0

高松。玉藻公園﹑讚岐烏冬 Day8

平凡人 於 2016-06-12 12:00:00 發表  |  累積瀏覽 488

分類:長線旅遊 其他 特色景點 公園 其他 郊遊 ;地區:大阪,其他

< 日本中部﹑關西﹑中國15天遊 >

第八天

關西﹑中國﹑四國之旅正式開始!頭四日會用關西廣域周遊卡離開大阪,先去一啲遠少少既地方,之後兩日會用大阪周遊卡係大阪市內漫遊;同之前北陸旅程有少少唔同,之前同朋友一齊都唔敢玩到咁誇張,而家我自己一個就可以慳慳地平遊日本啦

今日有好多地方想去,未夠七點已經出左門口,天都係岩岩開始光咋

陽光岩岩照落大阪站,今日由呢道坐火車出發

今早要去到四國咁遠,如果由大阪坐普通列車去就有排坐,好彩張pass可以比我坐新幹線,咁緊係去坐新幹線啦

大阪站係無得坐新幹線,要先坐一個站到新大阪站轉車,幾分鐘就到

去到新大阪站唔洗出閘,係在來線大堂入面就可以過到新幹線大堂

下一班開去岡山既列車仲有幾分鐘開出,有小小時間比我呢個半個鐵路迷睇火車

見到圓碌碌既500系新幹線,從來都未搭過,預計聽日會坐

今次我坐呢班係N700系列車,係九州時已經坐過好多次,係其中一部我最鐘意既車

用pass可以坐自由席,座位係3+2設計,無係九州坐慣既指定席2+2咁闊,不過都好舒服

佢都有位坐

上車之前已經買定個飯團,上左車可以坐定定開餐

離開大阪後經過好多鄉村地方

話咁快,49分鐘車程到達岡山站

對面有部700系Railstar到站,唔知有無機會坐到佢呢?

岡山站新幹線同在來線都係同一個站入面,好易就過到去在來線個邊,睇清楚指示牌行去6號月台等車

麵包超人特別列車!麵包超人係四國代表,我相信部車都一樣係去四國個邊,不過我唔係咁唔肯定,唔敢坐...

旁邊有部不知名列車

我都係坐返呢部去高松既車穩陣啲

火車路過一啲比較少人既車站,上落車要自己禁掣開門

四國係本州之外日本第四大島,由本州到四國要跨過瀨戶內海,火車會通過由5條橋組成既瀨戶大橋

過橋時可以睇到瀨戶內海風景架

車速唔慢,全程都保持120km/h

見到瀨戶大橋由好多條橋組成

大約一個鐘車程到達高松站,第一次踏足四國土地之上心情特別開心,我終於可以係道打個卡啦!呢個係我山長水遠黎到四國既原因之一,哈哈^^用張pass坐黎呢道又唔洗錢,咁緊係黎左先算

原來頭先坐黎個部車車頭型好多,係雙層頭等車廂

由大阪出發坐左咁大輪車,終於係十點前黎到四國高松,係車站又見到麵包超人既海報,麵包超人係四國其中一個重要代表,我諗係四國去到邊都會見到

高松站有個小小遊客中心,每到一個地方都要黎睇下當地有咩玩

高松站有個笑樣

曾經諗過係呢道踩下單車,見佢個借單車系統好似好複雜都係懶搞

今日陽光超好

黎到高松我本來計劃係去有米芝蓮三星評價既「栗林公園」,係經過呢個「玉藻公園」時,決定入去玉藻公園而唔去栗林公園lu...一黎栗林公園要坐車去煩一啲,二黎我成日去公園,去少一個冇所謂既,哈哈

玉藻公園所以地係高松城遺址;高松城天守閣已經唔存在,不過都可以睇得出高松城好特別,城堡起係海邊,背面係大海,東西兩面有渠道引入海水,可以見到城堡比海水包圍;玉藻公園門票唔貴,¥200就得

高松城地理位置特別,係日本三大水城之一

公園內有一啲日式建築,係依高松城模樣收復出黎

出面就係大海

有個小花園

公園入面唔係好多人,見到既應該唔夠廿個,行得好舒服;係公園行行下突然有日本人向我問路,我都唔知點答佢好...

