0

重見天日的羅家飯

戀吃車媽媽 於 2017-09-09 07:13:12 發表  |  累積瀏覽 338

分類:前菜 主菜 粥粉麵飯 湯水

羅家飯自從在六月中出過一次場之後像重門深鎖,車媽媽自從冇咗車車在身邊之後晚晚都走左街出去食飯,無它的皆因一個人在家中真的時常想念他啊!但這樣就難為了車爸爸成日都要一個人晚飯了!而家就回味返7月中至8月煮過啲乜嘢啦!

某一天的一個人的浪漫用上這個從美麗華酒店友Event得到的泰式Riceberry班戟預拌粉做出我的美味Brunch。

這種是泰國新品種米係用紫米同茉莉花米雜交而成,有好高的花青素是一種好有益的糙米,煮出來班戟會呈現我最喜歡的紫色,配合酸香的山竹和香甜的密瓜一齊食實在太美妙了!

這一夜羅家飯吃的是韓醬焗豬頸肉和墨魚滑蒸豆腐,一濃一淡的配搭很不錯喔!!

方便快捷只需用韓國醃肉辣醬醃豬頸肉過夜,隔天煮時放入焗爐就有好好吃的韓醬焗豬頸肉吃嚕。

有一個那麼濃味的菜當然要配返一個清爽的拍檔!墨魚滑蒸豆腐清爽得來有鮮甜,加點甜豉油好味到飛起呀!

另一餐就簡簡單單蒸魚加炒菜,冇咩特色但屋企菜理應如此。

用辣麵豉醬蒸海黃花魚惹味又鮮甜係我最愛的吃法。

蒜蓉炒西蘭花有益又有營養而且仲好好味添!

某天行過街市海鮮檔肥妹仔捉住我一定要請我食佢新入手的法國生蠔,你哋冇睇錯呀街市買法國生蠔仲要係好新鮮添!

八月時啱啱入貨做特價$30/隻,試過一隻之後欲罷不能過了數天當然要乖乖落去比錢買半打返屋企同車爸爸歎啦!


隻隻都肥美肉厚又新鮮,肉質爽口又鮮甜質素好不錯,不過近日見已經賣到$38/隻啦,真係早買早享受!!


另外見到有呢隻圓型大茄子一於用芝士醬油焗,入口軟滑加上芝士的鹹香好吸引呢!

另外再煮多個冬陰功大蝦焗飯,呢個係車爸爸嘅favorite焗飯嚟㗎,香辣惹味的冬陰功加埋爽口彈牙嘅大蝦,你話怎忍得住D口水呢!

接下來這一餐就比較清淡,蒸立魚、蒸水蛋同埋清麗村姑的美味潺菜。

唔係話我認叻呀我蒸水蛋有一手㗎!通常都會蒸得滑溜無瑕,加少許瑤柱在內增添鮮味更加可口。

今次這條立魚味道十分甜美,用來清蒸最適合不過。

而清麗村姑的潺菜更是美味無窮,皆因自種的潺菜味道更加香濃可口,不過我都知道唔係個個都接受到潺菜嗰啲滑潺潺的口感,不過我同車爸爸就十分愛吃。

八月份天氣真係好差又翳又焗又熱好多時都冇乜胃口呢!那就煮瑤柱瓜粒湯飯再蒸條魚吧!

瑤柱冬瓜粒湯飯顧名思義內有瑤柱、冬瓜粒、及肉粒,加少少香氣撲鼻的菇菌已經是美味無窮的湯飯。

這天見到魚檔這條東星斑十分新鮮就買返去蒸俾車爸爸食啦!滑捋捋的鮮甜魚肉吃得他滿心歡喜!

這天的家常菜豉汁蒸排骨、蒜蓉蒸手指茄和煎太陽蛋。

為何無端端要煎太陽蛋咪因為在九井水產買了這個平時少見的沖繩雞蛋囉!

煎起的沖繩雞蛋蛋黃很挺身,蛋白滑溜蛋味超香,車爸爸用來撈飯吃表示十分滿意!

蒜蓉蒸手指茄又香又滑又有益是我最愛的餸菜之一。

豉汁蒸排骨呢個好簡單的家常菜只要調味做得好買到靚排骨就好好味㗎喇!

這一天清麗村姑帶給我她的寶貝農作物,包括有豆角、勁辣辣椒仔、黃金苦瓜、九層塔還有美味秋葵。

將之前吃淨的茄子加入豆角、秋葵和肉碎便炒成一碟美味的雜菜肉碎,再蒸多兩條辣麵豉醬黃花魚惹味又好餸飯!

