體重與身高
今期沒有機會上個磅, 所以唔知實際重量, 但憑平時莎拉抱佢既感覺, 已Feel到佢重量應該有進步. 而身高方面, 莎拉自己粗略度過, 好似有78cm, 比上個月高咗啦. 好多人見到陶寶B都話佢唔似11個月大, 因為佢真係身長, 唔通陶寶B會變成老積仔, OH NO, 莎拉唔要呀!!! 所以而家有機會返而會俾陶寶B著多啲BB裝, 即係啲包住PatPat既style, 因為遲啲再大啲, 就唔再有size著到架啦. 懷念小時候既陶寶B呢.
食量
依然保持住2餐固體, 3餐奶及1次水果. 不過呢個月開始覺得陶寶B識得揀嘢食, 特別係水果方面, 因為以前佢細個時都會食牛油果及木瓜, 但係而家真係掂都唔掂, 水果就最like食啤利, 藍莓及香蕉, 即係話甜味重啲既水果至食, 真係激C. 莎拉見佢出咗都有8隻牙仔啦, 諗住比佢試吓食Pasta及麵包, 點知陶寶B通通都唔Like, 陶寶B你唔係鐘意食軟飯呀?!!! 唔好做軟飯王好喎.
活動能力
-呢一個月真係進步神速, 月頭都仲見到陶寶B爬得好慢好唔順, 但到咗月尾, 就已經爬得好快, 三爬兩撥就已經由廳既一面爬到去另一面, 真係快到呢.
-暫時都仲未識講嘢, 連"媽媽"及"嗲嗲"既音都未聽過, 不過莎拉覺得陶寶B係古惑B嚟架, 因為每次對住陶寶B講佢既壞話, 陶寶B好似識聽咁, 望住我地係度笑.
-另一樣莎拉最開心既就係識得"錫錫"呢個指令, 不過都要睇陶寶B既心情先得, 當攰及扭計就一定唔會做, 不過話就話係"錫錫", 不過陶寶B係用頭碰你個頭就當係"錫錫", 好攪笑.
-已經自己可以扶住物件企, 仲開始見到佢放手, 嘗試唔扶住自己企, 暫時都係只可以hold住幾秒啦.
-極度鐘意跳跳跳, 係網床度不斷跳, 好似跳彈床咁
作息時間
開始發現陶寶B愈來愈早瞓覺, 由之前10:30餵奶瞓覺改為而家10:00, 不過有時瞓到半夜可能會醒一醒, 之後就可能要"暗一暗". 其實佢早瞓啲都好架, 咁樣莎拉同謝菲就可以多少少私人時間早自己嘢.
健康
感恩呢個月平平安安, 身體沒有大問題, 係試過有一晚痾水, 不過都係一次, 之後就一切正常. 希望陶寶B Keep住呀, 做個健康快樂大baby!
