Holy Crab Bar and Restaurant：蟹逅相逢

一向都因為公司有包伙食，所以，甚少晌返工日在外食晏，中環食晏真喺多人到不得了呀！但喺，偶爾會有啲同樣晌依區做嘢嘅朋友，想聚一聚食吓晏，唔使下下等到邂逅相逢先至約嘅。只不過近德輔道、皇后大道嘅食店都塞爆，食得急，又唔方便坐得耐，所以，揀咗晌蘭桂芳再上啲嘅Holy Crab，貪其靜靜局方便我哋傾偈。


雖然知道依一截區域上嚟食飯嘅人唔多，但為求穩陣，訂枱為上。一出升降機就見到餐廳嘅招牌巨蟹，實唔會搵錯地方。原來，午市訂位有九折，真喺無啦啦慳番少少，當唔使俾加一。

內進環境比想像中闊落，先喺酒吧位，繼而用餐區，見到佢哋張招牌波枱，只喺午市會冚住。一室木系，配以柔和燈光，大電視不停播放體育節目，收工上嚟飲吓嘢都叫人分外輕鬆。





午餐有兩個大類別，「藍色」可以話喺基本午餐，包是日餐湯或墨西哥饀餅，主菜5揀1（$108-$168），以及是日甜品及指定飲品。

另一個「橙色」稱為行政午餐，同上面嘅「藍色」午餐大同小異，都喺餐湯或前菜、一道主菜、加上甜品及飲品，揀咩主菜都喺收費$178，只喺整體嘅選擇用料靚少少。

餐湯或前菜未上，先嚟幾杯餐飲，兩位朋友不約而同揀Homemade Lemonade，雖然大大杯夠晒涼透心，但有點偏酸；好彩小弟揀杯Holy Punch，喺以西柚為主嘅賓治，酸甜度適中，而且，西柚味突出。



南瓜忌廉湯 是日餐湯只有一款選擇，個忌廉湯色澤橙紅，睇落好對辦。小弟揀饀餅，不過都試咗一小羹，質素亦算唔錯，滑溜之餘南瓜味都好足。





燈籠椒墨西哥餡餅 件餡餅無論外觀、質感，都似意式薄餅，燈籠椒唔喺好見，但鋪滿蕃茄莎莎，以及唧上酸忌廉，酸香輕怡，又伴有唔少田園沙律菜，好清爽嘅頭盤。



主菜我哋幾個打算共享，所以，盡量揀啲易分食嘅菜式，故此，就點咗意粉、意大利飯及肉眼扒。



蕃茄羅勒意大利粉 $108 有時候，好簡單嘅菜式先考到師傅手勢，而依一道意粉都可以咁講。咪睇碟意粉個樣普普通通，但意粉有咬口，醬汁茄香味濃，又夠鮮活，添了少少羅勒，香味就變得有層次嘞。





太平洋蟹肉意大利飯 $148 因為加入咗蕃紅花醬，所以，飯粒煮起一身金黃，撩起啲意大利飯，睇到絲絲蟹肉，而且，落得無手緊，令飯粒添上鹹鮮味，再者，煮得口感啱啱好，煙韌有咬口。





燒澳洲肉眼 $168 因為塊扒大得嚟裁得較薄身，容易煎過火，選五乘熟，出嚟嘅效果切開一睇都喺僅僅達標，煎多半分鐘都過晒火，肉質頗軟腍，可是肉味未有預期咁濃，始終喺食肉眼，喺期望會肉味濃啲。而伴菜有焗薯及露荀仔，前者既粉又有薯味，後者則食落細嫩無渣。



最後上場就自然喺甜品，仲寫明配雜莓及薄荷葉，睇見都有啲幻想會喺咩好嘢。



牛乳布甸 原來，只不過喺牛乳布甸，並且只喺原樽上，無乜任何裝飾，對比起餐牌咁寫，就當然會有種迤嘅感覺。至於個布甸如何？味道唔差，幾香奶味，但質感偏削，做番挺身啲就口感極佳。

作為打工仔，唔喺講工作嘢，就喺講旅行嘢，點樣去散散心，充充電，聽朋友講秋天已安排咗出門，雖然都仲有成好幾個月，但都先預祝一切順利，旅途愉快。
個人評分 味道：7/10
環境：8/10
服務：7/10
抵食：8/10
平均每人消費：HK$140
餐廳資料：
Holy Crab Bar and Restaurant
中環蘭桂坊8-11號昌隆商業大廈3樓
2110 0100

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================