日熹樓 Evelyn's Garden：絕不熹場

究竟將中菜西班牙式小食化會喺點？上嚟日熹樓就尋找到答案，都喺早前睇到一篇食評嘅描述，將慣常見到嘅京川滬菜式，無論涼菜、點心，以至大菜、主食，都做得的骰小碟，更設計出「百碟宴」，讓客人一次過可以試得更多。


一出電梯就喺餐廳，環境偌大，一室古雅裝修，在柔和嘅燈光下，完全無老派中菜館嘅俗氣。最欣賞喺其空間感，明明仲有唔少地方可以擺多幾張枱，但店主無咁做，讓人感到輕鬆無壓迫。



此外，相信設計師應該花咗唔少心思，店內仲有好多中國風嘅玩味擺設，睇落應不乏值珍蔵。





大廳嘅方枱可組合成唔同人數嘅長枱，但人多就梗喺揀圓枱方便傾偈啲，店中有適合4-6人嘅小圓枱，亦有可供10-12人用嘅大圓枱。餐廳尾，更設有貴實廂房，不過，就無問包房最低消費要幾多。

餐廳稍入嘅位置，更設計成酒吧格局，不單喺裝修上另一亮點，亦俾人感覺嚟依度唔一定食餐飯，更可以把酒談天。而睇餐牌時，發現一系列中式雞尾酒，以花彫、竹葉青、茅台、玫瑰露……等等中國酒嚟做，非常有創意，更冠以攻、守、戰、平、和、靜、共、喜、軍、皇名字，貫徹玩味之餘，更不失霸氣。



未點菜，先送上一小杯迎賓飲料，聽店員介紹喺幾樣嘢溝埋，因為講得太快又無刻意裝載，只記得以玫瑰花茶為主，呷一小口，冰冰涼，好清玫瑰花幽香。而隻杯靚到不得了，通花圖案及彩紋非常精緻。



茗茶方面，除咗一般嘅普洱、香片、菊花……等等晌茶樓都飲到嘅選擇外，唔介意俾啲錢，可以考慮其他飲品選項，如高級一啲嘅中國茶、花果特配茶、西方茶及日熹茶特調。



熱情果香片 $38 小弟就無點特別試其他，但友人就想試試杯熱情果香片，加上點涼菜就可以以$20享用，吸引力更大。友人飲過之後，佢嘅點評就喺頗有特別，茶香中帶點酸爽嘅感覺，兩者夾得嚟唔會好怪。

雖然有一本大餐牌，但揭嚟揭去，且好似唔齊全，反而，有兩頁紙餐廳，將涼菜、炆煎炒、炸物、辛辣、水煮、京川主食、鍋巴、湯品、素菜、京式點心等等一次過印晒出嚟，辣唔辣，喺唔喺廚師推介，都一目了然清楚晒。





前菜小碟：豬頭肉拼豆腐乾、手拍青瓜 先嚟兩小碟餐前小食，前者食其鹵香，後者貪其爽口，點都有誠意過酒樓嘅現成花生或小食雜豆粒，而且，睇單佢啲小食喺無收錢。



五香薰蛋 $28 依個燻蛋做得水準絕對上乘，半凝固嘅蛋黃入口綿綿，既有蛋香，又有淡淡煙燻味；加入脆卜卜嘅蟹籽，雖唔喺咩新鮮事，但添幾分口感令感覺唔同，記得有家上海菜館就配上少少黑魚籽，令色差有對比更突出外，鹹鮮嘅黑魚籽更托出蛋香。



白切黑豚肉粉皮 $68 店員突然強調佢哋所有豬肉菜式都採用黑豚，足見店家對用料嘅執着。啲豚肉切得非常薄身，咬落十分柔嫩，且有豬肉味，脂肪感唔太重，底下嘅粉皮又好滑溜，有別雞絲粉皮配麻醬，而喺配甜豉油，味道又夾到喎。



醉拿手 $48 佢哋最拿手喺乜就未確定，但依道「醉拿手」就絕對好食兼值得推介，豬手唔單止去晒骨，食落啖啖肉無麻煩，而且，酒香入味，卻有份清爽感，正！



京派冰鎮鮑魚 $68 作為涼菜小食，飽魚經花彫泡浸過再切成薄片，片片唔止超薄，更厚薄均一，可見師傅刀功了得。入口很爽口，又帶微微煙韌感，輕輕酒香有令鮑魚味更突出。



老北京牛肉捲餅 $48 嚟咗幾道涼菜，我仲諗住個牛肉捲餅又喺細細碟，估佢唔到咁大份，仲捲得好足料，餅皮喺京式烤皮，抱住鹵牛肉片、京蔥及青瓜條，少少芫荽，塞到滿一滿，入口有軟有爽，香濃嘅牛肉爽雜清新嘅京蔥，好食。





羅春閣爆汁生煎包 $58 店員專登推介俾我哋，話喺店中嘅招牌點心。一客有3個，原隻鐵板上，熱氣騰騰，更插咗個小牌寫明小心燙嘴。小試一口，果然非常燙，外皮唔止脆，仲搓到好似紙咁薄，肉餡多且鬆化，不愧喺招牌。





川酥香酥鴨配荷葉餅 $48 平時晌啲京川滬菜館食香酥鴨都要點成隻，晌依度就唔使擔心，兩個嚟都試得到，份量啱啱好。一份香酥鴨配4件荷葉餅，夾啲京蔥及青瓜條，塗啲海鮮醬，荷葉餅非常軟熟，香酥鴨酥香有咬口，味道有層次。







上湯茶樹菇伴翡翠苗 $58 雖然喺道素菜，但依然以小碟形式登場，翡翠苗炒得爽口，茶樹菇煙韌咬口，清新健康。



杏仁露 $22 賣$22其實幾抵食，口感稍為有啲稀，但杏仁味的確好香濃，而且，喺少甜版本，更合心意。



核桃露 $22 相比起個杏仁露，核桃露就唔單止核桃味突出、香濃，質感更比較細滑，稀杰度啱啱好。事後店只先講番，佢哋啲甜品喺西環原記出品。

雖然叫咗唔少嘢，但因為樣樣都細細碟，唔覺唔覺都食得晒。順帶一提，服務真喺幾好，成日有侍應主動過嚟斟茶。
個人評分 味道：8/10
環境：8/10
服務：8/10
抵食：7/10
平均每人消費：HK$270
餐廳資料：
日熹樓 Evelyn's Garden
灣仔杜老誌道6號群策大廈4樓及5樓
2511 1534

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================