The Oyster House：蠔情再續

約咗表姨甥女食飯，傾開偈，原來喺未同佢一齊食過蠔，今晚揀嚟灣仔嘅The Oyster House就啱晒，可以試少少即開生蠔，又試到其他高質素菜式，對上一次嚟都成年前嘅事（http://garycwm.blogspot.hk/2015/12/the-oyster-house.html），仲記得佢哋啲菜式做得甚有水準。


正如年前嘅食評所講，雖然食物、招呼都好，環境又夠氣氛，但始終枱與枱之間都喺太密，我哋同隔離枱差唔多喺「世界零距離」，加上是夜真喺爆場，客滿九乘多，感覺喺更似與隔離食客同枱。「幸而」，嚟嘅都喺斯文客，隔離又喺一家外國人，佢唔知我哋講乜，我亦聽唔清佢哋傾乜，感覺先無咁有騷擾性。



翻一翻餐牌，印象跟舊年嚟大致無乜點大變，菜式都喺以意大利菜為主，分類包括：新鮮生蠔、海鮮拼盤、餐酒、廚師精選菜式、前菜及小食、沙律、自家製意大利麵、主菜、薄餅、甜品、飲品……等等。



超值海鮮拼盤 















意大利香草包
等待上菜之時，侍應先送嚟一小籃意大利香草包，枱上已備有黑醋及橄欖油供客人使用，香草包好有香草香，但個人稍嫌個包質感比較鬆散，講笑咁講似蛋糕多啲。



生蠔拼盤 睇番前頁，足有十多款生蠔，不過，侍應話未必樣樣齊，會祝乎供應及來貨質素，唔靚都唔會賣俾啲客，費事做壞招牌。如果對蠔認識唔深嘅朋友，大可以請教店長俾啲意見。順帶一提，依度開蠔會幫手去埋帶子位，方便食用，一篤就可以完整將隻蠔放入口，此外，佢哋開蠔都乾淨俐落，無乜碎殼。以檸檬角起計，順時針，會喺由淡至濃嘅3款生蠔：南非、蘇格蘭及法國品種。



Rollex $45 南非品種嘅「勞力士」，大大隻，色澤較白淨，蠔肉呈奶白色，口感較為綿滑，海水味亦相對輕，所以，唔會覺得佢好鹹，反而有少許甜味。故作為第一隻入口嘅生蠔，當喺熱吓身，感覺唔錯。



Scottish Rock $48 第二隻試嘅喺蘇格蘭石蠔，外觀明顯跟南非勞力士好唔同，帶有黑色裙邊，而口感帶點彈性，爽爽哋，海水味亦明顯強啲，味道會較鹹，但蠔味又重啲，整體感覺喺有個性。



Fontendeau $55 法國嘅Fontendeau（希望無記錯佢個串法）喺是日嘅推介（Today Special），樣子跟蘇格蘭石蠔好相似，但口感、味道就好唔同，口感喺非常爽脆，海水嘅鹹味亦喺最強，但就有份悠長嘅餘韻，食完隻蠔，隔多陣嗒吓條脷，都仲有份蠔味。



意式香草蕃茄多士 Bruschetta Toscana $65 早前晌一家西餐廳試過一款加入埋風乾火腿嘅蕃茄多士，勁回味。今回呢個簡單經典版，都唔錯，多士烘得十分脆口，如果有塗層牛油感覺更香；蕃茄粒以羅勒、蒜、橄欖油調和，酸香帶些微辣勁，喺幾令人開胃嘅前菜。





白酒煮蜆扁意大利麵 Linguine Vongole $128 碟扁意大利麵煮得真有一手，啲麵條口感啱啱好，柔韌有咬口，而且，充滿蒜香，細心睇，唔止有蒜蓉，亦加有蒜片；而蜆肉頗鮮甜，又食唔到有沙，仲滲出輕輕白酒香味。雖然，橄欖油都喺算有益嘅，但我都覺得喺落到啱啱好就夠。



香煎羊架 Pan Seared NZ Lamb Chop $238 初時，以為個香煎羊架喺平常見到嘅簡單淨香煎，原來，喺以「寶雲酥」方式處理，即喺加多一層麵包糠去做。一客羊架有3枝，而且，件件羊架都幾厚身，但煎得恰到好處，外層焦脆，內裡肉質粉嫩，入口軟腍，羊羶味突出而唔霸道，非常好食。



配菜亦有處理過，唔喺普普通通嘅薯條、雜菜，而喺焗過嘅新薯，皮薄薯味濃，仲有烤過嘅紅椒、翠玉瓜同甘筍，都喺啲鮮甜嘅貨色。



意大利芝士餅 Tiramisu $56 上次嚟曾試過佢哋嘅香蕉拖肥批，今次點都要試吓意大利芝士餅，話晒佢哋都喺以做意菜為主。賣相簡單，睇橫切面，見到餅底喺以海綿蛋糕嚟做，中層先落手指餅，兩者都浸透咖啡酒，入口濕潤，充滿咖啡香，唯個人就覺得酒味未夠重，稍為輕咗。而馬卡風芝士打得好軟滑，加上面面嘅唂咕，值得評為高水準之作。

香港租金貴，人盡皆知，都明白啲店主都會盡量擺得多一張枱就多一張，雖然枱與枱之間就的確好逼，但服務搭夠。上菜速度平均，一道菜接一道，一來唔會堆到成枱嘢，二來每道菜入口都喺新鮮熱辣，此外，每道菜都有幫我哋換碟，服務真喺唔可以唔俾多啲分佢。
個人評分
味道：9/10
環境：8/10
服務：9/10
抵食：8/10
平均每人消費：HK$430
餐廳資料：
The Oyster House
灣仔謝斐道154號地下C號舖
2511 1212

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================