|
|
|
24-12-2009
|
|
|
「笨忍，吹斯安，剪詞雙斯，笨忍周陰中畫忍畫公 wo 果， our 文他啤癬征吹癬征長關。」呢句說話中嘅「笨忍」，不是別人，正是新任澳門特首崔世安，前日佢向胡總宣誓就任時，講出一段爛到爆嘅普通話，有人將呢個「笨忍」宣誓片段放上網，瞬間熱播YouTube ，網民更指崔世安嘅普通話水平足與曹仁超、古天樂鼎足，並稱港澳普通話「三差口」。
鏵哥自豪任內冇做令澳門丟架嘅事，估唔到被澳門人戲稱「技安」嘅崔世安甫上場就出晒位，只是難為了胡總，面對技安要竭力忍笑。有人質疑如果胡總聽唔明誓詞內容，技安又只係讀咗段疑似誓詞，呢次就職宣誓有冇法律效力架？ !
推廣普通話冇以身作則呢個問題，八方相信要胡總先有答案。有澳門人喺網上討論區慨嘆，誓詞僅百幾字，技安卻連花少少時間練習嘅門面功夫都唔做，一日都係小圈子選舉欽點特首之過，根本佢特首之位唾手可得，既然坐享其成，過慣飯來張口、衣來伸手安樂日子，又使乜咁辛苦學講幾句普通話？
中央政府認為愛國教育包括學好普通話，因此兩個特區都鼓勵市民要學好「煲冬瓜」，技安做社會文化司司長時，轄下教育暨青年局定期辦普通話班，目的係「豐富普通話詞彙量，熟悉普通話表達習慣和用法。」技安亦大讚普通話培訓班意念好，創設了最重要嘅語言學習環境，可惜佢冇以身作則，只係齋噏。
當年香港回歸，鍾士元帶領行會成員用普通話宣誓，港式普通話聽到人頭痛經典場面傳誦至今，十幾年來港官普通話水平冇乜長進，特首煲呔以普通話發言時，講稿要附註拼音先敢開口；財爺鬍鬚曾嘅普通話係「有限公司」，早前去浸大演講，用普通話答問題，點知俾學生恥笑，叫佢唔使轉台，講番廣東話好啲，否則大家仲聽唔明！
港、澳回歸逾 10 年，高官普通話水平咁差，唔通係「一國兩制」嘅精髓？ ![]()
|
http://www.youtube.com/watch?v=CVpmsw0TRYA&feature=email
http://www.youtube.com/watch?v=XwOemRiuO5A&feature=email