大家也還記得天鴿那10號風球嗎?因為它造就了車爸爸一天額外假期,那好好在家撐枱腳打個邊爐吧!

用了日本鰹魚湯包加入最合襯的蘿蔔作湯底!

既然咁有日式風味那開支日本清酒高興下啦!

生料有安格斯肥牛、墨魚滑、新鮮肥美雞件、鮮甜的貴妃蚌及沙白蜆。



本來仲想買車爸爸最愛吃的脆肉鯇魚,可惜打風日個個都打邊爐所以經已售罄!我識咁多魚檔梗搵到靚魚食嘅!比我搵到幾條新鮮的鷹倉同一些鮮甜的魚仔用打邊爐就啱曬!

再買些超甜粟米及C旺菜呢一餐唔算太豐富嘅火鍋都叫做食得吓啦!

點知隔咗冇耐的星期天又打風所以那天返唔到外家!又造就多一天羅家飯,清酒煮蜆喜歡冇?一滴油都唔需要落就煮得成呢一個菜健康好味的菜,只要買到冇沙的蜆就可以好易做出這個美味的餸菜。

魚販介紹我食呢條叫做三泥魚,個樣我就唔係幾喜歡,仨原來魚肉好鮮味不過就有好多細軟骨,大家吃的時候要小心呀!

見到街市有荷塘芥蘭賣就買些柳梅肉片炒荷塘芥蘭吧!炒香後落少許芡汁就已經十分好味了。

由9月2號至到7號是我閉關的日子!因為我應承咗朋友幫手湊佢的*乖女*!所以嚟緊呢幾日煮餸都會以容易為主!

先嚟煲一個粉葛鯪魚湯皆因車爸爸近來火氣有些重係時候煲個湯佢下一下火!自家煲老火湯好飲就一定㗎啦嘻嘻!

今天我就扮燒臘店首先有自製叉燒再配幾片我喜歡吃的紅腸和太陽蛋就變成美味的三寶飯了,可惜忘記買鹹蛋如果唔係四寶飯有得食呀!

相信唔使我講大家都知有幾好味啦!您哋睇下呢個*乖女*有多欣賞我嘅廚藝。

第二晚車爸爸落Order話要食海南雞飯喎!我雖然唔係咩好老婆但老公要求到我必定會達成他心願的,而且並非難煮的大菜!

今日買咗隻十分之靚的鮮雞,皮脆肉嫩我也不禁讚賞自己冇糟蹋咗佢!

油飯亦都絕對唔難煮只要你留返隻鮮雞内的肥膏便可炸出香口雞油,再加上黃薑香茅等配料煮飯就會得出香口惹味的油飯了。

灼多一碟菜芯簡簡單單的一餐海南雞飯就咁完成喇!

當然一隻雞我哋係冇可能一夜吃完的,所以第二日會變成道具餐,而我就諗到不如整泰式雞絲河啦!

淆一個雞湯再加入蘿蔔浸幾個鐘後蘿蔔入味到不得了!索盡雞湯的鮮甜味真係好好味,雞絲係尋日食淨的雞肉,不須再煮用熱湯浸熱就食得,加上炸蔥酥和蒜蓉和小許辣椒這碗泰式雞絲湯就完成啦!

雪櫃還有吃剩的C旺菜就用雞湯煮埋又多一碟靚菜食喇!

鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"
  • 戀吃車媽媽 於2017-09-10 09:54:59 留言
    原文由 EEChan 於 2017-09-09 14:00:18 發表
    羅家菜一樣咁精彩
    家常便飯!
  • 舉報 回覆
  • No.2
  • 艾華斯 於2017-09-10 23:59:14 留言
    你D餸整得好靚呀!咁有心機唔係HEA啦~~~
    個班戟真係好特別,未見過呢~~
  • 舉報 回覆
  • No.3
  • 戀吃車媽媽 於2017-09-11 12:45:17 留言
    原文由 艾華斯 於 2017-09-10 23:59:14 發表
    你D餸整得好靚呀!咁有心機唔係HEA啦~~~
    個班戟真係好特別,未見過呢~~
    多謝讚賞!班戟粉沒多味道只是色澤較特別!
  • 舉報 回覆
  • No.4

最多能輸入300字

34
2024
199
2023
159
2022
258
2021
241
2020
301
2019
330
2018
341
2017
378
2016
350
2015
360
2014
196
2013
87
2012
90
2011
230
2010
60
2009
顯示更多

累積瀏覽 1687010

全部攻略 3614

全部回應 11385