E Molto Buono：E法炮製

表姨甥女話未試過啲上樓嘅私房西餐廳，啱啱近排從食友嘅食評所見，晌銅鑼灣有一家主打法國菜及意大利菜嘅私房餐廳，風評不俗，值得帶佢嚟見識一下。


餐廳所位處嘅大廈，瑟縮晌霎西街，幢商廈門口又開得細，差啲行過籠。但入到餐廳，又喺另一個世界，走高檔格調嘅E Molto Buono，地方唔喺好大，不過，環境甚有氣氛，柔和嘅燈光，高椅背皮椅，卻有份輕鬆，唔會讓人太拘束。唯可惜喺連少少街景，都被啱啱搭建嘅竹棚擋晒。







此外，生蠔又有買一送一優惠，非常抵食，蠔痴就可以盡情食個夠，不過，身體狀態未喺十足，生蠔暫時未敢掂住。

晌FB讚好及分享，就即時有5%折扣，無理由唔要架。

聽店員講，以前有散點菜式，不過為咗做得專啲，提高質素嘅穩定性，以及有效控制食材，所以，依家就只有6道菜嘅晚餐供應，由頭盤、湯品、小主菜、雪葩、主菜、到甜品，另奉送花茶，定價為$698或$738，視乎主菜選項，睇番啲食材配搭，頗有心思及創意。

飲品方面，一大本酒品餐牌，故然有唔少餐酒、烈酒……等等，不過我哋始終都唔喺嗜酒之人，故店員介紹我哋試吓一啲嚟自「法蘭西」嘅果汁飲品。





White Peach Nectar $78 白桃果汁質感比較厚身，店員話如果覺得有啲漿口，可以加少少冰，但我就覺得OK，而每口滿有桃香，味道純鮮，飲落清新蜜甜。



Chardonnay White Grape $78 表姨甥女就揀白葡萄汁，佢話有種天然果香嘅感覺，葡萄味清淡自然，質感就如一般果汁，無白桃嘅咁杰身。



麵包籃 落單後，徐徐送上麵包籃，一籃有3款麵包：芝麻包、意大利香草包及芝士餅乾，枱上有黑醋及橄欖油，自由取用。幾款包都好食，芝麻包外脆內軟充滿芝麻香，意大利香草包軟綿陣陣香草芳香，芝士餅乾脆卜卜帶芝士鹹香。

頭盤、湯品、小主菜各有兩款選擇，所以，兩個人嚟（依等餐廳點都唔會一個人嚟啩）就可以款款試勻。



煙燻法國鵝胸肉配青蘋果芝麻沙律 兩款頭盤賣相都好清新，因為以唔少新鮮瓜果入饌。平時食鴨胸食得多，鵝胸又喺點？鵝胸肉切成片鋪晌酥片之上，肉質嫩腍味濃，帶點鹹香煙燻味；配上青蘋果粒粒、日式芝麻醬，又有啲青瓜薄片，立時湧出一份清新感。





香草虎蝦肉他他配玫瑰葡萄酒凍，鮮蕃茄莎莎 虎蝦肉他他唔似得牛肉他他咁剁得咁細碎，保留番粒粒蝦肉，入口仍有蝦肉嘅爽口感，配上蕃茄莎莎，酸香清爽。旁邊仲有啲玫瑰葡萄酒啫喱及蕃茄泡沫，啲啫喱粒食落又真喺有少少玫瑰香味及酒味，至於而3面嘅藍色珠珠喺橙酒魚籽，感覺又幾得意喎。



兩款湯品，龍蝦湯故然喺法式經典，至於另一款粟子甜薯忌廉湯，聽落幾特別。其實，早前晌觀塘廠廈嘅i kitchen試過一款紫薯蓉湯，都頗有驚喜，所以，今回個粟子甜薯忌廉湯，都有啲期待。



法式龍蝦濃湯 橙紅色嘅色澤，睇落就好對辦，先試一口，個濃湯嘅蝦味果然超濃郁，完全將啲蝦嘅精華融入個湯裡面，口感滑溜細膩，雖然湯內無加有蝦肉，但一樣喺碗高水準嘅熱湯。試完兩個頭盤，飲口熱湯，寧舍暖身，順帶一帶，頭盤過後，湯品、小主菜、主菜所用嘅餐碗或餐碟，都喺先熱透才上菜，令餸菜嘅熱度持久。



意大利風乾煙肉、栗子甜薯忌廉湯 依個甜薯忌廉湯應該都喺用上紫薯，因為湯色泛起淡紫，但就無i kitchen紫薯蓉湯紫得咁勁，皆因成份仲有意大利風乾煙肉及栗子，故味道無淨得紫薯咁單一，有輕輕嘅栗子香，又有啲風乾煙肉粒咬吓，要挑剔就喺個幼滑度差咗少少，無個龍蝦濃湯咁好。



