7 香姐真香嗎？

車媽媽從來都喜歡吃米線?，上一趟吃了老闆娘米線已經覺得十分心滿意足，不過真係冇能耐再去排隊食多一次?！昨日行過享和街看見這一間香姐雲南米線門外的美食相片好吸引，趁著這天一個人的浪漫就入去歎番碗米線啦！

中午十二點到達時內裏得兩枱客人，心諗會唔會有啲伏呢！不過既然入到嚟就既來之則安之啦！

看看餐牌有啲咩嘢食先，首先見到佢哋嘅秘製特色美食，確係比起坊間來得特別，例如香煎乳餅和即烤臭豆腐同埋氣鍋雞我都好想試呢！不過這天一個人的浪漫呀嘛沒法吃那麼多！唯有下次拉車爸爸來試啦?。

而米線就跟坊間的米線店同樣先揀了湯底然後再揀餸料，我選了酸辣米線 入面已有酸菜，同埋好特別的豬油渣炸醬，第一次試還是攞個中間位吃個 中辣吧?。

等待期間見到檯面調味味除咗辣椒油外，仲有這樽比較特別的麻辣粉，聞落去都幾香，如果一陣係夠辣的時候可以加啲試試呢！

吃辣嘢當然要飲番支可口可樂啦！跟米線套餐價$7，如果正價要$12一支。

我的酸辣米線$23好快就上檯，都係一貫米線的大大碗作風，聞落去味道都幾香，而且仲見到有好多腐皮，韭菜，芫茜蔥等配料，(我唔喜歡吃芽菜所以走咗)！ 呷一口湯感覺比坊間的米線店清淡，如果唔喜歡濃味的朋友應該都幾適合來這間吃。

這件就係豬油渣炸醬，米線內已經配有數件唔需要另外點的，炸得乾身香口加埋少少辣炸醬好特別又惹味。

叫咗兩款餸第一款係豬大腸$7，滷得入味的豬腸質感軟淋腸香滿滿，而且份量不少呢！

另一款餸係韮菜餃$5，絕對可以用皮薄餡靚嚟形容，韭菜餡香濃又新鮮。只不過係五蚊就有兩隻我覺得十分抵食啊~

最後要讚一讚呢度嘅米線食到最終米線都係爽口彈牙，我好耐都冇食過啲咁爽嘅米線喇！