大前日(15-6-2016 Wed)再去醫院接受治療,今次同大嫂食飯,原本佢話o係威爾斯醫院飯堂食,但我覺得悶,於是行出去搵o野食,河畔花園有好多選擇,但遠o左啲;第一城,連鎖店居多,唔啦.
隔離呢個屋苑呢?應該有商場,於是行o黎,點知啲食肆原來全部o係地下街市o個層,我o地行到最入都費事再諗,就o黎呢間,重有二人位.
坐低後我o地睇,亞姐就企定定o係o度,我o地話諗諗先,仍行開一陣,但好快又行返o黎,話有連餐飲o既午餐.
我就要$38.00o既午餐,要梅菜肉餅蒸茄子飯,例湯節瓜鱆魚,飲凍檸水.大嫂要$37.00o既特餐,係咖哩吉列豬扒撈麵配火腿庵列,牛油脆豬,飲凍檸茶.落完單,亞姐話例湯可以o係出面自己舀.
咁都得?為免麻煩大嫂,唔舀啦.
冇耐,兩杯o野飲到o黎,飲啖先,唔甜,似少甜,而冰雖然多,但都唔多夠凍.
然後大嫂o既火腿庵列牛油脆豬到o黎,之後咖哩吉列豬扒撈麵,最後到我o既梅菜肉餅蒸茄子飯.
食吓先,肉餅鬆軟亦唔乾,但薑味多,梅菜唔多亦冇乜味,茄子得三片,一樣冇乜味.白飯就軟硬適中,我食唔晒.
味道: 1分
大嫂就俾啲豬扒的食,我覺得冇乜味.牛油脆豬佢都俾半件我食,唔脆,牛油就夠o既.
牛油脆豬味道: 2分
之後我問返大嫂,咖哩吉列豬扒係點?佢答咖哩汁只有椰子味,鹽都冇落.
攪咩?我以為私食時冇撈到咖哩汁,原來唔係,咁只係黃色o既汁就叫做咖哩汁?
味道: 0.5分
服務:
開頭幫我o地搵位好好,之後叫餐就好快,但我o地食完,叫人俾兩杯水就扮睇唔到我,然後叫另一個亞姐至俾.
================================
感謝 愛食 提供以上資料
愛食的網誌: http://www.openrice.com/zh/gourmet/reviews.htm?userid=46226&city=hongkong
================================