踩單車大埔至落馬州

腳未完全好時，不太想行山。加上12月頭踩完單車好想再踩，就算今日得三個人都要照去。

因為要係中環睇醫生，大約2點先去到大埔。租咗單車，就開始由大埔起行。每一次由Roy帶路我都唔知自己踩去邊。只係一路跟。一出大埔河，沿河邊行，去到大埔頭抽水站，落一條隧道，跟住向右轉，到康樂園路附近，之後同火車軌同路，向粉嶺出發。不過事隔一年多再嚟，發覺村口條路好爛，又多咗好多車行，非常難走。走完元嶺村，過埋橋底嗰個三叉位就好好多。 

繼續沿車路行走，中段見到村口郵箱，其實之前踩都見到，今次再望原來呢度係九龍坑(東村)，咁即係望上去既山咪最憎既九龍坑山。踩到車路尾上天橋，粉嶺已經係前面。估唔到一個鐘已經去到粉嶺。 

之後繼續踩，好快已經去到之前踩既羅湖邊，當然又停步食個豆花先。Roy話有時間，所以我哋繼續踩去落馬州。原來沿食豆花條路一直踩入去，上斜落斜，經過幾轉，唔駛15分鐘，就同羅湖邊境一河之隔。而附近就有魚塘同埋農田。如果唔講的確有d似台灣既感覺，不過唔可以望太遠，因為深圳d樓太高啦！ 

繼續向前踩就一路向落馬州方向行，條路都踩得好舒服。最後再轉右入去另一村口，踩到尾去到鐵絲網邊，同大陸真係好近，係邊境再影一輪相，我哋就沿路返出去。 今次踩呢架淑女車真係超攰，就算新，有得較波都踩到好攰。Roy話呢d車身重，所以用力d，我唸我以後都唔會再踩淑女車架嗱！

6點3左右踩回大埔還車。 還完車我哋去食飯，U Magazine 今期介紹咗大埔既陳漢記煲仔飯。估唔六點半嚟到都排成三、四十人，相信要等個幾鐘先到。最後7點40分左右，輪到我哋可以係門口落order，但勢估唔到佢話要8點3先有。而位就叫完煲仔飯無耐就有啦！所以食咗腸粉先，呢度都係話好出名。腸粉真係幾滑，不過叫炸兩，油炸鬼已經林晒唔好未lu。

呆坐咗廿分鐘，煲仔飯終於出現，我叫油鴨脾飯，雖然食得辛苦d，但有腊味油加埋飯香，感覺唔錯。不過今日踩幾遠單車都無用，係返晒度。但好明顯我哋等個飯等得好辛苦，我哋無人記得要影相，可想而知，幾咁肚餓。一個人食完成個煲仔飯，飽晒。返歸抖抖啦！