Week 10
呢個星期唔舒服既感覺越嚟越犀利, 已經記唔起作嘔, 想嘔同真係嘔咗既次數, 每日下午4pm至晚上11pm就係我作嘔作悶發作既時刻(好似同好多mom-to-be相反呀, 好多都係早上先作嘔呀), 每日既晚餐都唔係好想食, 就算食都係份量唔多, 仲要淨係想食菜, 成餐晚飯可以一啲肉都唔想食,,,,唉,,,,,究竟呢種作嘔作悶, 食慾不振既日子幾時先會過去呀!!!!
謝菲見我呢一排都無咩胃口, 佢就係放假既日子煲咗個超甜紅青蘿蔔豬骨湯俾我(真係估佢唔到會煲湯俾我呢), 我一放工返到屋企就聞到啦, 真係好好飲呢, 好鬼C甜, 真係一煲好窩心既湯, 莎拉仲飲咗2大碗呢!!!!
Week 11
作嘔作悶既情況完全無改善呢, 唯有自己諗諗方法, 無意間俾我發現, 食青蘋果好似可以對作嘔作悶既問題有啲改善, 每次食完青蘋果個人都舒服咗呢. 又係網上見到有mom-to-be介紹飲薑茶可以舒緩作嘔情況, 所以就買咗盒太子牌既即沖黑糖薑茶呢, 唔太甜仲好有薑味呢, 天氣凍凍地時飲, 真係唔錯架.
Week 12
雖然係聖誕節及除夕week, 但係因為實在成個人都唔多舒服, 又容易攰, 所以今年都無咩慶祝活動啱我呢, 可憐既謝菲就唯有乖乖咁係屋企陪我啦. 身型方面, 都仲未係好覺, 仲未見肚, 不過已經開始唔太敢著中腰牛仔褲啦, 不過低腰就無問題. 唔知係咪大肚婆特別好運, 莎拉同謝菲係公司既party都不約而同抽到唔錯既獎金及獎品呀, 唔通係"陶寶B"係後面發功?!!!
Week 13
因為政府個邊只係排到中期既唐氏檢查, 所以莎拉都係決定自己係私家醫生做Oscar啦, 因為初期既Oscar準確度會比中期高呢. 今次去到醫生磅重時, 比上次仲輕咗1磅呢, 我諗因為食嘢唔到所以無咩點重過, 不過醫生話問題不大呀. 今次可以照普通既超聲波呢, 陳醫生反覆度咗"陶寶B"既頸皮幾次, 結果係1.5cm, 所以度頸皮呢一part就pass啦, 要等埋個驗血報告呢. 過咗幾日, 陳醫生就親自回覆有關我既oscar result, 加埋個blood test, 有問題既機會率係1/6368 (話個數字咁好意頭既), 所以換言之我既oscar test pass啦!!!! Yeah!!!! 無見"陶寶B"一個月, 既又大隻咗啦, 身長已經5.54cm呢, 加油呀!!!
