微熱山丘 SunnyHills：丘之良品

你會唔會喺好熱衷儲飛行里數嘅人呢？我都會儲，不過就唔喺搏晒命嗰啲，偶爾，有啲里數就快過期，但又唔足以換張機票遊吓埠，最叻喺換吓機鐵免費飛，今次就摷到原來可以用3,000里換盒微熱山丘嘅鳳梨酥（10個裝），加上老婆對佢哋嘅鳳梨酥情有獨鍾，所以，就更加好好利用就快到期嘅里數換一盒試試。


雖然對中環區都頗熟，不過，嚟微熱山丘甚有尋「丘」探秘嘅感覺，因為店家位處贊善里，喺半山嘅一條小巷，稍不留意就會過門不入，行過咗都唔知。

是日乘工作之便過嚟，倘大嘅空間，無排列擠擁嘅枱櫈，簡潔嘅佈置，一枱連一櫈，都散發着悠閒嘅氣息。不過，因為喺閒日晏晝，嘩！靜到呼吸聲都聽到咁滯。







櫃枱一角，擺放各類產品，有茶葉、鳳梨汁，當然，鳳梨酥始終喺主角。

鳳凰酥分5個裝（$85）及10個裝（$160），包裝簡約，唔花巧，更連埋一個長形卡其色不織布袋，方便拎走。

打開包裝盒，內附介紹卡，10件鳳梨酥擺放得妥貼整齊。而每件鳳梨酥都以蠟紙包妥，並印上店家名字及標誌。



每一磚鳳梨酥都烘得金黃平均，切開一睇，已見到絲絲菠蘿果肉嘅纖維，而佢哋啲鳳梨酥喺標明以菠蘿肉製造，非傳統嘅冬瓜蓉，果真真材實料，外皮嘅厚度都算適中，太厚就硬，太薄就散，而餡肉清甜軟糯，整體嚟講真喺幾好食。



老實講，小弟應該都喺第一次品嚐佢哋產品，感覺真喺唔錯，老婆更喺讚不絕口。
個人評分
味道：9 /10
環境：- /10
服務：- /10
抵食：- /10
平均每人消費：HK$0
餐廳資料：
微熱山丘 SunnyHills
中環贊善里8號地舖
2812 1299

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================