Elephant Grounds：象心獨運

Elephant Grounds早聽聞依個品牌，喺間融入咗亞洲風味嘅咖啡店，最近朋友得知灣仔開咗家分店，再搵多兩個朋友一齊聚舊嘆番餐，當喺團年迷你聚。小店位處太古廣場三期側嘅一段永豐街，即金鐘與灣仔邊陲，無咗人來人往嘅繁囂，卻有份小街嘅恬靜。


由門面可見，餐廳以木系為裝修主調，擺設唔少盆栽作為點綴。再走進店內，原木嘅裝潢就更明顯，地板、牆身、枱櫈都喺用上唔同嘅木材，加上樓底特高，空間感強，讓人舒服隨心。





餐紙、餐碟、餐具……等等，均印有店家名字及大象圖案。

主餐牌A4紙底面兩頁印晒所有食品及飲品，前者分別有湯品及沙律類、EG招牌菜、丼類、麵包類、共享小食類、甜點及雪糕；而後者有一系列咖啡、特飲、茶類……等等，就連啤酒、雞尾酒及紅白餐酒都有供應。



此外，飲品方面，亦備有兩張季節性餐牌，都喺一啲頗有特色嘅飲品，所以，我哋都專登揀嚟試試。



Baby. It’s Cold Out There $45 熱朱古力作為基礎，放上迷你綿花糖及彩虹碎糖，朱古力味極之濃郁，喺冬日暖身之選。



Rainbow Hot Chocolate $60 朋友杯「彩虹」絕對搶鏡，以白朱古力做底，唧上五顏六色嘅糖漿幻化成彩虹，仲要畫成一隻彩虹天鵝添，好睇之餘，佢話飲落無想像中咁甜，感覺幾唔錯。



Orange Jacobs Latte $60 積及橙餅喺細細個時好鍾意食嘅朱古力餅乾，聯乘鮮奶咖啡又會有咩火花呢？有別常見嘅拉花，換上朱古力漿及香橙乾片，朋友話入口咖啡香中滲出絲絲橙味，感覺神奇。



Ginger Latte $48  小弟杯薑味鮮奶咖啡就唔使多估都知哋乜，好多時晌聖誕期間就會出現依款咖啡，配件薑餅人曲奇。睇個拉花嘅細緻度及咖啡面嘅平滑，就知拉得有一手，入口唔止口感均勻，咖啡有果香味，而薑味亦非常突出，感覺極暖身。



Brussels Sprouts Radish $75 好有新鮮感嘅一道沙律，一來熱沙律比較少接觸（其實只喺微微暖），二來椰菜仔、櫻桃蘿蔔、薄切風乾豬面頰肉嘅組合都好少有，三來個煎蛋黃醬汁非撈勻落沙律度，而喺塗晌碗邊，頗有種藝術感。依個以日式食材，帶點法式烹煮嘅沙律，椰菜仔及櫻桃蘿蔔咬落幾爽脆，豬面頰肉帶出煙燻鹹香嘅惹味，醬汁又有種豐滿嘅蛋香，討好有驚喜！







Winter Pumpkin Salad $95 另一道南瓜沙律，賣相怡人，雖然好簡單用上南瓜、牛油生菜、九芽菜、小紅莓……等材料，但透過製作手法可以變得不一樣。店員介紹時，話大廚將南瓜先雪藏再解凍，刨成薄片而做出一種熟口感，唔講真喺以為煮過，入口爽甜，配合蜜糖芥末汁，以及杏仁片，令整道沙律口感富層次，味道有個性。





Avocado Toast $105 麵包類我覺得都喺佢哋啲特色菜，尤其之前晌食評見到依一款Avocado Toast，薄切均一嘅牛油果片，插入櫻桃蘿蔔片，搽上香蒜蕃芫荽醬，再伴以流心蛋，非常吸引。將流心蛋輕切開，啲蛋黃漿澎湃咁湧出嚟，制止都制止佢唔徹，沾麵包份外好食，而牛油果、香蒜蕃芫荽醬、蛋白拼上多士，的確滋味無窮，喺一份別出心裁、味道天然嘅多士菜式。









Salmon Avocado Poke $110 餐牌有6款共享小食類，睇名字及食材組合，幾有趣新穎。先將三文魚粒、牛油果粒、蔥絲攪勻，再放晌炸香芋片度一齊食，其實啲炸香芋片淨食都幾好味，又脆口，而油潤嘅三文魚、軟熟嘅牛油果經甜辣椒豉酒調味，味道及口感好豐富，鮮、香、辣集於一身。







Miso Black Cod $145
依一道更突出喺西日融和嘅菜式，以白味噌嚟醃黑鱈魚，再以味噌做個蛋黃醬，夠晒賣點，而且，伴以多種蔬菜：本菇、蜜糖豆、花椰菜、薯蓉、甘筍片……等等，令賣相色彩鮮明。黑鱈魚皮脆肉嫩，帶點鹹香味，啲配菜就令人食得更健康。







Pink Lemon-Aid $68 「雪糕三文治」亦喺依度甜點嘅招牌，亮點除雪糕喺自家製之外，「三文治」更用上巨型馬卡龍，更會不時轉款，而依期做緊嘅喺柚子雪糕配粉紅色士多啤梨馬卡龍，再加上一小粒迷你檸檬馬卡龍、檸檬忌廉及開心果仁碎做裝飾，實在一望令人目不轉睛。友人知小弟喺甜品迷，更讓我豪食半個，馬卡龍煙韌少甜，雪糕嘅柚子香味十分突出而清新，質感又夠晒軟滑，一試難忘。





睇唔出Elephant Grounds形象年輕，一派咖啡店嘅格局，做菜卻好有心思，無論食材配搭、烹調技巧，都頗為匠心獨運，而店員對菜式都好有認識，問乜都回答到，服務周到，成晚嘅體驗確喺令人稱心。
個人評分
味道：9/10
環境：8/10
服務：8/10
抵食：8/10
平均每人消費：HK$225
餐廳資料：
Elephant Grounds
灣仔永豐街8號永豐大廈地舖
2778 2700

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================