Amplitude / Sonic Garden：髮式下午茶

由於上次去過Hotel sáv食自助餐，覺得佢啲甜點真喺有料到，臨走時晌大堂嘅電子告示板見到佢哋有個「Hotel sáv x Kerastase極緻法式下午茶」，賣相好吸引，而且，仲送番一份「Kerastase最新嘅Discipline Curl Ideal系列試用套裝（總值港幣250元）」，跟手聯絡表姨甥女睇佢有無興趣一齊嚟食餐下午茶，份禮品就送俾佢當開學禮物。（註：依個法式下午茶只供應至9月底）


之前睇海報，以為喺上次食自助餐對面嘅酒吧餐廳Amplitude，但原來喺晌上面花園平台層嘅 Sonic Garden，戶外花園真喺幾正，可惜天氣仍然有啲熱，只好乖乖番返晌室內。



而室內環境嘅裝修一切從簡，只配以簡單嘅枱櫈或梳化椅。雖然坐梳化位會寫意啲，但食起嘢上嚟都喺覺得少少唔自在，所以，都喺坐一般餐枱啱心水啲。此外，店家用上一啲紗簾做間隔，無形中減低咗個騷擾度。





當一出電梯門，見有張美式桌球枱、氣墊球及足球機，問過店員，話晌度消費就可過去玩吓，如果唔人多，無人「跟隊」，基本上玩耐啲都得，否則就以半小時一節計讓客人公平使用。



Hotel sáv x Kerastase極緻法式下午茶 $368 整個套餐一共有12道鹹甜點，各佔一半，大部份都喺二人份，只有白森林蛋糕同雲呢嗱玫瑰杯型蛋糕得一件，需要「些牙」食。另包啡茶，另外更可加$38升級為極致嘅法式雞尾酒，但小弟都喺喜歡咖啡配甜點，表姨甥女就一向偏好熱茶。



鮮奶咖啡 始終依度都唔喺咖啡店，就算嗌鮮奶咖啡，都喺機沖，所以，唔需要抱太大期望，小弟都只喺為過口癮，兼飲住咖啡嘆甜品喺至爽嘅配搭。



熱伯爵茶 表姨甥女嘅伯爵茶，小試一啖，反而幾芳香，可謂配鹹甜點俱佳喎。

以幸福摩天輪造型華麗登場，完全喺轉得郁得，底座更喺鋪上仿草墊，非常有型。事不宜遲，先鹹後甜，即時同大家分享美食。



巴馬火腿溫泉蛋伴魚子醬 溫泉蛋做到薄薄嘅蛋白包住蛋黃漿，一「篤」即爆開，蛋漿湧出，已成功一大半，配上一小撮魚子醬，令蛋香中散發出鹹香味，齒頰留香效果好正；正當疑惑巴馬火腿去咗邊，原來墊咗底，錯過咗一齊放入口嘅口感添。







龍蝦芒果墨西哥卷 墨西哥卷做成迷你版，的骰得意，捲入龍蝦肉、大大粒芒果、生菜，豈止味道清新，墨西哥卷皮煙煙韌韌，口感極之唔錯。



雞卷歐洲防風根茸及露筍 初初睇見依款鹹點，「防咩風」呢？好老實，「歐洲防風根」（Parsnip）真喺第一次聽依個名，好奇之下上網摷摷，原來喺樣帶有茴香味嘅白甘筍，故又稱為歐洲蘿蔔或歐洲白甘筍，但同街市常見嘅中式白蘿蔔唔同。所以，做出嚟嘅根茸有股強烈清香撲鼻嘅氣味，而整件鹹點，由底而上，一層脆餅、雞卷、歐洲防風根茸、露筍仔，風味清香，配搭非常有新鮮感。



番紅花帶子伴蛋白柚子蜜 番紅花喺種有益嘅食材，有鎮靜安神之效，底下先墊一小片青瓜，再放上番紅花帶子，帶子口感好爽口，而面面嘅蛋白碎以為平平無奇，入口原來柚子蜜味十分突出，頗有意外驚喜嘅感覺。



