Herbs And Spices：零騷擾．嚐美味

真喺好「橋」，上次返完大陸山區工作之後，經深圳灣口岸過關返港，再駁巴士落元朗，食埋飯先返屋企。今次同樣又喺晌大陸山區做完嘢，取道深圳灣口岸過關再轉巴士到元朗，平時甚少嚟依區搵食，加上老婆是晚上堂，就一於食埋先返屋企。問過住晌附近嘅食友有咩好介紹，話我一支公不如試吓小店Herbs & Spices，街角位幽幽靜靜，感覺唔錯。


因為事前問咗老友點去，所以，落車行幾個街口就到。果然喺小店一間，座位唔太多，黑白色牆身襯木系枱櫈，簡約嘅裝修，加上嚟得早，未有客，位處大街轉入嘅小巷，更感清幽，零騷擾安心享美食。.







餐廳午市及下午茶以套餐為主，據店員講，大概兩星期會轉款，小弟到訪當日，佢都話就快又轉款，不過，都照影低留為記錄，亦俾大家有個參考。



晚市方面，餐牌亦都好簡單，一紙晚餐分沙律、小食及主菜，而主菜連餐湯及餐飲，變相即喺套餐。款式有9款（$78-$208），餐飲只包普通啡茶、汽水、有機茶包、果茶，若想轉鮮磨咖啡或朱古力類飲品，需要補錢（$15熱飲 / $18人凍飲），唔收加一。



粟米忌廉湯 是夜餐湯喺粟米忌廉湯，雖然賣相普普通通，但粟米味幾濃郁，口感柔滑，若然配一小片蒜蓉法包，感覺就更良好。



帶子黑松露野菌意大利飯 $138 咁多款主菜，揀咗中價嘅意大利飯，因為成日覺得一間店煮得好啲意大利飯，其他嘢都應該難佢唔到。

個飯賣相好精簡，但啲帶子睇落好正咁，每粒仲加一小撮黑松露，帶子入口外層有份焦香脆脆哋嘅感覺，而帶子心好軟熟，幽香嘅黑松露醬更能吊起其鮮甜味；而意大利飯飯心煙韌有咬口，卻又唔會有種生米嘅感覺，煮得具水準，而且飯中混有好多野菌，不過，如加入多少少黑松露醬，相信美味更沒法擋。







鮮奶咖啡 +$15 拉花拉得好精緻，好有期待咁飲落去，味道上帶淡淡煙燻味，而且，亦好醇香，不過，口感上感覺奶泡撞落去濃縮咖啡時唔夠勻巡，所以，晌無攬過嘅情況下，會過得有啲位順滑啲，有啲位無咁順滑。

食完都未夠7:00pm，天色才開始慢慢黑，好享受一個人零騷擾咁食餐飯，細味每一種味道！

回家途中，想咗好多今之出訪嘅事情，跑咗十幾年山區，睇住佢哋城鎮、鄉村嘅變化，更見到學生嘅學習環境得到好多改善。雖然內地有唔少貪腐之事，畢竟仍有不少好官！
個人評分 味道：8/10
環境：7/10
服務：7/10
抵食：7/10
平均每人消費：HK$153
餐廳資料：
Herbs And Spices
元朗教育路81號元達樓地下
2682 2618

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================