0

陶寶B人生第一次面試

莎拉蛋糕 於 2013-11-14 00:00:00 發表  |  累積瀏覽 369

分類:
2013/11/2
9月份既時候, 一口氣幫陶寶B報咗約6間Nursery, 估唔到咁快就收到信要11月就要interview. 陶寶B係6月尾出世, 所以佢應該都算係報名範圍中既細B一族. 雖然陶寶B現時已經16個月大, 但係都唔太識講嘢(暫時只識bye bye), 所以莎拉都係抱住旨在參與及見吓世面既心態去帶陶寶B出席佢人生既第一次Interview. 

今次Interview既係迦南幼兒園(富榮花園分校), 收到既面試時間係11am, 呢個時間好多時都係陶寶B上午nap time, 所以都預計到佢會扭眼瞓, 所以莎拉只係要求陶寶B唔好"咬"腰大喊及扭計就已經足夠. 

雖然話就話玩吓姐無壓力, 但莎拉同謝菲都不約而同當日早上都有啲緊張呀. 早到咗到達幼兒園, 所以就要係門口排吓隊先. 到咗約11:00夠鐘時就安排所有11am appointment既家長進入校園. 嚟到新環境當然要俾陶寶B warm up一吓, 等佢自己座櫈仔玩吓玩具. 


不過玩咗10分鐘倒就開始見佢無咩耐性啦, 開始想行去第度玩啦. 

而呢個時間學校就開始安排一位家長去聽學校簡介, 而另一位家長就陪小朋友面試. 

好啦好啦, 到陶寶B啦, 呢位小朋友雙腳好似較剪腳咁夾實莎拉, 唔肯自己座!!! 同陶寶B面試既Miss叫黃老師, 一位好年青既女miss, 佢好nice, 因為佢知陶寶B唔肯自己座, 所以就叫莎拉抱住佢座一陣先, 好啦, 開始面試啦.
1) 老師取出一隻杯, 上面貼有何馬既大口, 另有4粒花生, 老師要求小朋友將花生放入杯內. (陶寶B起初完全無咩反應, 只係攞粒花生上手, 之後老師就俾架車仔陶寶B, 陶寶B見到架車仔就識得玩, 推吓推吓, 跟手就拎起粒花生放在車仔上, 之後就將粒花生放入杯內, YEAH!!!!第二粒既花生, 陶寶B用同一方法放入杯內. 老師就笑住話呢架係運花生既車車呢.)
2) 老師取出4個膠公仔(海星, 鴨仔, 海豚, 魚)及4張相同公仔既相片, 要求小朋友玩配對(呢一題陶寶B做唔到, 仲就去食公仔添!!!!)
3) 老師取出一個橙及一條香蕉, 問陶寶B邊隻係香蕉, 老師見陶寶B好似無咩反應, 就問莎拉係咪少食香蕉, 咁陶寶B又的確係比較少食香蕉呢, 所以就將香蕉改為蘋果, 今次老師就問邊個係橙, 陶寶B豫疑咗幾秒之後就伸手取個橙 (其實莎拉覺得陶寶B係撞彩揀啱咋). 之後老師就將蘋果換成麵包, 問陶寶B邊個係麵包, 今次陶寶B好快手就一手攞咗個包啦, 莎拉覺得呢個就唔多似撞彩, 佢應該係真係識既!
4) 老師拎一幅圖畫, 指示出Rabbit, lion and dog, 跟住就問邊隻係rabbit, 呢一條陶寶B完全無反應. 5) 最後一題, 老師打開本圖書, 一邊係蘋果, 一邊係橙, 問陶寶B邊個係蘋果, 陶寶B既反應係攞本書想自己睇, 但就始終指唔到邊個係蘋果. 老師都覺得陶寶B好似有啲眼瞓, 問是否NAP TIME呢. 最後老師就問陶寶B是否學緊講嘢, 莎拉就指出佢暫時只識講Bye bye!

面試完畢啦, 不過臨走時都係無講到Bye bye呢, 但係莎拉已經覺得陶寶B今日已經好叻仔, 因為除咗沒有扭計之外, 面試中段時間又肯自己座, 最估唔到係仲居然可以答到部份問題, 真係好喜出望外架啦, 陶寶B完全已經超額完成.
或者有人會覺得莎拉Set既要求實在太低啦, 但係莎拉只係想陶寶B循序漸進, 做番佢呢個年齡應該做得東西, 盡量享受佢既童年. 莎拉唔想偷走陶寶B既快樂童年換去參加N個既興趣班訓練班來得到所謂既証書. 試想想沒有童年既回憶既幾咁可悲呢. 所以其實就算到最後沒有N班取錄, 莎拉覺得真係得無所謂, 佢年紀還少呢, N班又是Optional的, 加上莎拉自己細過時都係沒有入讀nursery呢.

感謝 莎拉蛋糕 提供以上資料
莎拉蛋糕的網誌 http://sarahcakeblog.blogspot.hk/
鐘意SeeWide的分享,給我們一個Like吧!
  • 攻略日期:N/A
    攻略地點:N/A
  • 攻略時間:N/A
    是次消費:N/A
0人比"掂"

最多能輸入300字

累積瀏覽 220997

全部攻略 499

全部回應 0