小齊3年o既幼稚園生涯結束了
好多謝根德園幼稚園帶比我同小齊咁美好o既回憶
好慶幸當初被選中, 今日先有機會寫呢篇回顧文!
兩年前寫過一篇 (見舊文), 今次找數寫埋呢篇!
![]()
回想返由收到 KV offer 開始, o係各方渠道聽返o黎話KV
(1) 好谷, 好多功課, 英文唔得
(2) 軍訓, 老師惡
(3) 冇活動, 小朋友冇左童年云云
說實在我是半信半疑, 都係自己親身感受最實際!
經過左3 年, 我諗我都有dd資格發表一下用家感言, 等考慮緊KV o既家長諗下適合與否
(戴返頭盔: 以下只代表本人意見, 所寫內容有部份乃 HEARSAY, 請自行過濾 )
![]()
(1) 好谷好多功課, 英文唔得 -- 我諗呢樣係相對家長期望同要求而言, 首先我想講"期望"無對錯, 但如果發現不乎期望-- 即錯配, 要主動抽身
如果家長期望幼稚園應該係玩多, 唔好咁早執筆寫字, 最好無功課, 咁說實在KV真係未必啱你
K1 玩比較多, 寫字唔多, 下學期先寫 D 人, 工, 口之類...
K1 我唔覺得老師有咩要求, 有評估卷但唔難, 而且係做完家長先知, 我自己覺得冇乜壓力
(不過我又聽過有CASE係老師會打比跟唔上的小朋友叫家長暑假幫小朋友溫下書)
K2 開始就真係好紥實地每日三樣功課 (中, 英, 數) ,
有默書 (叫記憶遊戲但 IN ESSENCE係默書)
評估卷開始會難D 唔係成日有100分, 會有獎項如默書獎 (呢個無限人數, 達標就有), FIRST PLACE, 超越自我獎...
我無比較太多其他幼稚園情況, 我自己覺得KV功課程度可接受
以小齊黎講, 佢乖乖肯落筆的話, 30分鐘之內做晒3樣冇問題
如果遊魂加心有旁騖的話, 做超過1個鐘都試過
但呢樣都係好個人亦好睇狀態, 有D 小朋友坐定定自動波,
有D 拎起支筆就眼瞓...
但我要同KV平反少少係長假期係冇乜功課咖, CNY 假期直情係一樣都冇,
暑期作業開學唔駛交咖 (不過有同學會拎返去交, 但我升K3果年冇交都冇事)
功課o既o野呢, 有時no pain no gain,
呢3年KV 將我個女由中文文盲變成可以寫字,作句.寫短文o既程度 ,
數學亦係由零變成雙位加減加少許乘數,
中, 數我地全無外補, 真係全靠KV!
英文方面有家長擔心 KV 程度唔夠, 我就覺得OK, 佢地K3已經有COMPREHENSION, 係ORAL可以加強D, 所以我有同佢出街學IPA同朗讀, 屋企我地自己有聽AUDIO BOOKS, 睇書,有同學會自己出去考STARTERS, MOVERS...
其實讀任何學校都係咖啦, 你覺得邊方面唔夠咪自己諗下辦法,
返學先得個3個鐘, 真係教到曉飛天咩? KV能夠做到咁我已經感激不盡!
REALISTIC D, 諗下其餘個21個鐘做咩仲好啦!
![]()
(2) 軍訓, 老師惡
呢樣係咪即係話小朋友一返到學校就自動波交功課文手冊果D, 定係話校車唔好傾計?
可能就係呢D 好多人話KV係幼稚園小學化
但返學就係想佢學自律, 群體生活啫
群體生活就係要有規矩, 小朋友自動自覺做自己o野我覺得好理想
唔比校車傾計我其實舉腳贊成, 一來太嘈會影響司機啦
二來小齊坐校車好多時都係瞓覺靜靜地仲好
三來我覺得公眾地方就係應該保持安靜, 我去日本坐機場巴士可以係全車滿座但一粒聲都無
人地真係可以o係車程度休息, 呢個都係一種尊重, 唔好影響別人
KV 咁樣教小朋友我其實係欣賞。
老師我都唔覺得惡喎, 我地呢3年o既老師都唔惡,
獎罸分明, 成日送小禮物比小朋友, 佢地返學拎好多貼紙返o黎
我反而聽過有另一間o係同區o既kg 老師收好多家長送o既禮物,
老師之間仲會比較邊個收得名貴d... 老師咁o既操守的話就算佢幾有愛心都假
KV 我就未聽過話要家長送禮啦, 我最多係生日PARTY 預備小禮物時預多兩份比埋老師,
都係蝦片朱古力...咁上下
值得一提係 KV 老師TURNOVER RATE 好低好低 (除左NET 見到有新面孔)
好多都做到退休
無他o既, 學校唔好搞咁多行政o野, 老師可以專心教書自然流失率低
據說同區某kg可以一年轉幾次班主任, 對小朋友o黎講都唔係咁好啦 ~
![]()
(3) 冇活動, 小朋友冇左童年
無旅行, 無畢業典禮係真 (但家長自發搞係有, 而且搞得有聲有色! 我地家長自己都會搞gathering)
但有其他OUTING, 如去牙齒中心 (什麼陽光笑容小樂園)
文化博物館
只不過呢D家長冇份之嘛
有生日會小朋友玩得好開心, 家長又會自發預備小禮物比大家食/玩...
