8月16日(星期二)~上星期日..同老闆去開街市買餸
佢見到子薑~因為佢好鐘意食"酸薑"..早幾年整過佢食
咁我又懶+整野食又睇mood~有時知佢想食又唔想整
會係醬料舖..買少少現成"酸薑"~滿足下佢就算架啦 :p
今次佢見到又叫我整比佢食~咁是但啦! 反正咁耐無整
昨日買材料~整定個"鮮檸酸梅薑"等佢隨時有得食呢
材料好簡單..製作過程其實都好簡單
之前整係用檸檬+糖~今次想改良下個味道
加多少少材料..等層次感更為豐富點
先將子薑用小刀刮表皮~好似刨節瓜既方法
再切片用鹽略醃~等子薑出水+收乾身
等收乾身既同時~可以慢慢整醃料
基本上醃料預防好~子薑都差不多乾身
除了出水..仲比之前軟身
醃料用新鮮檸檬汁, 白醋, 自家製酸梅, 糖
因為加左酸梅&白醋~糖份量比前次整既多
同埋..上次懶(無走核)~今次要用心整醃料(哈哈)
基本上醃浸1晚就食得
味道方面比較有層次~檸檬味比例佔最多
之後有白醋~又有青梅既酸果香..好開胃呢
除左淨吃酸薑~加隻皮蛋當前菜更為豐富
真係好唔錯既一個夏天開胃小吃
食譜:
[材料] 1.子薑(1斤)
[醃料] 1.檸檬(5個-榨汁) 2.酸梅(1粒-剁茸) 3.白醋(150ml) 4.糖(180g)
1. 子薑刮去表皮~切片放入隔篩..用3/4茶匙鹽略醃至乾身軟身
2. 拌勻醃料~玻璃樽放入一半子薑..倒入醃料
3. 將餘下子薑放入..再倒入醃料~放雪櫃冷藏一晚即可
P.S.
1. 甜酸度可因應個人口味~調製時自行加減份量
2. 除左自家製酸梅~亦可於南貨舖購買現成酸梅代替
2013年寫的"鮮檸酸薑"食譜 - http://yanomichung.blogspot.hk/2013/07/blog-post_5.html
============================================
感謝 Yanomi 提供以上資料
Yanomi的網誌: http://yanomichung.blogspot.hk//
============================================