Jerry Maguire：銅遊下午茶

印象中大概兩三年前左右，香港開咗首間甜品吧Dessert Bar之後，開始坊間都多咗唔少依一類店，普遍都做得有聲有色，偶然從雜誌睇到有一間新店，喺甜品吧 + 酒吧嘅混合，因為對酒嘅興趣着實唔大，不過，見佢哋有推出下午茶，卻相當吸引，所以，趁着要過嚟梨園二期辦點私事，就順便拉埋同樣喺甜品死粉嘅親友一齊去試。


晌門口望兩望，已覺得餐廳幾型格，入到裡邊感覺唔喺好大，全部都喺高腳枱櫈，門口左邊更大大個酒櫃，放滿各種烈酒，絕對喺一派酒吧格局。事後先知入少少仲有個細房，後邊更有個天井位，不過，天熱成咁就算開放都唔多會有人有興趣坐出去，所以，餐廳話索性暫時唔開放。



上文都講明嚟食下午茶，所以，目標早已放晌店家嘅Jerry Maguire Afternoon Tea Set（一位用$188 + 10%，兩位用$358 + 10%），一共9樣鹹甜點（其實，應該喺有10樣），再包一杯啡茶。





Latte 咖啡可以揀鮮奶咖啡、意大利泡沫咖啡之類，小弟一向喺鮮奶咖啡迷，所以二話不說就要一杯。睇杯身「Lavazza」字樣，就理解到餐廳用上意大利咖啡豆品牌Lavazza，喺信心嘅演繹，咖啡味的確醇香，拉花亦都細膩，可以講質量俱佳。



Earl Grey 以Twinings品牌嘅茶包沖泡，雖然無認真去試，但之所以能夠成為一個品牌，某程度喺質素嘅保證。反而，值得一提喺茶壺與茶杯，帶點和風嘅味道，卻無半點唔和諧嘅感覺。



當呷完一啖咖啡，兩人份嘅「下午茶」隨即登場，鹹甜點全放晒晌一隻長木板之上，井然整齊咁排列，每樣食物都做得的的骰骰。因為兩人份只喺擺上兩份一模一樣嘅下午茶，所以，可以各有各食，小弟就偏向先鹹後甜。





Cucumber with Tomato 常理話我知，先食依小碗酸青瓜開開胃喺最佳方案。啲青瓜刨得好薄，以酸醋醃過，酸香醒神卻無嗆喉感，而蕃茄唔喺普通蕃茄或車厘茄，而喺意大利乾蕃茄，油潤卻煙韌咬口，讓今餐下午茶有個好開始。



Truffle Croquette 炸薯波波，不過就加大兼貴氣版，因為尺寸有成個乒乓球咁大粒，炸得外層幾鬆化，咬落又唔會好油膩，而且，裡面喺薯蓉加埋薯粒，口感上有多少少層次；講到喺貴氣，皆因混入松露，不過，嫌佢松露下得少，所以，香氣有限，似有還無。





Mushroom Tartlet 迷你蘑菇撻，細小的骰，酥皮做得幾鬆脆，內裡填滿蘑菇餡，算喺不俗，當然，始終唔及焗起無耐趁熱食咁滋味啦。





Bruschetta 意式蕃茄粒百吉包喺幾常見嘅開胃小食，將蕃茄、紫洋蔥、巴馬臣芝士碎放上百吉包，入口輕盈清爽，包身烘得香脆，好適合夏天依個季節食。



Churros in Chocolate 唔使多介紹依家都好多人知西班牙油條喺乜，傳統而言，都喺灑上沙糖、玉桂，再沾朱古力醬食，晌度都無例外。條「油炸鬼」頗香脆，好有玉桂香，沾滿朱古力醬確喺味美，唔知喺唔喺店方自家製，只喺覺得入口稍為乾咗啲。





Jerry Maguire Selection Cut Cake 是日所見嘅切餅喺班尼士蛋糕，栽成細細件就肯定唔夠喉喇，只好少食多滋味。件蛋糕充滿濃郁朱古力香，質感挺實無欺場，不過，就無加入合桃碎。



Jerry Maguire Selection Maccaron 青綠色嘅馬卡龍晌整個下午茶套餐中，顯得份外搶眼，綠茶味，味道不俗，口感亦能帶出外脆而內層微微濕潤感，算得上有水準嘅出品。





Classic éclair with Chocolate  經典嘅法式長形泡芙都算歷久不衰嘅法式甜點之一，而且，見外間有啲已做到賣相變化多端、味道層出不窮，對比起，眼前嘅éclair賣相就樸素得多，只喺外層沾上朱古力，內層加入吉士餡，猶幸泡芙餅身鬆軟，亦無過甜嘅問題，當然，賣相加點功夫就更吸引啦！





Scone 士乾配上士多啤梨果醬及鮮打忌廉，不過，得一個有啲少，嘥咗啲果醬同忌廉，俾多個就好喇，哈哈。士乾本身喺乾身，口感比較實，以前喺唔多鍾意食，塗上果醬、忌廉，食食吓其實又別有一番風味。





Waffle  晌餐牌無出現嘅紅豆窩夫，雖然只喺得一小粒，就當喺額外獎勵。講真，食味就唔好抱有太多期望，都喺不過不失嘅貨色而已。

除咗以上嘅下午茶套餐外，仲有另一款只食士乾嘅Afternoon Tea Scones Set（$98），不過，一客有幾多件就不得而知喇。無論邊一款下午茶套餐，餐飲都可以加$40轉為店中名物JM Dessert Mocktail，但我都喺鍾情咖啡，親友較喜愛熱茶，未有太大興趣一試。

甚少星期六走訪銅鑼灣，人多到不得了，但遠離電車路，嚟到只隔幾條橫街嘅蘭芳道，感覺可以好不一樣，心情亦可以變得輕省悠閒。
個人評分
味道：7/10
環境：8/10
服務：8/10
抵食：7/10
平均每人消費：HK$200
餐廳資料：
Jerry Maguire 銅鑼灣蘭芳道23號地舖
2881 5008

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================