香港平靚正 拍拖好去處

好多情侶雖然無時無刻都想見到對方，不過日日去拍拖，個荷包都幾傷！但成日留喺屋企又會好快冇晒新鮮感。其實拍拖唔一定要使好多錢，香港都有好多 拍拖好去處 架。即刻睇下moneyhero.com.hk為大家推介嘅低消費拍拖方法啦！

1）期間限定活動

為食情侶必去！PMQ首屆美食車嘉年華

想食得平靚正又可以放下閃？咁就唔好錯過首屆美食車嘉年華！活動即將係5月4日至8日於中環元創方（PMQ）同大家見面！雲集各國美食，又有靚車同明星睇！

識食嘅你，絕對唔可以錯過各款美食，分別由多個生活品味合作單位及「星」級廚師為大家炮製！「星」級廚師包括欣宜大熱嘅自家曲奇品牌Homie Cookies、李燦森率領的餐廳Boomshack、黃長興嘅海鮮燒烤餐廳A la maison XXL Seafood & Grill，今次大家有口福喇！

講到影相，主辦單位為大家打造咗唔同嘅精品美食車，其中「電動鷗翼門」同埋「三摺斗」車斗都會係大家必影之選，打卡放閃就係咁簡單！

時間：5月4日晚上6:00至10:00；5月5日至7日上午11:00至晚上10:00；5月8日上午11:00至晚上9:00

票價：$30/位（11歲或以下及65歲或以上免費入場）；學生優惠$20（購票時必須出示學生證）

更多詳情：http://hkfoodtruckfestivals.com

香港國際博物館日

康文署將今年5月14至15日定為「香港國際博物館日」，期間多間博物館同文博單位都會免費開放，包括香港歷史博物館、科學館、電影資料館同文化博物館! 大家一聽到去博物館可能都會覺得好悶。但其實而家博物館都唔係咁死板。例如去科學館就可以喚起好多人嘅童年回憶， 同你嘅另一半重拾童真，玩下番梘泡、鏡子迷宮，都可以過一個輕鬆嘅週末。又或者去太空館睇星象電影，當係去左睇星星，都係慳錢嘅好去處。呢2日唔得閒都唔緊要，其實香港嘅博物館逢星期三免費入場，大家揀正呢個時間去又可以慳返筆嘞!

想知多啲，留意：http://www.museums.gov.hk/zh_TW/web/portal/international-museum-day.html

抬頭望上去 ～「視界 香港」公共藝術裝置

大家行經中環，有無發現多咗好多銅人像雕塑偷望你？又或者喺天台見到好似有人危坐？唔好驚，因為呢個係「視界 香港」嘅公共藝術裝置展，佢哋將31個雕塑安置喺中西區方圓1公里內，有27個人像雕塑於大廈天台和天際間，4個人像雕塑於地面和行人路間。唔知大家有無 見到佢哋？呢個公共藝術裝置希望大家可以抬頭觀望，尋找街上或大廈天台上的雕塑，以全新的視覺審視熟悉的地方。

時間：即日起至16年5月18日（每日）

地點：中西區方圓1公里內

更多詳情：https://www.facebook.com/EventHorizonHK/

「武．藝．人生 – 李小龍」展覽

李小龍迷召喚！香港文化博物館與美國李小龍基金會合作，與海內外收藏家和團體商借，為大家帶來超過600多件珍貴的李小龍文物。長達5年的展期會定期更換主題，讓市民能從「漢子、演員、武術家、傳奇」等多角度回顧李小龍的傳奇一生。

時間：即日起至2018年7月15日（逢星期六日 10:00am至7:00pm；逢星期一、三至五 10:00am至6:00pm）

地點：文化博物館

更多詳情：http://www.heritagemuseum.gov.hk/zh_TW/web/hm/exhibitions/data/exid209.html

2）享受戶外樂趣

情侶必到浪漫行山景點：日落黃昏的菠蘿山

女朋友嗌住要影靚相，又唔想帶佢去難行嘅山路，咁菠蘿山絕對係不二之選。帶女朋友去美國嘅大峽谷之前，不如先去個香港版。不單止景觀壯麗，仲有橙黃色日落映入眼簾，一生總要去一次！

建議路線：先坐西鐵去到兆康站，轉搭輕鐵505號到良景站。起點先由良景小學後面的山路而上，一直行頭段係斜路，中途可以見到涼亭，之後就會到達較 為平坦嘅良田坳，喺呢度可以稍作休息，盡見屯門景色。出現好多分叉路嘅時候，就揀沿住馬路一直行，走大約10分鐘就會見到「此路危險，不得擅進」嘅警告 牌，唔好俾呢個牌嚇親，其實「大峽谷」已經係你眼前！

世外桃源：英式山頂花園　拍拖野餐勝地

唔好再話去歐洲先有靚地方Chill喇！比較鮮為人知嘅前港督別墅「後花園」就好似世外桃源，令你樂而忘返。擁有濃烈英式風格、古老維多利亞式建築 嘅山頂公園，景觀十分開揚，入面有大草坪、維多利亞式涼亭、小山丘、水池，寧靜宜人嘅環境好適合情侶拍拖。鋪張野餐布、拎住本書、曬下陽光，寫意嘅生活有 時就係簡簡單單。

建議路線：由山頂凌霄閣出發，沿著柯士甸山道（山頂餐廳旁）往上行，中途見到柯士甸遊樂場，繼續一直走就會見到藍白色守衛室，再行前多幾步，就到呢個世外桃源！

 

3）齊齊潮做文青

最近大熱嘅「文青」風氣直捲香港，想嘗試過一日文青生活，不妨試下帶埋男/女朋友一齊試下坊間手作仔！當中以Art Jamming、整皮工作坊、押花班、咖啡拉花班等等最為受歡迎。如果想搵啲比較價錢合宜嘅班，可以搵下係工廈開嘅班，當中好多都係年青人創業嘅生意仔。 講到小編都好想今個周末即刻去Join！

 

4）煮飯仔

如果你同另一半都鍾意食嘢，一齊煮飯仔就最啱啦！網上有好多簡易食譜，煮一餐見得人嘅飯冇難度！坊間都有啲網頁係幫你執齊晒一道菜需要嘅材料，送上 你屋企，等你可以輕輕鬆鬆下廚，但價錢就會比較貴。一齊煮飯仔，製造自己嘅「心血結晶」，絕對增加情趣！不過最好就傾清楚邊個洗碗，唔係煮飯仔就變成嗌交啦！

原文轉自：http://www.moneyhero.com.hk/blog/zh/香港平靚正拍拖好去處