悠閒的星期日，又去大埔飲茶呀，今次去麗宮1號，聽聞是新開的酒樓，一於去試下，下午時段，好多人等位呀，係個商場兜左一圈行下，都好快有位了。
食物多選擇。
酒樓面積大，樓底高，感覺幾舒服，張枱布好靚有點似雲石紋呀。
珍寶點心拼盤，$65，有蝦餃、燒賣、粉果、燕麥包、糯米卷及紅棗糕，各兩件，都幾抵食，有普遍會叫的蝦餃、燒賣及粉果，又有包點及甜點，好齊全呀。
蝦餃，皮軟滑，鮮蝦爽口彈牙。
燒賣比較細粒，味道正常水準。
粉果，有好多餡料好豐富。
紅棗糕，本身唔太like紅棗，但變左做甜品就試下，好彈牙，少許紅棗味，微甜。
糯米卷，是迷你版的，好耐冇食過，糯米飯份量適中，口感煙韌，不過餡料較少，多是花生，味道普通。
燕麥包。
![]()
第一次食呢款包，賣相好似馬拉糕，口感比較實，味道甜甜地，入面有菜肉餡，都幾好味呀。
叉燒飯，$28 ，叉燒偏肥，有點肥膩。
蠔油鮮竹卷，$22，餡料十足，正常水準。
醬皇蒸鳳爪，$22，去酒樓必食，味道正常水準。
金湯南瓜翅，$24，賣相實在太吸引，即叫左個來試下。
外層是麵包來的，可以食呀，不過口感較硬。
口感稠身，有素翅及南瓜等材料，微微的南瓜味，甜甜地都不俗。
食物尚算不俗，價格合理，服務態度幾好，下次會再去呀。
大埔安慈路4號昌運中心商場1樓
