探險家攻略 > 休閒玩樂 / 城中探秘 / 旅遊 > 其他 / 特色景點 / 古蹟 / 其他 / 長線旅遊 > 大阪。再見..白川鄉 Day6-7

大阪。再見..白川鄉 Day6-7

由平凡人於 2016-05-27 20:00:00 發表 | 累積瀏覽 386

分類：其他長線旅遊特色景點古蹟其他；地區：大阪,其他

< 日本中部﹑關西﹑中國15天遊 >

第六天（續）

短短五日既北陸旅程已經近尾聲，而家要起程離開呢個充滿雪既童畫世界白川鄉，返到屬於我地既現實世界，白川鄉...有緣再見！

由白川鄉去大阪要先坐巴士去金澤，再轉火車到大阪，巴士票係香港已經訂好，早幾日已經拎左正式車飛，睇岩時間上車就得

巴士一路穿過雪地向金澤駛去，全條路都好多雪



估唔到連金澤市區都有積雪，呢幾日北陸地區應該都有落大雪？如果今日去兼六園就可以見到傳說中既雪掛，可惜要趕住走無得睇啦...

今次臨開車先去換指定席，排到櫃位時已經無晒相連座位，即刻上月台排隊上自由度仲好，又好彩成功搵到位坐



開頭好長一段路都鋪上雪，係訓下醒下之下唔知去到邊開始無雪lu，今次冰雪之旅完滿結束



經過兩個幾鐘車程，返到大阪一落車突然有種唔習慣既感覺，呢道真係好多好多人！之前係高山下呂呢啲小城市夜晚人影都唔多個，就算係北陸最大城市金澤都唔係好多人，望住咁多人行黎行去一時間適應唔到

好耐都未見過咁多高樓大廈，有得比我揀既話我都唔想住係大城市


出左大阪站直接行去位於「肥後橋」地鐵站附近既「Ark Hostel」，黎緊我會係呢道連續住8晚，我從來都未試過旅行期間係同一個地方住咁耐，今次無計啦自己懶搬黎搬去，住同一個地方就唔洗煩


差唔多九點，放低啲野就出去搵食，係大阪就算幾夜都唔怕無野食


上次係福岡食過好好食既一風堂拉麵，今次黎到日本又有機會食啦，行左去大阪站附近既分店



餃子先到，新鮮熱辣好難唔好食


拉麵都好快到，今次食上次都食過既赤丸，朋友食白丸；今次呢個拉麵雖然都係好食，不過就冇好食到有種「嘩」一聲既感覺，算係不過不失啦，係有小小失望，不過都ok既，福岡個間總店好食好多



肚餓加多個「替玉」，上次大鄉里唔知替玉咩意思，今次知道啦


第一次坐大阪地鐵


朋友浸溫泉浸上癮，搵左個近近地既溫泉比佢過下癮；時間唔早，浸完溫泉要趕坐尾班地鐵返去，今日又由朝玩到晚

每一日既旅程都好似好豐富，係時候好好休息一下



第七天

今日係北陸旅程最返一日，朋友今晚會返香港lu；所有北陸行程都完滿結束，今日無咩指定地方要去，只係等夠鐘上機，所以今日可以話係無行程

早餐係松屋搞掂，牛肉飯只係￥290咋，仲唔係平靚正


￥290同￥390牛肉飯既分別

今日無特別目的地，所以都無點影相；第一站去左大阪站上面既Pokemon Centre朝聖



大阪啲地鐵站睇落好似好舊，但啲車超準時



去左可能係全大阪最旺既地方「心齋橋」，每個旅客幾乎一定會到



黎得呢道都係想行街買野食野，我行左Disney Store﹑Sanrio Gallery同GU；係GU買左唔少野，哈哈^^真係好平



標準影相位


無目的四圍hea下



「道頓堀」成條街有N咁多章魚燒攤檔，基本上檔檔都有好多人排隊，求其揀左檔小人既排下



鴨仔八達通


搵左間餐廳食我鐘意既烏冬；日本好多烏冬店都同呢間一樣先揀好烏龍同配料，最後先比錢，上次係京都第一次食唔知咁複雜，好彩遇到一個好心姨姨教我，今次我識叫野食啦，日本既烏冬特別好食



返到香港睇返相先知呢間烏冬店就係當年第一次係京都食過個間


食完坐地鐵返hostel拎行李啦

今次旅程經過好多次郵局，每次都想買明信片，一路諗住最後個日先買，但最後個日入左郵局完全唔記得左呢件事...

大阪站好大

去到大阪站，坐關空快速去關西機場

去到T2送朋友入閘後，兩個人既北陸旅程完結啦，今次係北陸白川鄉真係玩得好開心，欣賞過好多美景，又體驗過好多第一次，今次係一個好開心既旅程，希望朋友同我一樣都覺得開心啦

第一次送朋友機，而且仲要係外地，感覺係好特別，希望將來可以一齊再去旅行！等朋友入左侯機室，我過返T1行下，又見到小精靈啦



睇岩時間返去火車站，我自己一個坐火車返大阪市中心

今次坐特急HARUKA出去，座位舒服過關空快速好多（頭先關空快速好多人，差唔多企足全程），當然價錢都貴一啲



今日開始我用呢張「關西廣域鐵路周遊券」，坐呢部車唔洗另外比錢架；張pass係香港先係網上訂好，去到大阪再比錢，價錢係￥8500，可以用五日咁多好抵玩

關西廣域鐵路周遊券可以係呢道預訂
http://www.westjr.co.jp/global/tc/ticket/pass/kansai_wide/

HARUKA去到新大阪站，要坐返一個站到大阪站

落左車直接行返hostel休息lu，呢間hostel張床好大好舒服，而且仲好平，大約150港幣一晚，岩晒我呢啲冇咩錢既人住

北陸白川鄉旅程結束後，我既旅程仲未完架，聽朝訓醒將會開始另一個新旅程，關西中國一人獨遊之旅即將開始！

鐘意SeeWide的分享，給我們一個Like吧！