蟹肉焗釀大啡菇配巴馬臣芝士菠菜忌廉汁 跟住落嚟喺Entrée，有人譯為小碟或小主菜，先試個蟹肉焗釀大啡菇。個大啡菇裡面釀咗好多蟹肉，堅真材實料，絲絲蟹肉多到填滿晒個菇頂，入口非常鮮味，仲加入好多巴馬臣芝士，夠晒香，而且，個大啡菇鮮嫩多汁，就算唔沾啲菠菜忌廉汁都已經好食。





香草紅酒燒汁燴澳洲和牛牛臉頰釀酥皮盒 本來另一道Entrée喺香煎鵝肝配貴妃酒肉桂燴梨子，但店員話今日有款新Entrée，問我哋有無興趣試，由於煎鵝肝早前都食過，牛臉頰亦較少食，所以，就不妨試試新嘢。個釀酥皮盒做得成個拳頭咁大，以香草紅酒燒汁煮過嘅澳洲和牛牛臉頰粒粒堆到成個小山咁，牛臉頰粒十分好食，軟腍富肉香，而個酥皮盒亦好酥脆。





蕃石榴雪葩 經過兩道同樣濃味嘅小主菜，喺時候清清味蕾，作為間場喺蕃石榴雪葩，入口蕃石榴味強勁，清爽酸香。

上文都講過套餐分兩個價，視乎揀咩主菜，主菜共有4款選擇：焗釀法國鵪鶉、香煎比目魚、慢煮西班牙黑毛豬及M8澳洲神戶牛肉眼，前3者都喺賣$698，而澳洲神戶牛肉眼則賣$738，我哋就揀兩個較平嘅主菜。



焗釀法國鵪鶉，黑松露意大利飯，配香蒜炒菠菜伴迷迭香燒汁 早個多星期晌Chez Moi試過一道「煎焗法國鵪鶉釀巴馬火腿、白菌及忌廉芝士」，覺得非常好食，所以，今次見有法國鵪鶉就不暇思索想再試多次。法國鵪鶉焗至金黃，外皮脆到咔咔聲，啲肉幾咁嫩滑，香蒜炒菠菜換咗藜麥、BB甘筍、車厘茄、露筍……等等，一樣健康好食；不過，釀黑松露意大利飯效果麻麻，一來意大利飯啲生熟度好難控制，二來一大堆飯份量實在太重，而且，今次食到嘅飯粒較腍，無晒意大利飯嗰份咬口感，兼且有啲乾，意大利飯喺有啲濕潤先好食！







慢煮西班牙黑毛豬梅肉，香辣南瓜蓉，蘋果醬配時令蔬菜伴車厘子燒汁 西班牙黑毛豬本身都頗有名氣，依定亦好普及，選取梅頭肉，相信貪其更嫩，以慢煮處理，明顯就喺保留肉質軟腍及原味，輕輕煎香就已經可以上枱。厚切嘅豬肉，腍滑富肉汁，配蘋果醬及車厘子燒汁，可謂各有千秋，前者配黑毛豬多份清新酸爽，平衡肉嘅油脂，而後者以燒汁煮車厘子，伴黑毛豬食，有份香甜味。伴菜仲有辣哋嘅辣南瓜蓉及多種時蔬，非常豐富，仲好飽肚。





玫瑰茉莉花茶 兩道主菜過後，我哋都飽到不得了，唔止菜式多，份量超十足。此時送上花茶，散發幽幽玫瑰花香，飲落寧神消滯。



栗子意大利芝士蛋糕，配士多啤梨脆脆 甜品喺大廚指定，咩喺是日甜品，嚟到先知，而甜品唔喺單一味，兩客都喺唔同。先試個混入栗子蓉嘅意大利芝士蛋糕，芝士栗子蓉口感十分柔幼細膩，帶濃郁栗子香，再配番鬆脆嘅手指餅，並添上少少士多啤梨脆脆珠作點綴，配搭不俗。





冧酒啫喱，燒菠蘿伴椰子雪糕
另一款甜品以冧酒啫喱、燒菠蘿肉、花生糖及椰子雪糕組合成嘅精緻甜點，墊底嘅冧酒啫喱清甜帶微微酒香，椰子雪糕好清甜，整體而言，味道同口感都多層次。



6道菜嘅晚餐，食咗兩個半鐘，一道菜接一道菜慢慢上，讓人慢慢細味。雖然除湯以外，所有菜式我哋都喺共享分嚐，但同項菜式都會一齊上，喺服務嘅質素，此外，上菜時不時提醒我哋小心碟熱，又真喺幾熨手。故此，唔單止環境幽雅，又品嚐到廚師嘅心思，更體驗到店家嘅誠懇服務。
個人評分 味道：8/10
環境：8/10
服務：8/10
抵食：7/10
平均每人消費：HK$815
餐廳資料：
E Molto Buono
銅鑼灣霎西街28號必發商業大廈2樓
3421 0063

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================