朝拜三星灣

繼上次既游船河活動之後, 當然一眾朋友仔唔多夠喉, 點都要整多次曬到燶既水上活動. 而我地每年一都差唔多會去既三星灣, 當然會成為我地8月份既水上活動啦!

星期六真係天氣好到不得了, 曬到爆呀!!!

下午約好晒朋友仔係西貢集合,之後就去西貢街市額外買定啲海鮮等夜晚BBQ燒嚟食. 之後就去白沙灣碼頭等船搭去三星灣呢.

個天空好藍好清呀, 真係熱到想快啲跳落水呀!可能因為要搭船既關係(船程約10分鐘), 三星灣個灘唔係太多人, 一定唔會好似石澳啲沙灘, 多人到針都插唔入. 而水質都OK架, 起碼當日沒會游游下有垃圾係身邊浮過!

哈哈哈, 我地一眾孩童就游到出去浮台, 之後就每人都一定要影番張自選跳水花式相!!!

係沙灘玩到6PM之後, 就搭番船過去斜對面既西貢三星海景燒烤場 www.hkbigfish.com , 自助任食BBQ每位$138. 乾手淨腳, 勝在唔使自己買BBQ既用具及食物, 方便呀!

佢地除有BBQ之外, 仲有魚排, 所以如果唔游水既都可以去魚排個邊釣魚呀!

食物既質數普普通通, 所以我地次次都會買定啲海鮮去燒架, 今次就買咗大蜆, 大蝦, 花蟹及扇貝呀, 加買啲garlic butter一齊燒, 真係好鬼正呀!!!

天光玩到天黑, 真係夠晒皮!!! 盡慶回歸呀!

感謝 莎拉蛋糕 提供以上資料
莎拉蛋糕的網誌 http://sarahcakeblog.blogspot.hk/