穩陣啲

好多人等車，好彩一早有飛唔怕冇位



唔洗一個鐘車程，到達高山濃飛巴士總站

第一日白川鄉同五箇山旅程完成啦，之前我話過今日係白川鄉難得既點燈日，可惜我無緣見到啦...原因係我太遲先決定去白川鄉，跟本就冇可能book到白川鄉住宿（就算早半年計劃都好難book到），我搵過由高山金澤出發既夜間巴士票﹑點燈團都已經full晒，如果夜晚係白川鄉冇車走隨時要訓街都似，最後得啲由東京大阪出發既點燈團﹑貴價包車同自己揸車可以睇到點燈，我諗過個個方法都行唔通就放棄lu，係有小小失望，唯有安慰一下自己：「今日天氣咁差，睇點燈都唔會靚架啦，哈哈哈哈哈！」