0

九寨溝家家樂之旅-Day 2(上)

莎拉蛋糕 於 2011-11-14 00:00:00 發表  |  累積瀏覽 427

分類:長線旅遊 特色景點 ;地區:中國
個頭沖完涼, 呢頭真係床都未瞓暖就已經要起身啦, 因為集合時間係4:30AM呢, 臨瞓之前打去Front desk度落個4am既morning call, 連個服務員都以為佢聽錯呢, 後尾再三講一次先ok呀!!!

4:30AM準時拖住行李出Lobby集合上旅遊巴, 領隊就每人派一盒酒店既早餐盒!!!

打開裡面, 有2件蛋糕, 1個包, 1隻烚雞蛋, 1杯乳酪, 1個桐仔, 1支水, 成個早餐盒都係冷冰冰架, 真係睇見都唔係好想食呀!!!! 所以最後莎拉都只係食咗個2件蛋糕就已經放放棄咗個早餐( 之後莎拉就極其後悔啦!!!!)


點解要咁早起身呢, 因為我地要搭既內陸機飛去黃龍九寨既九黃機場起飛時間係6:30AM. 導遊解釋原因點解我地要咁早飛, 係因為九黃機場地處高原, 所以好多時天氣會好唔穩定, 因此就有" 九黃機場, 十飛九黃"既稱號, 即係話, 十班機就有九班Delay或cancel. 所以我地如果搭早啲既飛機, 萬一真係delay, 到時就算影響行程都唔會太嚴重喔!

去到機場都仲係天都未光, 但原來已經係人頭湧湧啦, 哈哈哈, 好多人都拎咗個早餐盒呢.


今日我地好好彩呢, 因為九黃個邊既天氣非常好, 所以飛機可以如期起飛呀!!! 去到去登機閘口, 排隊登機時, 又再一次感受到我國同胞既"獨有排隊文化", 明明已經有一條人龍架啦, 唔知點解無端端啲人會另創一條隊囉 (無耐中!!!!).....


登機時真係天都仲未光呀,,,,,摸黑上機中, 你睇我細妹既表情就知當時呢一刻有幾眼瞓.

45分鍾既機程, 好快就到, 係機上望出去正正係日出中, 加埋一片既雲海, 真係好靚呀!

當就嚟Landing時, 機組人員報告吓黃龍當地既天氣時, 室外氣溫係-7度呀!!!無聽錯, 用英文聽多次都係-7度!!!!! 吓出發前, 唔係話黃龍呢度大約會係2-4度架咩?!!!!!

一出到機場就已經feel到啲寒意呢, 所以係行李帶度所有人一攞咗喼行李後, 就會打開個喼再攞多啲衫出嚟著. 雖然莎拉已經著咗件羽絨褸, 但係真係無預計會咁凍, 所以我都再攞多件衫同冷帽出嚟 (出發執行李時都猶豫會唔會帶多咗衫呢, 今次真係好彩帶多咗咋!!!)


細妹真係無諗住咁凍, 所以佢有咁多就著咁多, end up係著咗5件呢!!!


著好晒衫之後, 就出去上巴士出發啦, 今日既天氣真係非常好呀, 當地導遊就話我地好好彩, 因為前兩日仲有風雪, 好多機都delay晒呀. 

九黃機場位處於海拔3400米, 而我地第一日既行程係會先去黃龍瑤池風景區, 而係機場去黃龍既車程大約係2hr, 期間會攀過最高既4200米既山先到黃龍, 所以有啲人可能會出現高山反應, 但係強烈與否就因人而異啦. 有啲人就會出現心跳加速, 頭痛, 頭暈或者嚴重既就會嘔吐, 所以係高原地方緊記, 所以一字記之曰:慢, 所有動作都要慢呀, 同埋如果見有
頭暈眼花既情況出現, 就應該座低抖一抖.

出發之前都聽人講過食"紅景天"(一種中藥)可以舒緩高山反應, 但係就要係出發前7日開始食, 當然我地無咁醒目一早食啦. 但係導遊係去黃龍期間有帶我地買, 雖然有啲人就話咁遲先食都無咩用, 但係為求安心, 我地都買咗一盒10支裝既紅景天(¥120)(每人先飲2支, 到回程時再飲1支). 除此之前仲有攜帶式樽裝登山氧氣(¥50), 導遊建議每2人最少要有1支, 所以莎拉3個人都買咗2支氧氣呢, 其實買既時間都覺得貴, 同埋覺得個導遊好似做生意, 係度"鬼緊"我地去買, 但係都係個句"為求安心", 算吧啦!!!!


真係一人一支樂趣多, 齊齊"pak"番支先, 莎拉先飲為敬!

巴士經過最高海拔4200米, 周圍都係雪山呢, 旅遊車就係呢度停一停, 俾各位團友影吓相呢. 因為前兩日落過大雪, 所以地上都有冰呢, 真係行步路都要小心小心!!!



雖然已經係到咗最高海拔4200米, 但係莎拉都未有出現任何高山反應, 心諗ok啦, 都已經去到最高都無事, 實情係原來有80%遊客都係回程既時候先會嚟料架!!!

係呢2小時既車程, 莎拉已經好肚餓啦, 係咁食由香港帶嚟既朱古力同餅乾, 但都好似仲好肚餓呢,,,係呢時候莎拉就好掛住今朝個冷冰冰架早餐盒啦, 點解唔食晒裡面啲嘢呀, 真係抵死呀!!!

去到黃龍已經係10:30am, 所以就安排早啲食lunch, 當地導遊一再強調因為高原地區物資短缺, 所以好多食材都係由外面運嚟, 因此膳食方面會麻麻地, 緊記呢兩日食物係但求"維持生命". 聽完之後, 心諗唔係差得咁緊要呀?!!! 

去到一間係黃龍瑤池風景區附近既酒店食中午飯, 食完之後, 當地導遊真係無講錯呀, 嘢食真係麻麻地(豉油浸茄子, 清蒸南瓜, 清炒黃芽白, 清炒椰菜,清炒大豆芽...) 最慘係室內無暖氣, 所以啲餸就好快變凍呢!!!!  係呢個時候, 莎拉就諗起, 如果個杯麵有跟身就好啦!

但求食飽後, 就出開始發行黃龍瑤池風景區啦!!!!



感謝 莎拉蛋糕 提供以上資料
莎拉蛋糕的網誌 http://sarahcakeblog.blogspot.hk/
鐘意SeeWide的分享,給我們一個Like吧!
  • 攻略日期:N/A
    攻略地點:中國
  • 攻略時間:1日以上
    是次消費:N/A
0人比"掂"

最多能輸入300字

累積瀏覽 251807

全部攻略 499

全部回應 0