樂壽新漁村酒家

這酒家係食順德菜的，所以有大量河鮮提供

當晚點了冰鎮山葵魚皮、煎釀藕餅X2、啫啫芥蘭煲、啫啫魚卜煲、沙薑銀盆焗雞1隻、欖角骨、煎焗鮑魚X11、黑龍魚兩食、桂花炒瑤柱、豉油皇炒陳村粉、腊味煲仔飯X5、脆麻花、桂花糕X2，埋單$2598蚊.

銀稔:呢個係餐前小食，我都係第一次整粒銀稔食落肚，味道我覺得似青梅，係就無青梅咁酸的

冰鎮山葵魚皮:魚皮好爽脈啊，一點腥味都無，還食得出淡淡的山葵味，唔錯

煎釀藕餅:一碟有五塊，份量好像少了些，不過中間既魚肉都幾厚，完全無魚腥味，蓮藕都幾爽口，味道都唔錯

啫啫魚卜煲:初初上檯時，個煲鬼咁大，還以為係煲仔飯添，因坐著既視線係睇唔到裡面係乜野？見個職員打開蓋後，起勢咁炒，還以為很多材料，點知剛好相反，咁點解要用咁大個煲呢？不過魚卜係炒得很野味既，但最好配白飯食，順德菜係較濃味的，但亦未到好咸的感覺

黑龍魚兩食:一個係魚片炒西芹，另一個係炆魚腩煲，其實條魚賣相有些似鱔，但就粗身很多，這條魚成三斤幾重，職員話野生的，但我試後覺得吹水多囉！特別係炒魚片，食得出有泥味，但肉質有點彈性既，但一定唔值這個價錢囉！反而炆魚腩就好味得多，可能用了很多材料，所以泥味都中和晒，唔錯

欖角骨:隻碟無必要用咁大姐，我們這份量已係加大版本的，不過我都幾鐘意這味道，酸、甜、咸都調得剛剛好，其實係三層肉多過骨囉！

桂花炒瑤柱:都炒得幾好，起碼材料不會炒到過火，同埋唔太油膩

沙薑銀盆焗雞1隻:隻雞一點都唔肥架，雞皮同雞肉都有彈性，應該係用新鮮雞煮的，好得

煎焗鮑魚:一人有一隻，但原來要$58蚊隻架，都幾貴下，早知問清楚才點啦！不過喜歡又幾吸引，一年一次生日，算啦......

鮑魚用煎焗既煮法都係第一次食，咬落又幾腍喎，表面既味道雖然較濃，但都食得到鮑魚既鮮味

啫啫芥蘭煲:不過不失

豉油皇炒陳村粉:味道都炒得幾香，令我想起干炒牛河，早知問下可否加牛肉啦！

腊味煲仔飯:呢個飯真係不得了喇，係貴到嚇親我啊，要成$40蚊一人份量架，我點了五人份量，材料有腊鴨脾、腊腸、潤腸、腊肉等等，但我很討厭職員把材料先爽起囉，咁咪凍晒？唔通順德係這樣食法既？

飯都有腊肉的味道既，但無乜特別囉！

桂花糕X2:這個就很有水準喇，雖然老婆很錫我，試了一啖後，第二啖就一口食晒，所以點會唔好味，根據路人甲的報道:桂花很香很清甜

脆麻花:係我食過最差的，所以出奇地剩了兩塊！

以下要特別鳴謝岳母親手做的生日蛋糕

這個係藍苺芝士蛋糕，係做俾舅母既，因舅母當日係舊歷生日，祝舅母生日快樂、身體健康

呢個係桑子檸檬芝士蛋糕，賣相好靚啊

等我許個願望先

之後就係切蛋糕喇

這芝士蛋糕真係超好味架，因為加了檸檬既關係，食起來特別清新，加上濃濃的芝士味，自家制就是不一樣的

單據:雖然價錢睇落有點貴，但如果唔點貴格魚、貴格鮑魚、貴格腊味飯的話，價錢都可接受，因為還有很多菜式選擇的，所以都會再黎幫襯，加上職員服務都幾好，同埋環境係新裝修完！

感謝 Dusty 提供以上內容
Dusty 的個人網誌 : www.dusty1118.mysinablog.com/