0

Chez Moi:與法有緣

山區麵包王 於 2017-02-22 00:00:00 發表  |  累積瀏覽 523

分類:
近期,跟法國菜都有少少緣份,年初才到訪過Les Saveurs Private Kitchen,同朋友賀新年;之後,晌Upper Modern Bistro食過一餐美味午餐,今晚嚟到Chez Moi Private Kitchen,喺食友試過之後嘅極力推介,$480五道菜嘅晚餐,以法國菜而言,絕對喺好相宜。


餐廳位處開平道1號 Cubus 11 樓,一打開電梯門,就感受到柔和富情調嘅氣氛,由門口申延到整間餐廳,一室暗黃嘅燈光,散發出一份暖和嘅感覺,無咩特別奢華裝飾,卻晌樸實中顯出高雅。枱與枱相距闊落,所以,空間感十足,全無侷促之感。



除一出電梯門見有個貴賓廂房外,再走入啲,餐廳盡頭,有見另一個廂房,目測所見可容納16人,但就無詳問包房費用要幾多。當晚所見,無人包房,故亦作為供散客之用。





餐枱放置蠟燭燈、小盆栽,都喺令氣氛更閒適嘅小點綴。身旁入牆嘅酒櫃,擺放好多橄欖油,無睇真啲仲以為喺餐酒喔。



上文都講過餐廳主打喺五道菜嘅晚餐,實行貴精不貴多,晚餐包括頭盤、餐湯、間場嘅雪葩、主菜及甜品,另奉上餐飲。此外,亦有芝士拼盤、凍切肉腸、生蠔供應。




bowl
香草蒜蓉法包 餐前先嚟啲日香蒜法包,法包帶微溫,烤得香脆,充滿蒜蓉香,又切得細細,好易一件接一件喺咁食。不過,個人較喜歡喺啲唔同特色嘅麵包,配個麵包籃,蓋上白布,咁先有格調襯番啲高級餐廳嘛!

頭盤共有3款,款款都好有睇頭,經理推介佢哋個煎鵝肝,話食過嘅客人都讚,所以,煎鵝肝喺穩膽。由於,揀咗一客高膽固醇嘅頭盤,所以,另一客就揀個清新啲嘅牛油果作平衡。


bowl
蟹肉牛油果千層麵 蟹肉牛油果塔,再配點新鮮沙律菜,一身綠油油,賣相非常清爽。咪睇見千層麵就以為會好飽肚,始終喺頭盤,千層麵只喺薄薄一片放晌塔面,而牛油果夠晒熟,軟腍綿滑;混入嘅蟹肉雖然唔算得好多,晌上菜時經理已略作介紹,話蟹肉喺即日新鮮貨拆肉,果然鮮甜無比無欺場。


bowl
香煎法國鵝肝伴焦糖蘋果配砵酒汁 不愧喺招牌,鵝肝嘅口感,蘋果嘅甜酸,醬汁嘅味道,都做得恰到好處。先講件鵝肝,夠厚身,外脆內軟喺基本要求,入口油香豐腴,砵酒汁嘅酒香令味道更具層次,而伴住底下啲焦糖蘋果,酸甜味產生極佳嘅去膩效果。此外,側旁件小圓餅,甚具咬口,混有紅棗、果仁、果皮……等,清甜得嚟有啲似麥纖果仁條,有趣!




bowl
鮮蝦濃湯 餐湯只有一款,好嘅就喺唔使煩揀乜,唔好嘅喺萬一有客人對蝦敏感,就無福消受。經理又介紹到佢哋個濃湯晏晝開始熬,唔單啲用料新鮮,更熬得夠火喉,用上大量鮮蝦連殼,保證濃郁,果然所言非虛,濃到好似啖啖鮮蝦放入口咁,蝦肉亦都爽口彈牙,用料、手勢都上乘。




bowl
自製雪葩 落到下一道主菜前,先以雪葩清清味蕾,喺食法國菜嘅幾指定動作,芒果味雪葩食落似雪糕多過雪葩,因為冰感唔太重,但芒果味非常香濃。

主菜共有5款選擇,牛扒故然喺心水之一,但都要揀揀肉眼定西冷好,最後選西冷,因為風乾(Dry Aged)西冷較少食。另外,釀鵪鶉同樣好少接觸,極之有興趣。


bowl
炭燒美國風乾西冷扒配紅酒汁 肉眼就比較肉味重,西冷就以軟腍見稱,不過,風乾過嘅西冷唔單肉質保持到軟腍,落刀切嗰吓,已感受到好有彈性,而肉味絕對不遜色,外層焦脆有炭燒香,又富肉汁,配上紅酒汁,令肉味更芳香。伴菜嘅烤蕃茄、炸薯角及炒法邊豆,都喺好好嘅薯菜配搭。




bowl
煎焗法國鵪鶉釀巴馬火腿、白菌及忌廉芝士 鵪鶉睇落細細隻,但一樣好飽肚,因為,肚內釀滿以忌廉芝士混合巴馬火腿及白菌,味道非常多變,而且, 鵪鶉肉好細嫩,滲進巴馬火腿嘅鹹香,極具心思。經理更講解,啲釀鵪鶉非常花功夫,因為啲法國鵪鶉本身唔大隻,但基本要先起晒骨,又需要保持外殼完整,再釀入其他材料,所以,繁複之外,手功要夠細膩,故食依道菜,唔止食味道,更要欣賞廚師嘅手勢。



甜品有兩款選擇,啱啱好一人揀一款,唔使左思右想。


bowl
法式多士配雲呢嗱吉士及楓樹糖 多士採用厚切,烘得香脆,唔講仲以為喺雪糕,其實喺雲呢嗱吉士,睇到點點雲呢嗱籽就知嗰朕自然嘅雲呢嗱香味非用香精所比,吉士打得柔滑輕盈,淋上楓樹糖,比蜜糖更清甜獨特。整體做法無乜帶嚟驚喜,但用料卻喺精選。


bowl
日本士多啤梨拿破崙 拿破崙只簡單做一層餡心,但同樣食得出用料精,酥皮香脆鬆化唔油,士多啤梨好清甜新鮮,朱古力醬伴點雜莓,賣相精美。


bowl
鮮奶咖啡 一餐飯,最後有一道美味嘅甜品,然後再嘆番杯鮮奶咖啡,確實喺美妙嘅享受。雖然沖調嘅手勢差咗啲,口感唔平均,但採用illy咖啡豆,醇香度始終有個保證!

級數即喺級數,服務好燙貼,一道菜接一道菜適時送上,不急不緩,讓人輕鬆用餐。此外,每次上菜都有經理講解一下,對道菜認識多啲之餘,更可以用心細味,唔會咁易錯過啲細節,真喺受教了不少。
個人評分 味道:9/10
環境:8/10
服務:9/10
抵食:8/10
平均每人消費:HK$530
餐廳資料:
Chez Moi
銅鑼灣開平道1號Cubus 11樓
2881 1929


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"

最多能輸入300字

累積瀏覽 1185390

全部攻略 1025

全部回應 146