0

岡山。西大寺會陽裸祭-日本三大奇祭之一 Day9

平凡人 於 2016-07-12 20:00:00 發表  |  累積瀏覽 1427

分類:其他 長線旅遊 特色景點 廟宇 古蹟 其他 ;地區:大阪,其他
< 日本中部﹑關西﹑中國15天遊 >

第九天(續)

日本唔同地方都有特色祭典活動舉行,呢啲祭典好多時一年先舉辦一次,如果唔係專登就時間,要咁岩遇到都唔係易;就係咁岩係出發前幾日係網上見到有人講岡山就快舉行呢個祭典,咁岩又係我係日本既日子,最後就黎左呢道啦,唔係見有人講我都未聽過有個咁特別既活動,哈哈

今晚舉行祭典既地方唔係岡山市內,要再搭一程火車先到,係岡山站轉搭赤穗線就可以去到,交通都算方便;赤穗線係單線雙程行車既小鐵路,半個鐘先有一班車,係岡山站行到差唔多時間落月台上車;岡山站有好多鋪頭行,而且有好多烏冬賣,早啲見到琴日就唔洗係高松買咁多啦

今次呢班車好型丫,睇相就見得多坐就第一次;呢程車張pass都係包左唔洗比錢,點坐都得

火車離開大城市去到一啲住宅地方,車站都細啲只得一個月台

大約二十分鐘車程去到「西大寺站」落車,今晚目的地就係西大寺

同頭先個站比呢個算係大站啦,有兩個月台咁多

平時呢啲站除左當地人之外我諗冇咩其他人會到,今晚好唔同有好多人落車,車站仲有職員開定櫃位賣回程車飛

火車站出面聚集左好多人,係道留意到一樣野,去參觀既人多數都係年輕女仔,男仔相對少啲,點解會咁既呢?一陣可能會諗到答案,哈哈

火車站去西大寺之間插滿「西大寺會陽」旗幟,我相信今晚呢個祭典好盛大

唔洗自己搵路去西大寺,跟住大隊行就一定冇錯,大部份人今晚都係去同一個地方

跟 大隊果然冇錯,行左大約十分鐘去到會場外圍,好多人咁早已經黎到;而家只係六點半,今晚重頭戲「搶寶木」十點先開始,之前呢段時間唔洗擔心悶,一早已經有 好多野睇好多野玩,我覺得黎得遲tim...其實我今晚未夠十點就要離開,因為十點之後會轉唔切車返大阪,搶寶木同我無緣...

路邊出現大排檔,係福岡會叫「屋台」,唔知呢道叫法係唔係一樣呢?

呢道仲有飲品免費派比大家,雖然唔知係咩都拎黎試試,不過試完都唔知係咩

路上有表演節目,睇既人唔多,大家都向住西大寺前進,我相信西大寺一家有更吸引既節目等住大家,我都繼續行去

唔比飲酒我明點解,但點解紋身都唔得呢?

而家六點半可以直接入西大寺參觀,七點半就唔可以再入去

由仁王門進入

一入去就見到好多特別打扮既人,一陣應該到佢地演出,出面空地已經有人表演緊

前面呢個係「西大寺觀音院」大殿,時間尚早可以上去參觀;我對西大寺一啲認識都冇,邊道打邊道都唔係幾知,今次黎係為左湊熱鬧

勁多日本國內外電視台拍攝

行去後面河邊發現好多攤位,一陣一定要過去,面家先四圍行行

好多人表演,見地下濕晒都覺得佢地好慘,晴天之國今日天公不造美bor,或者向好個邊諗最少而家冇落雨已經好好...為表支持我睇晒佢全場表演,哈哈

真係睇到佢完場架

呢邊舞台有打鼓表演

呢道後面有個水池,咁多人守住唔敢行埋去

行上大殿睇下

夜晚七點河邊企滿好多人,對岸開始放煙花;我遲左小小先黎到,又好彩比我搵到個靚位慢慢睇,條河咁長要搵個好位睇煙火都唔係難既

今次係我第一次出街睇煙花,香港睇煙花咁迫人從來都未去睇過,呢道睇舒服好多;呢個煙花同我地香港既煙花都有好大分別,呢道係一個個慢慢放,唔同香港一大堆射上天;一直都好想係日本睇正式既煙花大會,次次撞唔岩都冇計,上次係熊本撞岩日期又唔岩地方...

