蛇王二 She Wong Yee：燉湯至愛

「蛇王」呢個行業都已經喺賣少見少，不過，食蛇羹嘅人就大有人在，就如我哋一班死佬年初就首次參加民協搞嘅蛇宴（http://garycwm.blogspot.hk/2017/01/blog-post.html），$215位，全場爆滿。今晚嚟到銅鑼灣嘅「蛇王二」，一樣全場爆滿，講開依間「蛇」店，就真喺經常都咁多人，尤其早年喺唔少國內自由行嘅「景點」，猶幸今晚晌門外就未見有人龍。


環境唔多講，嚟過嘅人都知道佢個場有幾逼，比茶記更逼，枱貼枱近乎無路可逃，不過，嚟得嘅人都明白晌度喺食佢啲餸菜質素，唔喺食環境，亦唔喺食服務，但啲服務又唔喺有啲食評講到咁差，點差都差唔過澳牛囉。



蛇王二嘅菊花五蛇羹及臘味糯米飯固然馳名，兩者再加多個生菜嘅套餐，都只喺賣$106，喺唔少客嘅入門心水。不過，小弟今晚嚟食飯就另有心水！

究竟個心水喺乜？就喺其燉湯套餐，十多款滋補燉湯，各有不同功效，配一碗單拼燒味飯，定價都喺由$68至$116，沒有理由錯過，燒味飯更可轉為其他選擇。





川貝海底椰燉瘦肉 小弟近期受氣管炎所困，川貝、海底椰就最合適不過。燉湯熱辣辣呈上，並晌上枱後先除去燉盅蓋嘅紗紙，一打開蓋湯色清澈，香氣幽幽，見到不少海底椰及瘦肉，當然細細粒嘅川貝沉晒晌底，不過，最後撈幾撈睇睇，川貝其實唔喺好多，始終川貝喺啲幾貴嘅中藥材。個湯入口幾滋潤，感覺卻好清，好溫和，飲完好暖身。





油鴨叉燒飯 套餐只包一碗單拼燒味飯，所以，我就寧願俾多$10轉為油鴨雙拼飯，原諗住配燒鴨，實行鴛鴦鴨飯，不過，結果揀配叉燒，因為更可睇出燒烤嘅功夫。飯粒好軟熟而有米香，部份吸收咗少少油鴨嘅脂油，味道更香，而油鴨酥香唔油膩，肉質挺實有咬口，然而，叉燒就一般般，雖然外層有少少焦香，但稍稍嫌佢乾身咗啲，可是，不得不讚餸料俾得十足，睇碗飯油鴨同叉燒鋪滿成個飯碗就知啦。





據知蛇王二由上環老店至銅鑼灣店，前前後後過百年，一家百年老店，能生存至今，仲要位處銅鑼灣旺區地鋪，自有其實力。在現今飲食業要求不斷求變嘅大環境下，能濁沽幾味，單單就以蛇羹、燉湯、臘味飯、燒味飯……引嚟食客不斷，唔喺咁多店可以做到。
個人評分
味道：9/10
環境：6/10
服務：7/10
抵食：8/10
平均每人消費：HK$90
餐廳資料：
蛇王二 She Wong Yee
銅鑼灣波斯富街24號地舖
2831 0163

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================