Cafe YAWN：穩食艱難

食友早前嚟到光顧此小巷中嘅咖啡室小店，話佢哋啲咖啡頗出色，建議我不妨嚟試試，拖咗幾個月，專登拉咗同樣喜歡嘆咖啡嘅親友嚟Cafe Yawn聚一聚兼食餐晚飯。依條小街無嚟年多，似乎又多咗幾家食肆。


講得喺小店，地方當然唔大，內裡佈置簡約，黑白灰為主調，一列面壁嘅高枱，以及多組二人枱，有種彷彿希望客人喺人少少嚟悠閒聚一聚，盡量保持寧靜嘅氣氛。故此，雖然是夜都有幾枱客，但環境確喺唔嘈雜，頗幽靜。







自助水吧、調味料吧喺唔少Cafe現行做法，減省人手招呼，自自在在，嚟得嘅客人相信亦無所謂。

半自助形式嘅服務，所以先出去落單，再由店員送上。餐牌有兩份，一份喺基本嘅散點菜式，一面食物、一面飲品，前者選擇唔算好多，烤薯粒、意大利飯、漢堡、是日意粉、甜點……等等10數款，後者則主打咖啡，其次有熱茶、果汁、沙冰，卻連紅白酒亦有，但啲餐酒唔知搵咩菜式嚟配合好！



另一份自不然喺晚市套餐（$78），主菜4揀1及，包一杯基本啡茶，可加錢升級其他飲品及加錢配指定甜品。 



牛肝菌汁雜菌意大利飯 意大利飯以小平底鐵鍋盛上，既保持飯粒嘅熱度，又更逼出菌香，所以，個飯一上枱，確喺幾香噴噴。飯粒煮得有水準，皆因入口濕潤、咬口、有菌香，而且，內裡混有唔少雜菌粒，夠晒口感。





煙三文魚薄餅 原本喺想試試個龍蝦汁鮮蝦寬蛋麵，可惜話個汁底無晒貨，緣慳一面，所以，改為一試個薄薄。對比起個意大利飯，薄餅嘅製作明顯有種「迤」嘅感覺，批底猶如麵包，唔脆亦唔喺軟熟，口感比較乾，加上批面只搽咗啲茄醬，再就咁放上火箭菜、煙三文、紫洋蔥，唔喺話唔好食，但就無完全新鮮焗製薄餅嘅感覺，猶如一客煙三文意大利拖鞋包。



上文都講過親友同樣喜歡嘆咖啡，餐飲就梗喺揀咖啡，兼寧願加多少少要啲特色咖啡。



Tiramisu Latte +$15 親友讚杯咖啡拉得唔錯，又話咖啡味香醇，但就唔喺好飲得出跟普通鮮奶咖啡嘅分別，仲講笑咁講，起碼無陣意大利芝士餅味，只喺似乎有微微朱古力甜味，咁咪即喺變咗杯Mocha？



Toffeenut Latte +$15 小弟嘅鮮奶咖啡拉得比親友杯更靚，杯面唔會起泡粒，個心形對稱兼線絞細緻。而味道上，拖肥喺重味道嘅嘢，所以，一小口已好突出，又無過甜嘅感覺，好得。

晚市套餐餐牌寫住+$35可選任何甜品，並非散點餐牌中所列嘅甜品，只喺出面餅櫃所擺放嘅款式，是夜所見，啱啱仲有兩款，正價要$45，依家叫慳番$10。





歌劇院蛋糕 +$35 點餐時時見得番一件，所以，就麻煩店員幫忙留起、後上。外觀睇落真喺做得幾靚仔，雖然無傳統嘅做出咁多層，但清晰有層次，之但喺，味道與口感都唔合格，底層嘅海綿蛋糕乾到不得了，上層嘅咖啡忌廉唔軟滑，而面層嘅鏡面朱古力，做得爧身，但已經乾硬晒，相信喺就咁放晌餅櫃抽乾晒，嚴重處理失當，覺得嘥晒件餅！





焦糖脆脆蛋糕 +$35 對比起個歌劇院蛋糕，焦糖脆脆蛋糕嘅水準就完全谷底反彈，海綿蛋糕部份食得出鬆軟有彈力，忌廉打得輕盈柔滑，又完全無油膩感；啲焦糖脆脆既脆口，又有焦香嘅蜜糖味，我哋大家都讚好食。



綜合今次嘅經驗，其實Cafe Yawn環境幾輕鬆自在，服務亦唔錯，又無加一，但無論主菜，抑或甜點，水準都唔平均，一部份做得好，一部份又做得唔好，要將食物保持穩定性都好重要，希望小店繼續努力！
個人評分 味道：6/10
環境：7/10
服務：7/10
抵食：7/10
平均每人消費：HK$128
餐廳資料：
Cafe YAWN
銅鑼灣希雲街9號地舖
2641 1511

=============================================

感謝 山區麵包王 提供以上資料

山區麵包王的網誌: http://garycwm.blogspot.hk/

=============================================