煙花好似一路都放唔完咁,睇左一陣我又走返去西大寺個邊,好多人仲欣賞緊;唔知岡山呢個活動係唔係唔夠出名呢?好似冇咩遊客黎到,成晚只係係煙花呢道聽過一次廣東話,國語都只係聽過兩次,同大阪一街遊客差咁遠?

呢道好熱鬧一陣一定要過黎開餐,以前睇卡通片見過日本呢啲祭典活動一定有好多小攤檔,想體驗好耐啦

之前見出面寫住七點半唔入得黎,我係七點半前成功入返黎西大寺觀音院,主角門開始出埸!

先此聲明:「西大寺會陽」呢個活動之中會出現好多或者會令人不安既裸露畫面,如果大家對呢方面不安既話千其唔好睇,真係唔好再睇!係右上角X左呢個網頁就得,SORRY!呢個係日本傳統文化,當地人都會同小朋友一齊睇架

呢個疑似係西大寺會陽官方網站 (唔肯定),可以入去了解一下呢個活動

http://www.saidaiji.jp/website/

西大寺會陽又有名叫「裸祭」,係每年二月第三個星期六舉行;呢個活動每年都有幾千人參加,而且只限男性,大家唔洗幻想有唔著衫既美女出現,唔著衫既美男就有好多,哈哈

好多人係仁王門等大一班主角入場

正殿上面都有好多人,點上去架?

裸之守護守

一陣佢地既前進路線係咁,由仁王門進入西大寺之後去水池,再去大殿,然後去拜裸之守護守,最後又去返大殿不停轉圈,應該要轉到十點搶寶木

好多人企上去等睇戲

之前咪話過特別多女仔黎睇,呢道仲好多女學生tim,除左因為可以睇到靚仔之外,另一個好大既原因係好多學校同唔同機構都組織男仔黎參加,唔知佢地係自願定被迫啦,當地好多男丁黎晒參加變成觀眾女多男少咁囉

七點半主角準時入場,第一批人係岡山一間中學,佢地啲女同學勁興奮

所有參加者都係著住條「兜檔布」(即係日本傳統底褲)同對鞋咋,要知道而家係二月,氣溫最高都係得幾度,要有幾大勇氣先可以衫都唔著走出黎!!仲要浸凍水!!

浸過凍水大家身上出晒煙,係歡呼聲之中邁向大殿

主持係大殿之上向大家撒水,佢地應該興奮到唔覺得凍!睇相唔覺得點,現場佢地係high到啪左丸咁,氣氛超正

不停有隊伍入場,在場所有人都好開心;除左團體之外,好明顯見到有啲一個人黎參加既大叔係隊伍尾跟大隊行,相信佢的一定好尊重同鐘意呢個當地獨特文化先會咁有勇氣自己一個參加

中間繼續有表演

佢地好似好凍咁,哈哈;好多路人伸手想同佢地握手,佢地都好熱情回應,在場無論係唔係參加者都係咁開心,如果好彩話唔定可以同到即將誕生既福男握手呢

睇睇下發現到一個問題,而家四面都比人圍住,我被困係大殿位置走唔到

搵晒四面都搵唔到出路,心諗呢次大獲啦,走唔到唔知點算

突然比我留意到有一個家庭同我一樣搵緊出路,我一於跟住佢;呢個決定冇錯,佢地同職員講左幾句就有職員讓條路比佢地出去,我跟到實成功出返外圍

直接行去河邊既路封左行唔到,兜個大圈行另一面出去

呢道好熱鬧丫,就好似香港年宵市場咁,有野食有野買有野玩;入面所有野同香港好唔同, 一直想體驗呢啲市集好耐啦

大部份係小食攤檔,好多都係第一次見,首先行一圈搵下有咩岩食

唔知係咩黎呢?