黑松露醬伴藜麥雞蛋餅 件雞蛋餅唔喺「求其」咁做，見佢仲混入藜麥、洋蔥粒、紅椒粒，口感鬆化有蛋香；而夾埋面面嘅黑松露醬一齊食，嗰份幽香真喺無得頂，喺是日最有亮點嘅鹹食。



炸芝士配榛子仁蒜味醬 炸芝士？食落唔似喎，因為一來咬落去裡面唔喺軟腍腍，二來點都唔似芝士味，反而似蟹肉之類，再睇真啲就越覺得喺。炸出嚟好脆口，又唔油，而個蒜味醬個蒜香好強勁，不過，醬內混入嘅榛子仁唔太多。





芝士慕絲伴櫻花白酒啫喱 鹹點食完，就喺輪到甜點，依個櫻花白酒啫喱賣相絕對靚絕，奶白嘅芝士慕絲托住晶瑩嘅白酒啫喱，前者芝士味嚟得柔和，口質感柔滑，而後者清爽，白酒味晌口腔內慢慢滲出嚟。



熱情果忌廉松糕 初頭以為個「松」字喺用咗殘體字，咩喺忌廉「鬆」糕，搵勻都唔見有鬆糕嘅物體，再睇睇英文Trifle，又喺第一次接觸嘅甜點，原來喺一種一層生果夾一層海綿蛋糕，再鋪上鮮忌廉嘅英式甜品。不過，依一款松糕喺變奏版，以熱情果慕絲、金寶碎，一層隔一層，酸香甜集一身，口感有層次嘅變化，好食。





白森林蛋糕 德國黑森林蛋糕就常見啦，白森林則少見啲，一身雪白頗有雍容華貴之感。中間無用海綿蛋糕，而喺白朱古力慕絲配白朱古力碎，味道無常食嘅白朱古力咁死甜；無論面層嘅車厘子，定喺中心嘅車厘子果肉，唔單去咗核，仲浸透酒香，一食就食得出，以為平凡，卻喺有意外驚喜，所以，小弟選佢為甜點中最有亮點嘅一款。





雲呢嗱玫瑰杯型蛋糕 雖然件杯子蛋糕造型的確喺靚，粉紅色嘅忌廉有淡淡玫瑰芳香，口感軟滑，而牛油蛋糕綿密富牛油香，但味道都喺晌預期之內，所以，只算喺平穩之作。





蛋白檸檬撻 上次晌樓下餐廳食自助餐時已試過依一款傳統法式甜品檸檬撻，印象猶深。今次再食，水準依然高，撻殼甘脆，面層喺蛋白「馬令」，撻心墳滿檸檬果蓉，檸味酸香清新，感覺輕盈。





英式提子鬆餅配果醬及忌廉 鬆餅喺英式下午茶嘅傳統食物，配以玫瑰花果醬及忌廉，簡簡單單都可以好美味。鬆餅做得鬆身有麵粉香，可恨嘅喺果醬同忌廉都偏少。

上文講過凡享用個下午茶套餐，奉送由法國品牌Kerastase送出嘅試用套裝，果然喺堅送，所以，見在場唔少女生表現雀躍，亦唔知喺咪無依份禮品而嚟，因為全場所見95%喺女生，得小弟同隔離枱兩位男士。



咁多款鹹點及甜點都各俱特色，造型精緻，配合埋個摩天輪，真喺睇得又食得，以酒店級別嘅英式下午茶套餐而言，已屬合理收費，加上送埋一套法國品牌嘅髮型套裝，其性價比就變得更高！
個人評分
味道：8/10
環境：7/10
服務：8/10
抵食：8/10
平均每人消費：HK$205
餐廳資料：
Amplitude / Sonic Garden
紅磡蕪湖街83號逸.酒店4樓
2275 8782

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================