0

華倫餐廳 Warren Restaurant:華倫.無比堤.有貴刁

山區麵包王 於 2017-02-28 00:00:00 發表  |  累積瀏覽 368

分類:
本來約咗朋友傾嘢,不過,臨時被人放飛機,咁一支公都要食飯架,正身處銅鑼灣、跑馬地交界位,依個吊腳位唔熟,上網查查附近有咩好食,一查就彈出依間茶記,略略睇過啲食評,其中嘅鎮店流沙西多士不斷洗板。


踏入餐廳,比大多數嘅茶記感覺好,唔單環境闊落光猛,無一般茶記擠逼,兩邊通道寬闊,仲要晌依啲旺區出現,認真少有,所以,舒服好坐,而且乾淨企理,招呼亦不俗。





此外,拉開側邊餐具櫃桶,餐具充足排列整齊,平常見唔少茶記做得好「求其」,唔喺無依樣就無嗰樣;更提供代糖,又有免費wifi,茶記嚟講都算少有,依啲都喺增值加分位。





咁嚟得茶記又唔喺食環境,食服務,但依幾方面做得好,客人點都食得開心啲。不過,最重要都喺啲嘢食得唔得,睇一轉餐牌,除唔少茶記慣常出現嘅食物外,亦有唔少自家招牌嘢或特色菜,如燒味系列、鐵板系列、石窩小菜、咖喱、焗飯。









當然,梗有晚餐供應啦,晚晚不同,每晚有5款選擇,基本價喺$78,如揀六福燒味飯則要$128,奉送是日餐湯、火腿沙律及熱飲。

雖然佢啲流沙西多喺鎮店,咁無理由食件西多當晚餐喎,我都喺鍾意茶記啲炒粉飯麵,再者,啲碟頭嘢可另加錢要湯或飲品,選擇具彈性。同埋睇過啲食評,啲是日餐湯及火腿沙律都普普通通,單點個炒粉麵加杯熱飲比叫晚餐仲划算,哈哈!




bowl
馬來炒貴刁 $58 嗰時去馬拉,當地都有唔少熟食檔,都幾鍾意食當地嘅炒粿條,口感似河粉,但韌性強啲。貴刁就即喺粿條,碟貴刁份量十足,有爽口嘅蝦仁、叉燒(乾韌咗啲)、炒蛋,頗足料,但少咗慣常會有嘅火腿,下洋蔥、韮黃、銀芽,但個人就嫌青椒稍多;話就話貴刁,但多數都喺用埋河粉,難得無炒至斷斷碎碎,而且沾滿黃咖喱,又炒得均勻,師傅炒功不俗。




bowl
熱奶茶 +$5 去咖啡店飲鮮奶咖啡喺小弟不二之選,嚟到茶記飲港式奶茶梗喺小弟嘅鐵膽之選。滾熱嘅奶茶,入口感覺茶底不俗,夠茶香,但絲滑度未夠完美,飲落稍欠一種圓滑感。


bowl
合桃露(晚飯免費送) 點餐時被店員問食咩糖,已有少少奇怪,但睇勻餐牌唔見有糖水一欄,再問清楚,原來嚟食晚飯都會免費送中式糖水一客,是晚就有紅豆沙或合桃露。咁免費嘢我都唔敢有太多要求,而碗合桃露算有合桃香味,卻少少偏稀,只可以講不過不失,但較大問題喺滔出來已見有少少凝結咗嘅漿塊,雖然唔喺咩大問題,其實可以處理得好啲。



是次偶然到訪,其實感覺唔錯,尤其環境及服務方面,食物只喺試咗少少嘢,水準算喺不俗,但仍有改善空間,始終喺茶記,唔會要求特別多。
個人評分 味道:7/10
環境:8/10
服務:8/10
抵食:7/10
平均每人消費:HK$63
餐廳資料:
華倫餐廳 Warren Restaurant
銅鑼灣禮頓道28-30號地舖
2505 8099


=============================================

感謝 山區麵包王 提供以上資料

山區麵包王的網誌: http://garycwm.blogspot.hk/


=============================================

鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"

最多能輸入300字

累積瀏覽 1185415

全部攻略 1025

全部回應 146