有個小小陳列館展出高松城相開歷史同文物,但入面又靜又黑,曾經有一刻猶豫唔係好敢行入去

天守遺址位於水中間,穿過木橋可以到達

上面已經冇建築物,只係得返地基咋

行高啲風景特別靚,仲可以見到昔日城堡面向大海既水門

當年就係咁啦

櫻花季節呢道一定好靚

玉藻公園外面有個小小車站,可以乘搭「高松琴平電氣鐵道」遊覽高松,但今次我只有好少時間留係高松,唔可以再去其他地方啦,而家諗返覺得有小小可惜

行返去火車站個邊,係時候開餐

高 松有一樣野好出名,就係烏冬!高松位於香川縣,而香川縣古稱「讚岐國」,見到讚岐兩個字就知呢道係好出名既讚岐烏冬出產地;烏冬唔係名貴野,係香港我都好 鐘意食,黎到四國其中一個目的就係食烏冬(唔理好唔好食,係烏冬出產地食烏冬感覺特別良好),一路行一路係tabelag(日本人用既openrice) 搵下邊道有好食既烏冬,睇睇下就揀左呢間近火車站既烏冬店,見佢啲評分都OK高

同其他烏冬店一樣,都係自己揀烏冬同配料

實在太想食烏冬,我都唔記得呢碗係兩個定三個烏冬啦;烏冬上既蔥同脆脆係自己加上去,好好味!只要烏冬靚既話,咩餸都唔洗就咁一碗烏冬已經好好食!今次我食呢個烏冬係凍架,第一次食咋,正!!

好彩早小小到,十二點食完出黎好多西裝男士排除,就快排到出門口;呢啲烏冬店價錢好平,就算食最大碗既三烏冬都係¥490,香港應該冇可能食到咁平又咁好食既烏冬

食完烏冬就去超級市場買烏冬,又係火車站買左一啲由出名製麵所造出黎既烏冬,不過就算買啲貴烏冬,煮出黎既味道都唔似係當地食咁好,唉...

為左買烏冬諗左好耐,搞掂之後要衝入去上火車,好彩成功上到,miss一班車就有排等,四國再見

大約一點半返到岡山站,短短既四國之旅話咁快完成

今次無無聊聊走左去四國,除左為左打個卡之外就係為左食正宗讚岐烏冬,兩個目標總算成功完成,哈哈^^其實高松仲有好多地方值得去,今次我懶冇去到其他地方,將來有機會再去啦

鐘意SeeWide的分享,給我們一個Like吧!
  • 攻略日期:N/A
    攻略地點:大阪,其他
  • 攻略時間:N/A
    是次消費:N/A
0人比"掂"
  • EEChan 於2016-06-12 13:07:23 留言
    引用自 '平凡人' 的相片:

    回覆:可愛
  • 舉報 回覆
  • No.1
  • 平凡人 於2016-06-14 21:28:52 留言
    原文由 EEChan 於 2016-06-12 13:07:23 發表
    引用自 '平凡人' 的相片:

    回覆:可愛
    可惜冇坐
  • 舉報 回覆
  • No.2
  • 1874飛飛 於2016-07-01 14:54:56 留言
    可以乘新幹線當然搭啦, 可能差兩三小時架
    一個人好處係想快D又得, 想留耐D又得, 係會上癮架!
    已經唔肯定有無去過高松, 因XX 城的天守閣個個都係咁上下樣
  • 舉報 回覆
  • No.3
  • 平凡人 於2016-07-16 06:48:03 留言
    原文由 1874飛飛 於 2016-07-01 14:54:56 發表
    可以乘新幹線當然搭啦, 可能差兩三小時架
    一個人好處係想快D又得, 想留耐D又得, 係會上癮架!
    已經唔肯定有無去過高松, 因XX 城的天守閣個個都係咁上下樣
    新幹線真係太舒服,坐到唔想落車慣左一個人旅行,好自由,同人一齊去唔多唔少都要就返同行者步伐我都覺得啲天守閣都係大同小異,哈哈
  • 舉報 回覆
  • No.4
  • stellaluk 於2016-07-22 07:37:16 留言
    遊日本我喜郊遊,遠離繁囂都市。
  • 舉報 回覆
  • No.5
  • 平凡人 於2016-07-22 21:03:06 留言
    原文由 stellaluk 於 2016-07-22 07:37:16 發表
    遊日本我喜郊遊,遠離繁囂都市。
    有得揀我都喜歡郊遊多啲
  • 舉報 回覆
  • No.6

最多能輸入300字

累積瀏覽 112272

全部攻略 126

全部回應 1394