(當然係冇強制, 唔預備亦冇問題, 有D老師甚至話叫家長唔駛預備)
我其實覺得KV小朋友好樸素, 好乖巧
有時PARTY 完我去接小齊都會同佢o係操場玩一陣先走,
見到其他小朋友們都好開朗活潑, 排隊玩滑梯, 影相, 分享PARTY食物
我唔明點解會話冇左童年?!
![]()
![]()
講左d 大家對KV o既擔心之處, 我又想講d 我要大讚KV o既地方!
(1) 中文冇得頂, 我好想講, 幼稚園中文唔係要教得深先係好。
KV 好穩紥穩打, 由最簡單但常見o既字開始~
人工大口回田日白...呢d係要學寫o既;
同時又有d字卡唔駛寫, 只要識認就ok (最神奇係真係唔駛自己同佢溫, 譬如第10個星期你拎返第1至10星期果d字卡佢又真係識晒果度好o野!)
我知有d學校會比好多materials 叫家長自己返屋企教, 但KV 唔會, 仲叫你唔好預習以免小朋友上堂冇興趣, 但可以適時溫下書
坦白講到到第3年K3果陣因為已經知道學校教得非常好, 我連D 字卡都未搣開o黎用, 真係全新可以出讓果隻
除左教識小朋友d字, 仲有部首, 筆順, 配詞, 做句, 相反詞, 同音異字...
我覺得剩係中文一科我已覺得KV學費值回票價, 莫講話佢英, 數, 常亦係好唔錯
(2) 對家長要求不高
我知有D人會覺得呢個係弱點, 因人而異啦
對於我呢D要返工o既雙職父母, KV 簡直係善解人意
除左親子勞作, 家長日, 我都唔係好諗得出有D咩要勞動到家長
學校訓練小朋友要主動同家長報告, 例如要預備咩返學用, 幾時先可以換季著私伙褸
就算忘記左老師都會溫馨提示, 家長冇乜o野要擔心
(3) 學生背景接近
呢個係我自己觀察, 起碼我地o係學校廣東話通行無阻 (大家明我意思)
KV 作為私幼, 自己揀學生多數都有D共通點, 學校揀得你即係覺得你合適
但家長之中有full time mom 又有working mom,
有人坐校車又有人係家長送,
大家升小o既目標都類似, 所以考小學果時成日都會見到KV 同學仔
![]()
最後想講下好多好多家長都問我, 而我又確實知DD o既升小實況
由於我唔會識晒所有家長, 我亦唔會問晒所有我識o既家長, 我亦唔會verify 人地講o既o野,
(而人地有咩家底, 特異功能, 獎狀證書我又唔知)
所以大家請自己增刪, 過濾...我以下講o既內容
KV 其實冇特別公布學生有咩OFFERS, 但佢地有做統計
老師亦有問有某幾間學校2ND IN o既同學問左D咩? (可能供來年參考或調整MOCK IN內容)
以我認知, 升小成績好理想, 相比o黎講男仔又更理想一D
一班十零個男仔可以有4個DB, 5個YW, 另外如TSL, SFA, KTS, APS 都好多人有offer
SPCC, DGJS呢D就睇個人造化, 有2ND IN o既我都識幾個, 但最後當然唔係個個有offer啦
其他如九龍區o既私小, 禮賢, 德雅, 九真, KT st jo 係總有幾個o係左近
其他直資更加係不能詳錄...
自行, 抽獎津校呢d唔駛講, 同KV 無關
但叩門o黎講 KV 學生叩門力真係強, 特別係要做卷果D
連小齊暫時都叩到一間OOO o既津小 (不過最後放棄了offer)
所以總括o黎講成績的確唔錯咖!
![]()
最最後想講, 我個人覺得KV比我地o既o野遠超過我地比佢o既o野!
(坦白講, 我比左d咩啫, 咪學費之嘛, 度度都要比咖啦)
KV 好實際, 除左學費真係無乜雜費, 書簿都係千零二千, 茶點校車自費, 班相8蚊張係咁多~
KV 呢3年裡比左好多歡樂時光我地,
比左機會我地認識好多好朋友, 家長, 老師...
比左機會小齊學識好多o野 (唔單係學術上) 使我見到佢各方面成長
其實一個問題好簡單你就知果間幼稚園好唔好!
就係如果有細佬妹, 你比唔比返佢讀返呢間?!
如果係我呢, 我一定會比 (可惜小齊冇)~ 哈哈
不過見好多家長都會咁做, 你就知KV 幾堅 (但我都見有家長會揀第2間o既, 唔係100% 揀返)
有媽媽話你上左小學就會知KV有幾好,
我話唔駛, 我而家都知, 真係好多謝好多謝根德園!!
============================================
感謝 敗家媽媽 提供以上資料
敗家媽媽的網誌: http://buyjiamama.blogspot.hk/
============================================
齊 ~ 閱讀樂
