La Famille：得戚過人

一身湖水綠嘅鋪面，加上點點歐陸小屋嘅設計，令La Famille有份少女情懷嘅感覺，法文喺「我家」嘅意思，但店子卻喺日本過江龍，並且晌戚風蛋糕界享負盛名，出品自然令人有所期待。


以前入黃埔可能有啲麻煩，依家港鐵延伸至黃埔就變得超方便，而La Famille就晌Aeon Style內，直頭D1出口就直駁入商場內。鋪前嘅餅櫃排出一列共13款嘅戚風蛋糕，最特別喺每個蛋糕都以高身玻璃罩罩住，高雅衛生。店員睇我駐足，就為我介紹當中數款，如熱賣、獨特口味……等等，非常友善健談，亦對產品好了解。 

除戚風蛋糕，店家亦有售賣其他產品，如焙茶、抹茶、曲奇或特色茶葉禮盒。





包裝盒同樣以湖水綠為主色，並採用直立式，易拎便攜。而每件蛋糕更以膠紙黐實於盒內，唔怕你左搖右擺，拎到返屋企會撞花晒。



沖縄黑糖栗子 $46 黑糖喺小弟喜愛嘅食材，栗子就喺老婆至愛，面層嘅栗子蓉的確軟滑綿綿而充滿栗子嘅粉甜香味，而戚風蛋糕加入沖縄黑糖，所以色澤帶少少啡，細嚐會嗒到清香嘅純甜黑糖味；蛋糕嘅中心喺中空，卻填滿北海道鮮忌廉，軟滑輕盈，一啲都唔覺得有膩嘅感覺，用料不賴。





香濃開心果 $46
開心果口味嘅戚風蛋糕一身翠綠，以藍莓及紅桑莓做裝飾，感覺清爽。個戚風蛋糕嘅開心果味未有預期中咁強，不過，因為蛋糕內混入好多開心果碎，所以，仍然食得出開心果味；蛋糕中央同樣唧滿北海道鮮忌廉，配合鬆軟而有回彈力嘅蛋糕，一樣咁好味。





英國伯爵茶 $44 英國伯爵茶味嘅戚風蛋糕裝飾相對簡單，只喺唧啲忌廉，同灑啲朱古力碎碎。啲戚風蛋糕一入口就已經好食得出啲伯爵茶味，茶味幽香，非常突出，令到佢晌3個蛋糕中個性比較明顯，而蛋糕嘅鬆軟度跟其他嘅都一致，証明水準穩定。



果然品牌即喺品牌，有質素就喺有質素，過江龍嘅La Famille都唔喺浪得虛名，不愧晌戚風蛋糕界享負盛名！
個人評分
味道：8/10
環境：7/10
服務：8/10
抵食：7/10
平均每人消費：HK$46
餐廳資料：
La Famille
紅磡黃埔花園第5期AEON百貨地庫B14A號舖
5597 9935

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================