日本市集一定有既朱古力香蕉

都係必有既冰糖蘋果(我係睇小丸子先識呢啲咋)

燒八爪魚

薯條

兩條街開滿攤檔,好多野食都有唔只一檔賣,由其燒八爪魚有超多檔

越行越多人

日本綿花糖係咁樣一包包裝好

呢個係日本傳統小遊戲釣水球

行左兩個圈,睇中左呢檔想試,見佢有人排隊好似幾ok

我係第一次見呢種食物,亦都唔知佢係咩黎,見佢幾得意好似好好食比佢吸引左

上面有好多醬汁,好好食架

呢個都好想食,但咁大份一定食唔晒

市集中間有個小公園,好耐都冇見過呢啲咁舊式既遊樂場設施

應妹妹要求買左呢條朱古力香蕉,食落係朱古力+香蕉味囉(廢話);兩個味道係分得好開,各自都好好食,夾埋都唔會難食

買左細細舊黎試,冇咩特別,香港炸魷魚鬚正好多

日本牛肉靚整返串牛肉先,串串都大大串啖啖肉,好正

買個時老闆阿叔突然同我講英文,仲要係好流利,比佢嚇一嚇唔識反應

行到九點零鐘,要趕返火車站坐車走lu

今晚西大寺站都叫有小小人氣,如果夜晚黑媽媽係一啲冇人既火車站都咪話唔驚

順利上車返岡山;呢班係可以轉到車返大阪既尾二班次,為安全起見早小小走算啦,玩得太盡上唔到車要留係岡山都唔知點算

今次坐呢部700系Rail Star新幹線列車,我係第一次坐佢架,坐埋佢之後山陽新幹線現有所有型號列車都坐過晒

自由席係2+2設計,比其他車3+2座位更加舒服

車箱最前仲有包箱位,唔知係咪貴好多呢﹖

十一點幾返到大阪,又玩足一日,哈哈

「西大寺會陽」呢個活動真係好正,又熱鬧氣氛又好,仲夠晒特別,可以見識到日本地道文化真係不枉此行;如果可以留到十點睇搶寶木一定超正,十點正西大寺會熄燈,幾千個無著衫既男人係黑暗之中大混戰,呢個畫面一定好震撼!想更震撼仲可以報名參加搶埋一份,搶到就可以做全年最有福氣既「福男」啦!

 

 

鐘意SeeWide的分享,給我們一個Like吧!
  • 攻略日期:N/A
    攻略地點:大阪,其他
  • 攻略時間:N/A
    是次消費:N/A
0人比"掂"
  • EEChan 於2016-07-13 00:33:17 留言
    引用自 '平凡人' 的相片:

    回覆:好凍咁喎
  • 舉報 回覆
  • No.1
  • 平凡人 於2016-07-16 06:39:07 留言
    原文由 EEChan 於 2016-07-13 00:33:17 發表
    引用自 '平凡人' 的相片:

    回覆:好凍咁喎
    見到都覺得凍
  • 舉報 回覆
  • No.2
  • 1874飛飛 於2016-07-18 22:21:45 留言
    遇上傳統節日幾難得, 好多有趣東西睇
  • 舉報 回覆
  • No.3
  • 平凡人 於2016-07-19 00:18:54 留言
    原文由 1874飛飛 於 2016-07-18 22:21:45 發表
    遇上傳統節日幾難得, 好多有趣東西睇
    今次真係大開眼界
  • 舉報 回覆
  • No.4
  • stellaluk 於2016-07-25 08:03:34 留言
    「雖然唔知係咩都拎黎試試,不過試完都唔知係咩」哈哈哈!!!
  • 舉報 回覆
  • No.5
  • stellaluk 於2016-07-25 08:06:44 留言
    咁凍,仲要浸凍水的裸祭,真係睇見都凳佢凍
  • 舉報 回覆
  • No.6
  • 平凡人 於2016-07-31 08:47:19 留言
    原文由 stellaluk 於 2016-07-25 08:03:34 發表
    「雖然唔知係咩都拎黎試試,不過試完都唔知係咩」哈哈哈!!!
    哈哈,見個個都飲我都試試
  • 舉報 回覆
  • No.7
  • 平凡人 於2016-07-31 08:50:04 留言
    原文由 stellaluk 於 2016-07-25 08:06:44 發表
    咁凍,仲要浸凍水的裸祭,真係睇見都凳佢凍
    所以只有勇敢既人先可以參加,哈哈
  • 舉報 回覆
  • No.8

最多能輸入300字

累積瀏覽 87747

全部攻略 126

全部回應 1394